૧૦. અસનબોધિયત્થેરઅપદાનં

૭૮. ‘‘જાતિયા સત્તવસ્સોહં, અદ્દસં લોકનાયકં;

પસન્નચિત્તો સુમનો, ઉપગચ્છિં નરુત્તમં.

૭૯. ‘‘તિસ્સસ્સાહં ભગવતો, લોકજેટ્ઠસ્સ તાદિનો;

હટ્ઠો હટ્ઠેન ચિત્તેન, રોપયિં બોધિમુત્તમં.

૮૦. ‘‘અસનો નામધેય્યેન, ધરણીરુહપાદપો;

પઞ્ચવસ્સે પરિચરિં, અસનં બોધિમુત્તમં.

૮૧. ‘‘પુપ્ફિતં પાદપં દિસ્વા, અબ્ભુતં લોમહંસનં;

સકં કમ્મં પકિત્તેન્તો, બુદ્ધસેટ્ઠં ઉપાગમિં.

૮૨. ‘‘તિસ્સો તદા સો સમ્બુદ્ધો, સયમ્ભૂ અગ્ગપુગ્ગલો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૮૩. ‘‘‘યેનાયં રોપિતા બોધિ, બુદ્ધપૂજા ચ સક્કતા;

તમહં કિત્તયિસ્સામિ, સુણાથ મમ ભાસતો.

૮૪. ‘‘‘તિંસકપ્પાનિ દેવેસુ, દેવરજ્જં કરિસ્સતિ;

ચતુસટ્ઠિ ચક્ખત્તું સો, ચક્કવત્તી ભવિસ્સતિ.

૮૫. ‘‘‘તુસિતા હિ ચવિત્વાન, સુક્કમૂલેન ચોદિતો;

દ્વે સમ્પત્તી અનુભોત્વા, મનુસ્સત્તે રમિસ્સતિ.

૮૬. ‘‘‘પધાનપહિતત્તો સો, ઉપસન્તો નિરૂપધિ;

સબ્બાસવે પરિઞ્ઞાય, નિબ્બાયિસ્સતિનાસવો’.

૮૭. ‘‘વિવેકમનુયુત્તોહં, ઉપસન્તો નિરૂપધિ;

નાગોવ બન્ધનં છેત્વા, વિહરામિ અનાસવો.

૮૮. ‘‘દ્વેનવુતે ઇતો કપ્પે, બોધિં રોપેસહં તદા;

દુગ્ગતિં નાભિજાનામિ, બોધિરોપસ્સિદં ફલં.

૮૯. ‘‘ચતુસત્તતિતો કપ્પે, દણ્ડસેનોતિ વિસ્સુતો;

સત્તરતનસમ્પન્નો, ચક્કવત્તી તદા અહું.

૯૦. ‘‘તેસત્તતિમ્હિતો કપ્પે, સત્તાહેસું મહીપતી;

સમન્તનેમિનામેન, રાજાનો ચક્કવત્તિનો.

૯૧. ‘‘પણ્ણવીસતિતો કપ્પે, પુણ્ણકો નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૯૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અસનબોધિયો થેરો ઇમા ગાથાયો અભાસિત્થાતિ.

અસનબોધિયત્થેરસ્સાપદાનં દસમં.

બીજનિવગ્ગો છટ્ઠો.