૧. યુધઞ્જયચરિયા

૧. ‘‘યદાહં અમિતયસો, રાજપુત્તો યુધઞ્જયો;

ઉસ્સાવબિન્દું સૂરિયાતપે, પતિતં દિસ્વાન સંવિજિં.

૨. ‘‘તઞ્ઞેવાધિપતિં કત્વા, સંવેગમનુબ્રૂહયિં;

માતાપિતૂ ચ વન્દિત્વા, પબ્બજ્જમનુયાચહં.

૩. ‘‘યાચન્તિ મં પઞ્જલિકા, સનેગમા સરટ્ઠકા;

‘અજ્જેવ પુત્ત પટિપજ્જ, ઇદ્ધં ફીતં મહામહિં’.

૪. ‘‘સરાજકે સહોરોધે, સનેગમે સરટ્ઠકે;

કરુણં પરિદેવન્તે, અનપેક્ખોવ પરિચ્ચજિં.

૫. ‘‘કેવલં પથવિં રજ્જં, ઞાતિપરિજનં યસં;

ચજમાનો ન ચિન્તેસિં, બોધિયાયેવ કારણા.

૬. ‘‘માતાપિતા ન મે દેસ્સા, નપિ મે દેસ્સં મહાયસં;

સબ્બઞ્ઞુતં પિયં મય્હં, તસ્મા રજ્જં પરિચ્ચજિ’’ન્તિ.

યુધઞ્જયચરિયં પઠમં.