૯. રાધત્થેરઅપદાનં

૨૯૬. ‘‘પદુમુત્તરો નામ જિનો, સબ્બલોકવિદૂ મુનિ;

ઇતો સતસહસ્સમ્હિ, કપ્પે ઉપ્પજ્જિ ચક્ખુમા.

૨૯૭. ‘‘ઓવાદકો વિઞ્ઞાપકો, તારકો સબ્બપાણિનં;

દેસનાકુસલો બુદ્ધો, તારેસિ જનતં બહું.

૨૯૮. ‘‘અનુકમ્પકો કારુણિકો, હિતેસી સબ્બપાણિનં;

સમ્પત્તે તિત્થિયે સબ્બે, પઞ્ચસીલે પતિટ્ઠપિ.

૨૯૯. ‘‘એવં નિરાકુલં આસિ, સુઞ્ઞતં તિત્થિયેહિ ચ;

વિચિત્તં અરહન્તેહિ, વસીભૂતેહિ તાદિભિ.

૩૦૦. ‘‘રતનાનટ્ઠપઞ્ઞાસં, ઉગ્ગતો સો મહામુનિ;

કઞ્ચનગ્ઘિયસઙ્કાસો, બાત્તિંસવરલક્ખણો.

૩૦૧. ‘‘વસ્સસતસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૩૦૨. ‘‘તદાહં હંસવતિયં, બ્રાહ્મણો મન્તપારગૂ;

ઉપેચ્ચ તં નરવરં, અસ્સોસિં ધમ્મદેસનં.

૩૦૩. ‘‘પઞ્ઞપેન્તં મહાવીરં, પરિસાસુ વિસારદં;

પટિભાનેય્યકં ભિક્ખું, એતદગ્ગે વિનાયકં.

૩૦૪. ‘‘તદાહં કારં કત્વાન, સસઙ્ઘે લોકનાયકે;

નિપચ્ચ સિરસા પાદે, તં ઠાનં અભિપત્થયિં.

૩૦૫. ‘‘તતો મં ભગવા આહ, સિઙ્ગીનિક્ખસમપ્પભો;

સરેન રજનીયેન, કિલેસમલહારિના.

૩૦૬. ‘‘‘સુખી ભવસ્સુ દીઘાયુ, સિજ્ઝતુ પણિધી તવ;

સસઙ્ઘે મે કતં કારં, અતીવ વિપુલં તયા.

૩૦૭. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૩૦૮. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

રાધોતિ નામધેય્યેન, હેસ્સતિ સત્થુ સાવકો.

૩૦૯. ‘‘‘સ તે હેતુગુણે તુટ્ઠો, સક્યપુત્તો નરાસભો [ઇદં પાદદ્વયં સ્યામમૂલે નત્થી];

પટિભાનેય્યકાનગ્ગં, પઞ્ઞપેસ્સતિ નાયકો’.

૩૧૦. ‘‘તં સુત્વા મુદિતો હુત્વા, યાવજીવં તદા જિનં;

મેત્તચિત્તો પરિચરિં, સતો પઞ્ઞાસમાહિતો.

૩૧૧. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૩૧૨. ‘‘સતાનં તીણિક્ખત્તુઞ્ચ, દેવરજ્જમકારયિં;

સતાનં પઞ્ચક્ખત્તુઞ્ચ, ચક્કવત્તી અહોસહં.

૩૧૩. ‘‘પદેસરજ્જં વિપુલં, ગણનાતો અસઙ્ખિયં;

સબ્બત્થ સુખિતો આસિં, તસ્સ કમ્મસ્સ વાહસા.

૩૧૪. ‘‘પચ્છિમે ભવે સમ્પત્તે, ગિરિબ્બજપુરુત્તમે;

જાતો વિપ્પકુલે નિદ્ધે, વિકલચ્છાદનાસને.

૩૧૫. ‘‘કટચ્છુભિક્ખં પાદાસિં, સારિપુત્તસ્સ તાદિનો;

યદા જિણ્ણો ચ વુદ્ધો ચ, તદારામમુપાગમિં.

૩૧૬. ‘‘પબ્બજતિ ન મં કોચિ [પબ્બાજેન્તિ ન મં કેચિ (સી. સ્યા પી.)], જિણ્ણદુબ્બલથામકં;

તેન દીનો વિવણ્ણઙ્ગો [વિવણ્ણકો (ક.)], સોકો ચાસિં તદા અહં.

૩૧૭. ‘‘દિસ્વા મહાકારુણિકો, મમમાહ [મમાહ સો (સી.), મમાહ ચ (પી.)] મહામુનિ;

‘કિમત્થં પુત્તસોકટ્ટો, બ્રૂહિ તે ચિત્તજં રુજં’.

૩૧૮. ‘‘‘પબ્બજ્જં ન લભે વીર, સ્વાક્ખાતે તવ સાસને;

તેન સોકેન દીનોસ્મિ, સરણં હોહિ નાયક’.

૩૧૯. ‘‘તદા ભિક્ખૂ સમાનેત્વા, અપુચ્છિ મુનિસત્તમો;

‘ઇમસ્સ અધિકારં યે, સરન્તિ બ્યાહરન્તુ તે’.

૩૨૦. ‘‘સારિપુત્તો તદાવોચ, ‘કારમસ્સ સરામહં;

કટચ્છુભિક્ખં દાપેસિ, પિણ્ડાય ચરતો મમ’.

૩૨૧. ‘‘‘સાધુ સાધુ કતઞ્ઞૂસિ, સારિપુત્ત ઇમં તુવં;

પબ્બાજેહિ દિજં વુડ્ઢં, હેસ્સતાજાનિયો અયં’.

૩૨૨. ‘‘તતો અલત્થં પબ્બજ્જં, કમ્મવાચોપસમ્પદં;

ન ચિરેનેવ કાલેન, પાપુણિં આસવક્ખયં.

૩૨૩. ‘‘સક્કચ્ચં મુનિનો વાક્યં, સુણામિ મુદિતો યતો;

પટિભાનેય્યકાનગ્ગં, તતો મં ઠપયી જિનો.

૩૨૪. ‘‘કિલેસા ઝાપિતા મય્હં…પે… વિહરામિ અનાસવો.

૩૨૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૨૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા રાધો થેરો ઇમા ગાથાયો

અભાસિત્થાતિ.

રાધત્થેરસ્સાપદાનં નવમં.