૮. ઉરુવેળકસ્સપત્થેરઅપદાનં

૨૫૧. ‘‘પદુમુત્તરો નામ જિનો, સબ્બલોકવિદૂ મુનિ;

ઇતો સતસહસ્સમ્હિ, કપ્પે ઉપ્પજ્જિ ચક્ખુમા.

૨૫૨. ‘‘ઓવાદકો વિઞ્ઞાપકો, તારકો સબ્બપાણિનં;

દેસનાકુસલો બુદ્ધો, તારેસિ જનતં બહું.

૨૫૩. ‘‘અનુકમ્પકો કારુણિકો, હિતેસી સબ્બપાણિનં;

સમ્પત્તે તિત્થિયે સબ્બે, પઞ્ચસીલે પતિટ્ઠપિ.

૨૫૪. ‘‘એવં નિરાકુલં આસિ, સુઞ્ઞતં તિત્થિયેહિ ચ;

વિચિત્તં અરહન્તેહિ, વસીભૂતેહિ તાદિભિ.

૨૫૫. ‘‘રતનાનટ્ઠપઞ્ઞાસં, ઉગ્ગતો સો મહામુનિ;

કઞ્ચનગ્ઘિયસઙ્કાસો, બાત્તિંસવરલક્ખણો.

૨૫૬. ‘‘વસ્સસતસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૨૫૭. ‘‘તદાહં હંસવતિયા, બ્રાહ્મણો સાધુસમ્મતો;

ઉપેચ્ચ લોકપજ્જોતં, અસ્સોસિં ધમ્મદેસનં.

૨૫૮. ‘‘તદા મહાપરિસતિં, મહાપરિસસાવકં;

ઠપેન્તં એતદગ્ગમ્હિ, સુત્વાન મુદિતો અહં.

૨૫૯. ‘‘મહતા પરિવારેન, નિમન્તેત્વા મહાજિનં;

બ્રાહ્મણાનં સહસ્સેન, સહદાનમદાસહં.

૨૬૦. ‘‘મહાદાનં દદિત્વાન, અભિવાદિય નાયકં;

એકમન્તં ઠિતો હટ્ઠો, ઇદં વચનમબ્રવિં.

૨૬૧. ‘‘‘તયિ સદ્ધાય મે વીર, અધિકારગુણેન ચ;

પરિસા મહતી હોતુ, નિબ્બત્તસ્સ તહિં તહિં’.

૨૬૨. ‘‘તદા અવોચ પરિસં, ગજગજ્જિતસુસ્સરો;

કરવીકરુતો સત્થા, ‘એતં પસ્સથ બ્રાહ્મણં.

૨૬૩. ‘‘‘હેમવણ્ણં મહાબાહું, કમલાનનલોચનં;

ઉદગ્ગતનુજં હટ્ઠં, સદ્ધવન્તં ગુણે મમ.

૨૬૪. ‘‘‘એસ પત્થયતે ઠાનં [પત્થયિ તં ઠાનં (સ્યા.)], સીહઘોસસ્સ ભિક્ખુનો;

અનાગતમ્હિ અદ્ધાને, લચ્છસે તં મનોરથં.

૨૬૫. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૨૬૬. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

કસ્સપો નામ ગોત્તેન, હેસ્સતિ સત્થુ સાવકો’.

૨૬૭. ‘‘ઇતો દ્વેનવુતે કપ્પે, અહુ સત્થા અનુત્તરો;

અનૂપમો અસદિસો, ફુસ્સો લોકગ્ગનાયકો.

૨૬૮. ‘‘સો ચ સબ્બં તમં હન્ત્વા, વિજટેત્વા મહાજટં;

વસ્સતે અમતં વુટ્ઠિં, તપ્પયન્તો સદેવકં.

૨૬૯. ‘‘તદા હિ બારાણસિયં, રાજા પચ્ચા અહુમ્હસે;

ભાતરોમ્હ તયો સબ્બે, સંવિસટ્ઠાવ રાજિનો.

૨૭૦. ‘‘વીરઙ્ગરૂપા બલિનો, સઙ્ગામે અપરાજિતા;

તદા કુપિતપચ્ચન્તો [કુપ્પતિ પચ્ચન્તો (ક.)], અમ્હે આહ મહીપતિ.

૨૭૧. ‘‘‘એથ ગન્ત્વાન પચ્ચન્તં, સોધેત્વા અટ્ટવીબલં;

ખેમં વિજિરિતં કત્વા, પુન દેથાતિ ભાસથ’.

૨૭૨. ‘‘તતો મયં અવોચુમ્હ, યદિ દેય્યાસિ નાયકં;

ઉપટ્ઠાનાય અમ્હાકં, સાધયિસ્સામ વો તતો.

૨૭૩. ‘‘તતો મયં લદ્ધવરા, ભૂમિપાલેન પેસિતા;

નિક્ખિત્તસત્થં પચ્ચન્તં, કત્વા પુનરુપચ્ચ તં.

