૫. સોણપણ્ડિતચરિયા

૪૨. ‘‘પુનાપરં યદા હોમિ, નગરે બ્રહ્મવડ્ઢને;

તત્થ કુલવરે સેટ્ઠે, મહાસાલે અજાયહં.

૪૩. ‘‘તદાપિ લોકં દિસ્વાન, અન્ધીભૂતં તમોત્થટં;

ચિત્તં ભવતો પતિકુટતિ, તુત્તવેગહતં વિય.

૪૪. ‘‘દિસ્વાન વિવિધં પાપં, એવં ચિન્તેસહં તદા;

‘કદાહં ગેહા નિક્ખમ્મ, પવિસિસ્સામિ કાનનં’.

૪૫. ‘‘તદાપિ મં નિમન્તેસું, કામભોગેહિ ઞાતયો;

તેસમ્પિ છન્દમાચિક્ખિં, ‘મા નિમન્તેથ તેહિ મં’.

૪૬. ‘‘યો મે કનિટ્ઠકો ભાતા, નન્દો નામાસિ પણ્ડિતો;

સોપિ મં અનુસિક્ખન્તો, પબ્બજ્જં સમરોચયિ.

૪૭. ‘‘અહં સોણો ચ નન્દો ચ, ઉભો માતાપિતા મમ;

તદાપિ ભોગે છડ્ડેત્વા, પાવિસિમ્હા મહાવન’’ન્તિ.

સોણપણ્ડિતચરિયં પઞ્ચમં.