૨. સોમનસ્સચરિયા

૭. ‘‘પુનાપરં યદા હોમિ, ઇન્દપત્થે પુરુત્તમે;

કામિતો દયિતો પુત્તો, સોમનસ્સોતિ વિસ્સુતો.

૮. ‘‘સીલવા ગુણસમ્પન્નો, કલ્યાણપટિભાનવા;

વુડ્ઢાપચાયી હિરીમા, સઙ્ગહેસુ ચ કોવિદો.

૯. ‘‘તસ્સ રઞ્ઞો પતિકરો, અહોસિ કુહકતાપસો;

આરામં માલાવચ્છઞ્ચ, રોપયિત્વાન જીવતિ.

૧૦. ‘‘તમહં દિસ્વાન કુહકં, થુસરાસિંવ અતણ્ડુલં;

દુમંવ અન્તો સુસિરં, કદલિંવ અસારકં.

૧૧. ‘‘નત્થિમસ્સ સતં ધમ્મો, સામઞ્ઞાપગતો અયં;

હિરીસુક્કધમ્મજહિતો, જીવિતવુત્તિકારણા.

૧૨. ‘‘કુપિતો અહુ [અહોસિ (સી.), આસિ (સ્યા.)] પચ્ચન્તો, અટવીહિ પરન્તિહિ;

તં નિસેધેતું ગચ્છન્તો, અનુસાસિ પિતા મમં.

૧૩. ‘‘‘મા પમજ્જિ તુવં તાત, જટિલં ઉગ્ગતાપનં;

યદિચ્છકં પવત્તેહિ, સબ્બકામદદો હિ સો’.

૧૪. ‘‘તમહં ગન્ત્વાનુપટ્ઠાનં, ઇદં વચનમબ્રવિં;

‘કચ્ચિ તે ગહપતિ કુસલં, કિં વા તે આહરીયતુ’.

૧૫. ‘‘તેન સો કુપિતો આસિ, કુહકો માનનિસ્સિતો;

‘ઘાતાપેમિ તુવં અજ્જ, રટ્ઠા પબ્બાજયામિ વા’.

૧૬. ‘‘નિસેધયિત્વા પચ્ચન્તં, રાજા કુહકમબ્રવિ;

‘કચ્ચિ તે ભન્તે ખમનીયં, સમ્માનો તે પવત્તિતો’.

૧૭. ‘‘તસ્સ આચિક્ખતી પાપો, કુમારો યથા નાસિયો;

તસ્સ તં વચનં સુત્વા, આણાપેસિ મહીપતિ.

૧૮. ‘‘‘સીસં તત્થેવ છિન્દિત્વા, કત્વાન ચતુખણ્ડિકં;

રથિયા રથિયં દસ્સેથ, સા ગતિ જટિલહીળિતા’.

૧૯. ‘‘તત્થ કારણિકા ગન્ત્વા, ચણ્ડા લુદ્દા અકારુણા;

માતુઅઙ્કે નિસિન્નસ્સ, આકડ્ઢિત્વા નયન્તિ મં.

૨૦. ‘‘તેસાહં એવમવચં, બન્ધતં ગાળ્હબન્ધનં;

‘રઞ્ઞો દસ્સેથ મં ખિપ્પં, રાજકિરિયાનિ અત્થિ મે’.

૨૧. ‘‘તે મં રઞ્ઞો દસ્સયિંસુ, પાપસ્સ પાપસેવિનો;

દિસ્વાન તં સઞ્ઞાપેસિં, મમઞ્ચ વસમાનયિં.

૨૨. ‘‘સો મં તત્થ ખમાપેસિ, મહારજ્જમદાસિ મે;

સોહં તમં દાલયિત્વા, પબ્બજિં અનગારિયં.

૨૩. ‘‘ન મે દેસ્સં મહારજ્જં, કામભોગો ન દેસ્સિયો;

સબ્બઞ્ઞુતં પિયં મય્હં, તસ્મા રજ્જં પરિચ્ચજિ’’ન્તિ.

સોમનસ્સચરિયં દુતિયં.