૬. તેમિયચરિયા

૪૮. ‘‘પુનાપરં યદા હોમિ, કાસિરાજસ્સ અત્રજો;

મૂગપક્ખોતિ નામેન, તેમિયોતિ વદન્તિ મં.

૪૯. ‘‘સોળસિત્થિસહસ્સાનં, ન વિજ્જતિ પુમો તદા [સદા (સી.)];

અહોરત્તાનં અચ્ચયેન, નિબ્બત્તો અહમેકકો.

૫૦. ‘‘કિચ્છા લદ્ધં પિયં પુત્તં, અભિજાતં જુતિન્ધરં;

સેતચ્છત્તં ધારયિત્વાન, સયને પોસેતિ મં પિતા.

૫૧. ‘‘નિદ્દાયમાનો સયનવરે, પબુજ્ઝિત્વાનહં તદા;

અદ્દસં પણ્ડરં છત્તં, યેનાહં નિરયં ગતો.

૫૨. ‘‘સહ દિટ્ઠસ્સ મે છત્તં, તાસો ઉપ્પજ્જિ ભેરવો;

વિનિચ્છયં સમાપન્નો, ‘કથાહં ઇમં મુઞ્ચિસ્સં’.

૫૩. ‘‘પુબ્બસાલોહિતા મય્હં, દેવતા અત્થકામિની;

સા મં દિસ્વાન દુક્ખિતં, તીસુ ઠાનેસુ યોજયિ.

૫૪. ‘‘‘મા પણ્ડિચ્ચયં વિભાવય, બાલમતો ભવ સબ્બપાણિનં;

સબ્બો તં જનો ઓચિનાયતુ, એવં તવ અત્થો ભવિસ્સતિ’.

૫૫. ‘‘એવં વુત્તાયહં તસ્સા, ઇદં વચનમબ્રવિં;

‘કરોમિ તે તં વચનં, યં ત્વં ભણસિ દેવતે;

અત્થકામાસિ મે અમ્મ, હિતકામાસિ દેવતે’.

૫૬. ‘‘તસ્સાહં વચનં સુત્વા, સાગરેવ થલં લભિં;

હટ્ઠો સંવિગ્ગમાનસો, તયો અઙ્ગે અધિટ્ઠહિં.

૫૭. ‘‘મૂગો અહોસિં બધિરો, પક્ખો ગતિવિવજ્જિતો;

એતે અઙ્ગે અધિટ્ઠાય, વસ્સાનિ સોળસં વસિં.

૫૮. ‘‘તતો મે હત્થપાદે ચ, જિવ્હં સોતઞ્ચ મદ્દિય;

અનૂનતં મે પસ્સિત્વા, ‘કાળકણ્ણી’તિ નિન્દિસું.

૫૯. ‘‘તતો જાનપદા સબ્બે, સેનાપતિપુરોહિતા;

સબ્બે એકમના હુત્વા, છડ્ડનં અનુમોદિસું.

૬૦. ‘‘સોહં તેસં મતિં સુત્વા, હટ્ઠો સંવિગ્ગમાનસો;

યસ્સત્થાય તપોચિણ્ણો, સો મે અત્થો સમિજ્ઝથ.

૬૧. ‘‘ન્હાપેત્વા અનુલિમ્પિત્વા, વેઠેત્વા રાજવેઠનં;

છત્તેન અભિસિઞ્ચિત્વા, કારેસું પુરં પદક્ખિણં.

૬૨. ‘‘સત્તાહં ધારયિત્વાન, ઉગ્ગતે રવિમણ્ડલે;

રથેન મં નીહરિત્વા, સારથી વનમુપાગમિ.

૬૩. ‘‘એકોકાસે રથં કત્વા, સજ્જસ્સં હત્થમુચ્ચિતો [હત્થમુઞ્ચિતો (સી. સ્યા.)];

સારથી ખણતી કાસું, નિખાતું પથવિયા મમં.

૬૪. ‘‘અધિટ્ઠિતમધિટ્ઠાનં, તજ્જેન્તો વિવિધકારણા;

ન ભિન્દિં તમધિટ્ઠાનં, બોધિયાયેવ કારણા.

૬૫. ‘‘માતાપિતા ન મે દેસ્સા, અત્તા મે ન ચ દેસ્સિયો;

સબ્બઞ્ઞુતં પિયં મય્હં, તસ્મા વતમધિટ્ઠહિં.

૬૬. ‘‘એતે અઙ્ગે અધિટ્ઠાય, વસ્સાનિ સોળસં વસિં;

અધિટ્ઠાનેન મે સમો નત્થિ, એસા મે અધિટ્ઠાનપારમી’’તિ.

તેમિયચરિયં છટ્ઠં.