૬. બીજનિવગ્ગો

૧. વિધૂપનદાયકત્થેરઅપદાનં

૧. ‘‘પદુમુત્તરબુદ્ધસ્સ, લોકજેટ્ઠસ્સ તાદિનો;

બીજનિકા [વીજનિકા (સી. સ્યા.)] મયા દિન્ના, દ્વિપદિન્દસ્સ તાદિનો.

૨. ‘‘સકં ચિત્તં પસાદેત્વા, પગ્ગહેત્વાન અઞ્જલિં;

સમ્બુદ્ધમભિવાદેત્વા, પક્કમિં ઉત્તરામુખો.

૩. ‘‘બીજનિં પગ્ગહેત્વાન, સત્થા લોકગ્ગનાયકો [લોકે અનુત્તરો (સી.)];

ભિક્ખુસઙ્ઘે ઠિતો સન્તો, ઇમા ગાથા અભાસથ.

૪. ‘‘‘ઇમિના બીજનિદાનેન, ચિત્તસ્સ પણિધીહિ [ચેતનાપણિધીહિ (અઞ્ઞત્થ)] ચ;

કપ્પાનં સતસહસ્સં, વિનિપાતં ન ગચ્છતિ’.

૫. ‘‘આરદ્ધવીરિયો પહિતત્તો, ચેતોગુણસમાહિતો;

જાતિયા સત્તવસ્સોહં, અરહત્તં અપાપુણિં.

૬. ‘‘સટ્ઠિકપ્પસહસ્સમ્હિ, બીજમાનસનામકા;

સોળસાસિંસુ રાજાનો, ચક્કવત્તી મહબ્બલા.

૭. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા વિધૂપનદાયકો થેરો ઇમા ગાથાયો અભાસિત્થાતિ.

વિધૂપનદાયકત્થેરસ્સાપદાનં પઠમં.

૨. સતરંસિત્થેરઅપદાનં

૮. ‘‘ઉબ્બિદ્ધં સેલમારુય્હ, નિસીદિ પુરિસુત્તમો;

પબ્બતસ્સાવિદૂરમ્હિ, બ્રાહ્મણો મન્તપારગૂ.

૯. ‘‘ઉપવિટ્ઠં મહાવીરં, દેવદેવં નરાસભં;

અઞ્જલિં પગ્ગહેત્વાન, સન્થવિં લોકનાયકં.

૧૦. ‘‘‘એસ બુદ્ધો મહાવીરો, વરધમ્મપ્પકાસકો;

જલતિ અગ્ગિખન્ધોવ, ભિક્ખુસઙ્ઘપુરક્ખતો.

૧૧. ‘‘‘મહાસમુદ્દોવ‘ક્ખુબ્ભો [’ક્ખોભો (સી. સ્યા.)], અણ્ણવોવ દુરુત્તરો;

મિગરાજાવસમ્ભીતો [છમ્ભિતો (ક.)], ધમ્મં દેસેતિ ચક્ખુમા’.

૧૨. ‘‘મમ સઙ્કપ્પમઞ્ઞાય, પદુમુત્તરનાયકો;

ભિક્ખુસઙ્ઘે ઠિતો સત્થા, ઇમા ગાથા અભાસથ.

૧૩. ‘‘‘યેનાયં [યેનાહં (ક.)] અઞ્જલી દિન્નો, બુદ્ધસેટ્ઠો ચ થોમિતો;

તિંસકપ્પસહસ્સાનિ, દેવરજ્જં કરિસ્સતિ.

૧૪. ‘‘‘કપ્પસતસહસ્સમ્હિ, અઙ્ગીરસસનામકો;

વિવટ્ટચ્છદો [વિવત્થચ્છદ્દો (સી.)] સમ્બુદ્ધો, ઉપ્પજ્જિસ્સતિ તાવદે.

૧૫. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સતરંસીતિ નામેન, અરહા સો ભવિસ્સતિ’.

૧૬. ‘‘જાતિયા સત્તવસ્સોહં, પબ્બજિં અનગારિયં;

સતરંસિમ્હિ નામેન, પભા નિદ્ધાવતે મમ.

