૯. પદુમત્થેરઅપદાનં

૬૭. ‘‘ચતુસચ્ચં પકાસેન્તો, વરધમ્મપ્પવત્તકો;

વસ્સતે [વસ્સેતિ (?)] અમતં વુટ્ઠિં, નિબ્બાપેન્તો મહાજનં.

૬૮. ‘‘સધજં [સદણ્ડં (સી.)] પદુમં ગય્હ, અડ્ઢકોસે ઠિતો અહં;

પદુમુત્તરમુનિસ્સ, પહટ્ઠો ઉક્ખિપિમમ્બરે.

૬૯. ‘‘આગચ્છન્તે ચ પદુમે, અબ્ભુતો આસિ તાવદે;

મમ સઙ્કપ્પમઞ્ઞાય, પગ્ગણ્હિ વદતં વરો.

૭૦. ‘‘કરસેટ્ઠેન પગ્ગય્હ, જલજં પુપ્ફમુત્તમં;

ભિક્ખુસઙ્ઘે ઠિતો સત્થા, ઇમા ગાથા અભાસથ.

૭૧. ‘‘‘યેનિદં પદુમં ખિત્તં, સબ્બઞ્ઞુમ્હિ વિનાયકે [સબ્બઞ્ઞુતમનાયકે (સ્યા. ક.)];

તમહં કિત્તયિસ્સામિ, સુણાથ મમ ભાસતો.

૭૨. ‘‘‘તિંસકપ્પાનિ દેવિન્દો, દેવરજ્જં કરિસ્સતિ;

પથબ્યા રજ્જં સત્તસતં, વસુધં આવસિસ્સતિ.

૭૩. ‘‘‘તત્થ પત્તં ગણેત્વાન, ચક્કવત્તી ભવિસ્સતિ;

આકાસતો પુપ્ફવુટ્ઠિ, અભિવસ્સિસ્સતી તદા.

૭૪. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ નામેન, સત્થા લોકે ભવિસ્સતિ.

૭૫. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સબ્બાસવે પરિઞ્ઞાય, નિબ્બાયિસ્સતિનાસવો’.

૭૬. ‘‘નિક્ખમિત્વાન કુચ્છિમ્હા, સમ્પજાનો પતિસ્સતો;

જાતિયા પઞ્ચવસ્સોહં, અરહત્તં અપાપુણિં.

૭૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પદુમો થેરો ઇમા ગાથાયો અભાસિત્થાતિ.

પદુમત્થેરસ્સાપદાનં નવમં.