૨૭૪. ‘‘યાચિત્વા સત્થુપટ્ઠાનં, રાજાનં લોકનાયકં;

મુનિવીરં લભિત્વાન, યાવજીવં યજિમ્હ તં.

૨૭૫. ‘‘મહગ્ઘાનિ ચ વત્થાનિ, પણીતાનિ રસાનિ ચ;

સેનાસનાનિ રમ્માનિ, ભેસજ્જાનિ હિતાનિ ચ.

૨૭૬. ‘‘દત્વા સસઙ્ઘમુનિનો [સસંઘસ્સ મુને (સી. પી.)], ધમ્મેનુપ્પાદિતાનિ નો;

સીલવન્તો કારુણિકા, ભાવનાયુત્તમાનસા.

૨૭૭. ‘‘સદ્ધા પરિચરિત્વાન, મેત્તચિત્તેન નાયકં;

નિબ્બુતે તમ્હિ લોકગ્ગે, પૂજં કત્વા યથાબલં.

૨૭૮. ‘‘તતો ચુતા સન્તુસિતં [તાવતિંસં (સ્યા.)], ગતા તત્થ મહાસુખં;

અનુભૂતા મયં સબ્બે, બુદ્ધપૂજાયિદં ફલં.

૨૭૯. ‘‘માયાકારો યથા રઙ્ગે [લદ્ધો (સ્યા. પી.)], દસ્સેસિ વિકતિં બહું;

તથા ભવે ભમન્તોહં [ગમેન્તોહં (ક.), ભવન્તોહં (સ્યા.)], વિદેહાધિપતી અહું.

૨૮૦. ‘‘ગુણાચેળસ્સ વાક્યેન, મિચ્છાદિટ્ઠિગતાસયો;

નરકં મગ્ગમારૂળ્હો, રુચાય મમ ધીતુયા.

૨૮૧. ‘‘ઓવાદં નાદિયિત્વાન, બ્રહ્મુના નારદેનહં;

બહુધા સંસિતો સન્તો, દિટ્ઠિં હિત્વાન પાપિકં.

૨૮૨. ‘‘પૂરયિત્વા વિસેસેન, દસ કમ્મપથાનિહં;

હિત્વાન દેહમગમિં, સગ્ગં સભવનં યથા.

૨૮૩. ‘‘પચ્છિમે ભવે સમ્પત્તે, બ્રહ્મબન્ધુ અહોસહં;

બારાણસિયં ફીતાયં, જાતો વિપ્પમહાકુલે.

૨૮૪. ‘‘મચ્ચુબ્યાધિજરા ભીતો, ઓગાહેત્વા મહાવનં [જહિત્વાન મહાધનં (સી.), જહિત્વા ચ મહાધનં (પી.)];

નિબ્બાનં પદમેસન્તો, જટિલેસુ પરિબ્બજિં.

૨૮૫. ‘‘તદા દ્વે ભાતરો મય્હં, પબ્બજિંસુ મયા સહ;

ઉરુવેળાયં માપેત્વા, અસ્સમં નિવસિં અહં.

૨૮૬. ‘‘કસ્સપો નામ ગોત્તેન, ઉરુવેળનિવાસિકો [ઉરુવેળાય નિવસિં (સ્યા.)];

તતો મે આસિ પઞ્ઞત્તિ, ઉરુવેળકસ્સપો ઇતિ.

૨૮૭. ‘‘નદીસકાસે ભાતા મે, નદીકસ્સપસવ્હયો;

આસી સકાસનામેન, ગયાયં ગયાકસ્સપો.

૨૮૮. ‘‘દ્વે સતાનિ કનિટ્ઠસ્સ, તીણિ મજ્ઝસ્સ ભાતુનો;

મમ પઞ્ચ સતાનૂના, સિસ્સા સબ્બે મમાનુગા.

૨૮૯. ‘‘તદા ઉપેચ્ચ મં બુદ્ધો, કત્વાન વિવિધાનિ મે [કત્વા નાનાવિધાનિ મે (સી.)];

પાટિહીરાનિ લોકગ્ગો, વિનેસિ નરસારથિ.

૨૯૦. ‘‘સહસ્સપરિવારેન, અહોસિં એહિભિક્ખુકો;

તેહેવ સહ સબ્બેહિ, અરહત્તમપાપુણિં.

૨૯૧. ‘‘તે ચેવઞ્ઞે ચ બહવો, સિસ્સા મં પરિવારયું;

સાસિતુઞ્ચ સમત્થોહં, તતો મં ઇસિસત્તમો.

૨૯૨. ‘‘મહાપરિસભાવસ્મિં, એતદગ્ગે ઠપેસિ મં;

અહો બુદ્ધે કતં કારં, સફલં મે અજાયથ.

૨૯૩. ‘‘કિલેસા ઝાપિતા મય્હં…પે… વિહરામિ અનાસવો.

૨૯૪. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૯૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉરુવેળકસ્સપો થેરો ઇમા ગાથાયો

અભાસિત્થાતિ.

ઉરુવેળકસ્સપત્થેરસ્સાપદાનં અટ્ઠમં.