૧૭. ‘‘મણ્ડપે રુક્ખમૂલે વા, ઝાયી ઝાનરતો અહં;

ધારેમિ અન્તિમં દેહં, સમ્માસમ્બુદ્ધસાસને.

૧૮. ‘‘સટ્ઠિકપ્પસહસ્સમ્હિ, ચતુરો રામનામકા;

સત્તરતનસમ્પન્ના, ચક્કવત્તી મહબ્બલા.

૧૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સતરંસિ થેરો ઇમા ગાથાયો અભાસિત્થાતિ.

સતરંસિત્થેરસ્સાપદાનં દુતિયં.

૩. સયનદાયકત્થેરઅપદાનં

૨૦. ‘‘પદુમુત્તરબુદ્ધસ્સ, સબ્બલોકાનુકમ્પિનો;

સયનં તસ્સ પાદાસિં, વિપ્પસન્નેન ચેતસા.

૨૧. ‘‘તેન સયનદાનેન, સુખેત્તે બીજસમ્પદા;

ભોગા નિબ્બત્તરે તસ્સ, સયનસ્સ ઇદં ફલં.

૨૨. ‘‘આકાસે સેય્યં કપ્પેમિ, ધારેમિ પથવિં ઇમં;

પાણેસુ મે ઇસ્સરિયં, સયનસ્સ ઇદં ફલં.

૨૩. ‘‘પઞ્ચકપ્પસહસ્સમ્હિ, અટ્ઠ આસું મહાતેજા [મહાવરા (સી.), મહાવીરા (સ્યા.)];

ચતુત્તિંસે કપ્પસતે, ચતુરો ચ મહબ્બલા.

૨૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સયનદાયકો થેરો ઇમા ગાથાયો અભાસિત્થાતિ.

સયનદાયકત્થેરસ્સાપદાનં તતિયં.

૪. ગન્ધોદકિયત્થેરઅપદાનં

૨૫. ‘‘પદુમુત્તરબુદ્ધસ્સ, મહાબોધિમહો અહુ;

વિચિત્તં ઘટમાદાય, ગન્ધોદકમદાસહં.

૨૬. ‘‘ન્હાનકાલે ચ બોધિયા, મહામેઘો પવસ્સથ;

નિન્નાદો ચ મહા આસિ, અસનિયા ફલન્તિયા.

૨૭. ‘‘તેનેવાસનિવેગેન, તત્થ કાલઙ્કતો [કાલકતો (સી. સ્યા.)] અહં [અહું (સી.)];

દેવલોકે ઠિતો સન્તો, ઇમા ગાથા અભાસહં.

૨૮. ‘‘‘અહો બુદ્ધો અહો ધમ્મો, અહો નો સત્થુસમ્પદા;

કળેવરં [કલેબરં (સી.)] મે પતિતં, દેવલોકે રમામહં.

૨૯. ‘‘‘ઉબ્બિદ્ધં ભવનં મય્હં, સતભૂમં સમુગ્ગતં;

કઞ્ઞાસતસહસ્સાનિ, પરિવારેન્તિ મં સદા.

૩૦. ‘‘‘આબાધા મે ન વિજ્જન્તિ, સોકો મય્હં ન વિજ્જતિ;

પરિળાહં ન પસ્સામિ, પુઞ્ઞકમ્મસ્સિદં ફલં.

૩૧. ‘‘‘અટ્ઠવીસે કપ્પસતે, રાજા સંવસિતો અહું;

સત્તરતનસમ્પન્નો, ચક્કવત્તી મહબ્બલો’.

૩૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ગન્ધોદકિયો થેરો ઇમા ગાથાયો અભાસિત્થાતિ.

ગન્ધોદકિયત્થેરસ્સાપદાનં ચતુત્થં.

૫. ઓપવય્હત્થેરઅપદાનં

૩૩. ‘‘પદુમુત્તરબુદ્ધસ્સ, આજાનીયમદાસહં;

નિય્યાદેત્વાન સમ્બુદ્ધે [સમ્બુદ્ધં (સી. ક.)], અગમાસિં સકં ઘરં.

