૪. ભિસચરિયા

૩૪. ‘‘પુનાપરં યદા હોમિ, કાસીનં પુરવરુત્તમે;

ભગિની ચ ભાતરો સત્ત, નિબ્બત્તા સોત્થિયે કુલે.

૩૫. ‘‘એતેસં પુબ્બજો આસિં, હિરીસુક્કમુપાગતો;

ભવં દિસ્વાન ભયતો, નેક્ખમ્માભિરતો અહં.

૩૬. ‘‘માતાપિતૂહિ પહિતા, સહાયા એકમાનસા;

કામેહિ મં નિમન્તેન્તિ, ‘કુલવંસં ધરેહિ’તિ.

૩૭. ‘‘યં તેસં વચનં વુત્તં, ગિહીધમ્મે સુખાવહં;

તં મે અહોસિ કઠિનં, તત્ત [સન્તત્ત (ક.)] ફાલસમં વિય.

૩૮. ‘‘તે મં તદા ઉક્ખિપન્તં, પુચ્છિંસુ પત્થિતં મમ;

‘કિં ત્વં પત્થયસે સમ્મ, યદિ કામે ન ભુઞ્જસિ’.

૩૯. ‘‘તેસાહં એવમવચં, અત્થકામો હિતેસિનં;

‘નાહં પત્થેમિ ગિહીભાવં, નેક્ખમ્માભિરતો અહં’.

૪૦. ‘‘તે મય્હં વચનં સુત્વા, પિતુમાતુ ચ સાવયું;

માતાપિતા એવમાહુ, ‘સબ્બેવ પબ્બજામ ભો’.

૪૧. ‘‘ઉભો માતાપિતા મય્હં, ભગિની ચ સત્ત ભાતરો;

અમિતધનં છડ્ડયિત્વા, પાવિસિમ્હા મહાવન’’ન્તિ.

ભિસચરિયં ચતુત્થં.