૧૧. કણ્હદીપાયનચરિયા

૯૨. ‘‘પુનાપરં યદા હોમિ, કણ્હદીપાયનો ઇસિ;

પરોપઞ્ઞાસવસ્સાનિ, અનભિરતોચરિં અહં.

૯૩. ‘‘ન કોચિ એતં જાનાતિ, અનભિરતિમનં મમ;

અહઞ્હિ કસ્સચિ નાચિક્ખિં, અરતિ મે ચરતિ માનસે.

૯૪. ‘‘સબ્રહ્મચારી મણ્ડબ્યો, સહાયો મે મહાઇસિ;

પુબ્બકમ્મસમાયુત્તો, સૂલમારોપનં લભિ.

૯૫. ‘‘તમહં ઉપટ્ઠહિત્વાન, આરોગ્યમનુપાપયિં;

આપુચ્છિત્વાન આગઞ્છિં, યં મય્હં સકમસ્સમં.

૯૬. ‘‘સહાયો બ્રાહ્મણો મય્હં, ભરિયં આદાય પુત્તકં;

તયો જના સમાગન્ત્વા, આગઞ્છું પાહુનાગતં.

૯૭. ‘‘સમ્મોદમાનો તેહિ સહ, નિસિન્નો સકમસ્સમે;

દારકો વટ્ટમનુક્ખિપં, આસીવિસમકોપયિ.

૯૮. ‘‘તતો સો વટ્ટગતં મગ્ગં, અન્વેસન્તો કુમારકો;

આસીવિસસ્સ હત્થેન, ઉત્તમઙ્ગં પરામસિ.

૯૯. ‘‘તસ્સ આમસને કુદ્ધો, સપ્પો વિસબલસ્સિતો;

કુપિતો પરમકોપેન, અડંસિ દારકં ખણે.

૧૦૦. ‘‘સહદટ્ઠો આસીવિસેન [અતિવિસેન (પી. ક.)], દારકો પપતિ [પતતિ (ક.)] ભૂમિયં;

તેનાહં દુક્ખિતો આસિં, મમ વાહસિ તં દુક્ખં.

૧૦૧. ‘‘ત્યાહં અસ્સાસયિત્વાન, દુક્ખિતે સોકસલ્લિતે;

પઠમં અકાસિં કિરિયં, અગ્ગં સચ્ચં વરુત્તમં.

૧૦૨. ‘‘‘સત્તાહમેવાહં પસન્નચિત્તો, પુઞ્ઞત્થિકો અચરિં બ્રહ્મચરિયં;

અથાપરં યં ચરિતં મમેદં, વસ્સાનિ પઞ્ઞાસસમાધિકાનિ.

૧૦૩. ‘‘‘અકામકો વાહિ અહં ચરામિ, એતેન સચ્ચેન સુવત્થિ હોતુ;

હતં વિસં જીવતુ યઞ્ઞદત્તો’.

૧૦૪. ‘‘સહ સચ્ચે કતે મય્હં, વિસવેગેન વેધિતો;

અબુજ્ઝિત્વાન વુટ્ઠાસિ, અરોગો ચાસિ માણવો;

સચ્ચેન મે સમો નત્થિ, એસા મે સચ્ચપારમી’’તિ.

કણ્હદીપાયનચરિયં એકાદસમં.