૩૪. ‘‘દેવલો નામ નામેન, સત્થુનો અગ્ગસાવકો;

વરધમ્મસ્સ દાયાદો, આગચ્છિ મમ સન્તિકં.

૩૫. ‘‘સપત્તભારો ભગવા, આજાનેય્યો ન કપ્પતિ;

તવ સઙ્કપ્પમઞ્ઞાય, અધિવાસેસિ ચક્ખુમા.

૩૬. ‘‘અગ્ઘાપેત્વા વાતજવં, સિન્ધવં સીઘવાહનં;

પદુમુત્તરબુદ્ધસ્સ, ખમનીયમદાસહં.

૩૭. ‘‘યં યં યોનુપપજ્જામિ, દેવત્તં અથ માનુસં [દેવે ચ માનુસે ભવે (સી. ક.)];

ખમનીયં વાતજવં, ચિત્તં નિબ્બત્તતે [આજાનીયા વાતજવા, વિત્તિ નિબ્બત્તરે (સ્યા.), ખમનીયા વાતજવા, ચિત્તા નિબ્બત્તરે (સી.)] મમ.

૩૮. ‘‘લાભં તેસં સુલદ્ધંવ, યે લભન્તુપસમ્પદં;

પુનપિ પયિરુપાસેય્યં, બુદ્ધો લોકે સચે ભવે.

૩૯. ‘‘અટ્ઠવીસતિક્ખત્તુંહં, રાજા આસિં મહબ્બલો;

ચાતુરન્તો વિજિતાવી, જમ્બુસણ્ડસ્સ [જમ્બુદીપસ્સ (સ્યા.), જમ્બુમણ્ડસ્સ (ક.)] જમ્બુઇસ્સરો.

૪૦. ‘‘ઇદં પચ્છિમકં મય્હં, ચરિમો વત્તતે ભવો;

પત્તોસ્મિ અચલં ઠાનં, હિત્વા જયપરાજયં.

૪૧. ‘‘ચતુતિંસસહસ્સમ્હિ, મહાતેજોસિ ખત્તિયો;

સતરતનસમ્પન્નો, ચક્કવત્તી મહબ્બલો.

૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઓપવય્હો થેરો ઇમા ગાથાયો અભાસિત્થાતિ.

ઓપવય્હત્થેરસ્સાપદાનં પઞ્ચમં.

૬. સપરિવારાસનત્થેરઅપદાનં

૪૩. ‘‘પદુમુત્તરબુદ્ધસ્સ, પિણ્ડપાતં અદાસહં;

ગન્ત્વા કિલિટ્ઠકં ઠાનં [તં ભોજનટ્ઠાનં (સી.)], મલ્લિકાહિ પરિક્ખિતં [પરિક્ખિપિં (સી.)].

૪૪. ‘‘તમ્હાસનમ્હિ આસીનો, બુદ્ધો લોકગ્ગનાયકો;

અકિત્તયિ પિણ્ડપાતં, ઉજુભૂતો સમાહિતો.

૪૫. ‘‘યથાપિ ભદ્દકે ખેત્તે, બીજં અપ્પમ્પિ રોપિતં;

સમ્મા ધારં પવેચ્છન્તે, ફલં તોસેતિ કસ્સકં.

૪૬. ‘‘તથેવાયં પિણ્ડપાતો, સુખેત્તે રોપિતો તયા;

ભવે નિબ્બત્તમાનમ્હિ, ફલં તે [નિબ્બત્તમાનં હિ, ફલતો (સી.)] તોસયિસ્સતિ [તપ્પયિસ્સતિ (ક.)].

૪૭. ‘‘ઇદં વત્વાન સમ્બુદ્ધો, જલજુત્તમનામકો;

પિણ્ડપાતં ગહેત્વાન, પક્કામિ ઉત્તરામુખો.

૪૮. ‘‘સંવુતો પાતિમોક્ખસ્મિં, ઇન્દ્રિયેસુ ચ પઞ્ચસુ;

પવિવેકમનુયુત્તો, વિહરામિ અનાસવો.

૪૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સપરિવારાસનો થેરો ઇમા ગાથાયો અભાસિત્થાતિ.

સપરિવારાસનત્થેરસ્સાપદાનં છટ્ઠં.

