૧૦. સઙ્ખપાલચરિયા

૮૫. ‘‘પુનાપરં યદા હોમિ, સઙ્ખપાલો મહિદ્ધિકો;

દાઠાવુધો ઘોરવિસો, દ્વિજિવ્હો ઉરગાધિભૂ.

૮૬. ‘‘ચતુપ્પથે મહામગ્ગે, નાનાજનસમાકુલે;

ચતુરો અઙ્ગે અધિટ્ઠાય, તત્થ વાસમકપ્પયિં.

૮૭. ‘‘છવિયા ચમ્મેન મંસેન, નહારુઅટ્ઠિકેહિ વા;

યસ્સ એતેન કરણીયં, દિન્નંયેવ હરાતુ સો.

૮૮. ‘‘અદ્દસંસુ ભોજપુત્તા, ખરા લુદ્દા અકારુણા;

ઉપગઞ્છું મમં તત્થ, દણ્ડમુગ્ગરપાણિનો.

૮૯. ‘‘નાસાય વિનિવિજ્ઝિત્વા, નઙ્ગુટ્ઠે પિટ્ઠિકણ્ટકે;

કાજે આરોપયિત્વાન, ભોજપુત્તા હરિંસુ મં.

૯૦. ‘‘સસાગરન્તં પથવિં, સકાનનં સપબ્બતં;

ઇચ્છમાનો ચહં તત્થ, નાસાવાતેન ઝાપયે.

૯૧. ‘‘સૂલેહિ વિનિવિજ્ઝન્તે, કોટ્ટયન્તેપિ સત્તિભિ;

ભોજપુત્તે ન કુપ્પામિ, એસા મે સીલપારમી’’તિ.

સઙ્ખપાલચરિયં દસમં.

હત્થિનાગવગ્ગો દુતિયો.

તસ્સુદ્દાનં –

હત્થિનાગો ભૂરિદત્તો, ચમ્પેય્યો બોધિ મહિંસો;

રુરુ માતઙ્ગો ધમ્મો ચ, અત્રજો ચ જયદ્દિસો.

એતે નવ સીલબલા, પરિક્ખારા પદેસિકા;

જીવિતં પરિરક્ખિત્વા, સીલાનિ અનુરક્ખિસં.

સઙ્ખપાલસ્સ મે સતો, સબ્બકાલમ્પિ જીવિતં;

યસ્સ કસ્સચિ નિય્યત્તં, તસ્મા સા સીલપારમીતિ.

સીલપારમિનિદ્દેસો નિટ્ઠિતો.