૩. અયોઘરચરિયા

૨૪. ‘‘પુનાપરં યદા હોમિ, કાસિરાજસ્સ અત્રજો;

અયોઘરમ્હિ સંવડ્ઢો, નામેનાસિ અયોઘરો.

૨૫. ‘‘દુક્ખેન જીવિતો લદ્ધો, સંપીળે પતિપોસિતો;

અજ્જેવ પુત્ત પટિપજ્જ, કેવલં વસુધં ઇમં.

૨૬. ‘‘સરટ્ઠકં સનિગમં, સજનં વન્દિત્વ ખત્તિયં;

અઞ્જલિં પગ્ગહેત્વાન, ઇદં વચનમબ્રવિં.

૨૭. ‘‘‘યે કેચિ મહિયા સત્તા, હીનમુક્કટ્ઠમજ્ઝિમા;

નિરારક્ખા સકે ગેહે, વડ્ઢન્તિ સકઞાતિભિ.

૨૮. ‘‘‘ઇદં લોકે ઉત્તરિયં, સંપીળે મમ પોસનં;

અયોઘરમ્હિ સંવડ્ઢો, અપ્પભે ચન્દસૂરિયે.

૨૯. ‘‘‘પૂતિકુણપસમ્પુણ્ણા, મુચ્ચિત્વા માતુ કુચ્છિતો;

તતો ઘોરતરે દુક્ખે, પુન પક્ખિત્તયોઘરે.

૩૦. ‘‘‘યદિહં તાદિસં પત્વા, દુક્ખં પરમદારુણં;

રજ્જેસુ યદિ રજ્જામિ [રઞ્જામિ (સી.)], પાપાનં ઉત્તમો સિયં.

૩૧. ‘‘‘ઉક્કણ્ઠિતોમ્હિ કાયેન, રજ્જેનમ્હિ અનત્થિકો;

નિબ્બુતિં પરિયેસિસ્સં, યત્થ મં મચ્ચુ ન મદ્દિયે’.

૩૨. ‘‘એવાહં ચિન્તયિત્વાન, વિરવન્તે મહાજને;

નાગોવ બન્ધનં છેત્વા, પાવિસિં કાનનં વનં.

૩૩. ‘‘માતાપિતા ન મે દેસ્સા, નપિ મે દેસ્સં મહાયસં;

સબ્બઞ્ઞુતં પિયં મય્હં, તસ્મા રજ્જં પરિચ્ચજિ’’ન્તિ.

અયોઘરચરિયં તતિયં.