૭. પઞ્ચદીપકત્થેરઅપદાનં

૫૦. ‘‘પદુમુત્તરબુદ્ધસ્સ, સબ્બભૂતાનુકમ્પિનો;

સદ્દહિત્વાન [સુસણ્ઠહિત્વા (સી.)] સદ્ધમ્મે, ઉજુદિટ્ઠિ અહોસહં.

૫૧. ‘‘પદીપદાનં પાદાસિં, પરિવારેત્વાન બોધિયં;

સદ્દહન્તો પદીપાનિ, અકરિં તાવદે અહં.

૫૨. ‘‘યં યં યોનુપપજ્જામિ, દેવત્તં અથ માનુસં;

આકાસે ઉક્કં ધારેન્તિ, દીપદાનસ્સિદં ફલં.

૫૩. ‘‘તિરોકુટ્ટં તિરોસેલં, સમતિગ્ગય્હ પબ્બતં;

સમન્તા યોજનસતં, દસ્સનં અનુભોમહં.

૫૪. ‘‘તેન કમ્માવસેસેન, પત્તોમ્હિ આસવક્ખયં;

ધારેમિ અન્તિમં દેહં, દ્વિપદિન્દસ્સ સાસને.

૫૫. ‘‘ચતુત્તિંસે કપ્પસતે, સતચક્ખુસનામકા;

રાજાહેસું મહાતેજા, ચક્કવત્તી મહબ્બલા.

૫૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પઞ્ચદીપકો થેરો ઇમા ગાથાયો અભાસિત્થાતિ.

પઞ્ચદીપકત્થેરસ્સાપદાનં સત્તમં.

૮. ધજદાયકત્થેરઅપદાનં

૫૭. ‘‘પદુમુત્તરબુદ્ધસ્સ, બોધિયા પાદપુત્તમે;

હટ્ઠો હટ્ઠેન ચિત્તેન, ધજમારોપયિં અહં.

૫૮. ‘‘પતિતપત્તાનિ ગણ્હિત્વા, બહિદ્ધા છડ્ડયિં અહં;

અન્તોસુદ્ધં બહિસુદ્ધં, અધિમુત્તમનાસવં.

૫૯. ‘‘સમ્મુખા વિય સમ્બુદ્ધં, અવન્દિં બોધિમુત્તમં;

પદુમુત્તરો લોકવિદૂ, આહુતીનં પટિગ્ગહો.

૬૦. ‘‘ભિક્ખુસઙ્ઘે ઠિતો સત્થા, ઇમા ગાથા અભાસથ;

‘‘‘ઇમિના ધજદાનેન, ઉપટ્ઠાનેન ચૂભયં.

૬૧. ‘‘‘કપ્પાનં સતસહસ્સં, દુગ્ગતિં સો ન ગચ્છતિ;

દેવેસુ દેવસોભગ્યં, અનુભોસ્સતિનપ્પકં.

૬૨. ‘‘‘અનેકસતક્ખત્તુઞ્ચ, રાજા રટ્ઠે ભવિસ્સતિ;

ઉગ્ગતો નામ નામેન, ચક્કવત્તી ભવિસ્સતિ.

૬૩. ‘‘‘સમ્પત્તિં અનુભોત્વાન, સુક્કમૂલેન ચોદિતો;

ગોતમસ્સ ભગવતો, સાસનેભિરમિસ્સતિ’.

૬૪. ‘‘પધાનપહિતત્તોમ્હિ, ઉપસન્તો નિરૂપધિ;

ધારેમિ અન્તિમં દેહં, સમ્માસમ્બુદ્ધસાસને.

૬૫. ‘‘એકપઞ્ઞાસસહસ્સે, કપ્પે ઉગ્ગતસવ્હયો [સવ્હયા (સ્યા.)];

પઞ્ઞાસસતસહસ્સે, ખત્તિયો મેઘસવ્હયો [ખત્તિયા ખેમસવ્હયા (સ્યા.)].

૬૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ધજદાયકો થેરો ઇમા ગાથાયો અભાસિત્થાતિ.

ધજદાયકત્થેરસ્સાપદાનં અટ્ઠમં.