૫. કુમારકસ્સપત્થેરઅપદાનં

૧૫૦. ‘‘ઇતો સતસહસ્સમ્હિ, કપ્પે ઉપ્પજ્જિ નાયકો;

સબ્બલોકહિતો વીરો, પદુમુત્તરનામકો.

૧૫૧. ‘‘તદાહં બ્રાહ્મણો હુત્વા, વિસ્સુતો વેદપારગૂ;

દિવાવિહારં વિચરં, અદ્દસં લોકનાયકં.

૧૫૨. ‘‘ચતુસચ્ચં પકાસેન્તં, બોધયન્તં સદેવકં;

વિચિત્તકથિકાનગ્ગં, વણ્ણયન્તં મહાજને.

૧૫૩. ‘‘તદા મુદિતચિત્તોહં, નિમન્તેત્વા તથાગતં;

નાનારત્તેહિ વત્થેહિ, અલઙ્કરિત્વાન મણ્ડપં.

૧૫૪. ‘‘નાનારતનપજ્જોતં, સસઙ્ઘં ભોજયિં તહિં;

ભોજયિત્વાન સત્તાહં, નાનગ્ગરસભોજનં.

૧૫૫. ‘‘નાનાચિત્તેહિ [નાનાવણ્ણેહિ (સી.)] પુપ્ફેહિ, પૂજયિત્વા સસાવકં [મહાવીરં (ક.)];

નિપચ્ચ પાદમૂલમ્હિ, તં ઠાનં પત્થયિં અહં.

૧૫૬. ‘‘તદા મુનિવરો આહ, કરુણેકરસાસયો [કરુણો કરુણાલયો (સ્યા.)];

‘પસ્સથેતં દિજવરં, પદુમાનનલોચનં.

૧૫૭. ‘‘‘પીતિપામોજ્જબહુલં, સમુગ્ગતતનૂરુહં;

હાસમ્હિતવિસાલક્ખં, મમ સાસનલાલસં.

૧૫૮. ‘‘‘પતિતં પાદમૂલે મે, એકાવત્થસુમાનસં [એકવત્થં સુમાનસં (સ્યા. ક.)];

એસ પત્થેતિ તં ઠાનં, વિચિત્તકથિકત્તનં [વિચિત્તકથિકત્તદં (સી. પી.)].

૧૫૯. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૬૦. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

કુમારકસ્સપો નામ, હેસ્સતિ સત્થુ સાવકો.

૧૬૧. ‘‘‘વિચિત્તપુપ્ફદુસ્સાનં, રતનાનઞ્ચ વાહસા;

વિચિત્તકથિકાનં સો, અગ્ગતં પાપુણિસ્સતિ’.

૧૬૨. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૧૬૩. ‘‘પરિબ્ભમં ભવાભવે [ભવાકાસે (સી. પી.)], રઙ્ગમજ્ઝે યથા નટો;

સાખમિગત્રજો હુત્વા, મિગિયા કુચ્છિમોક્કમિં.

૧૬૪. ‘‘તદા મયિ કુચ્છિગતે, વજ્ઝવારો ઉપટ્ઠિતો;

સાખેન ચત્તા મે માતા, નિગ્રોધં સરણં ગતા.

૧૬૫. ‘‘તેન સા મિગરાજેન, મરણા પરિમોચિતા;

પરિચ્ચજિત્વા સપાણં [સંપાણં (સી. પી.)], મમેવં ઓવદી તદા.

૧૬૬. ‘‘‘નિગ્રોધમેવ સેવેય્ય, ન સાખમુપસંવસે;

નિગ્રોધસ્મિં મતં સેય્યો, યઞ્ચે સાખમ્હિ જીવિતં’.

૧૬૭. ‘‘તેનાનુસિટ્ઠા મિગયૂથપેન, અહઞ્ચ માતા ચ તથેતરે ચ [ચિતરે ચ (સ્યા.), તસ્સોવાદેન (પી.), ચિતરે ચ તસ્સોવાદં (ક.)];

આગમ્મ રમ્મં તુસિતાધિવાસં, ગતા પવાસં સઘરં યથેવ.

૧૬૮. ‘‘પુનો કસ્સપવીરસ્સ, અત્થમેન્તમ્હિ સાસને;

આરુય્હ સેલસિખરં, યુઞ્જિત્વા જિનસાસનં.

૧૬૯. ‘‘ઇદાનાહં રાજગહે, જાતો સેટ્ઠિકુલે અહું;

આપન્નસત્તા મે માતા, પબ્બજિ અનગારિયં.

૧૭૦. ‘‘સગબ્ભં તં વિદિત્વાન, દેવદત્તમુપાનયું;

સો અવોચ ‘વિનાસેથ, પાપિકં ભિક્ખુનિં ઇમં’.

૧૭૧. ‘‘ઇદાનિપિ મુનિન્દેન, જિનેન અનુકમ્પિતા;

સુખિની અજની મય્હં, માતા ભિક્ખુનુપસ્સયે.

૧૭૨. ‘‘તં વિદિત્વા મહીપાલો, કોસલો મં અપોસયિ;

કુમારપરિહારેન, નામેનાહઞ્ચ કસ્સપો.

૧૭૩. ‘‘મહાકસ્સપમાગમ્મ, અહં કુમારકસ્સપો;

વમ્મિકસદિસં કાયં, સુત્વા બુદ્ધેન દેસિતં.

૧૭૪. ‘‘તતો ચિત્તં વિમુચ્ચિ મે, અનુપાદાય સબ્બસો;

પાયાસિં દમયિત્વાહં, એતદગ્ગમપાપુણિં.

૧૭૫. ‘‘કિલેસા ઝાપિતા મય્હં…પે… વિહરામિ અનાસવો.

૧૭૬. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૭૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કુમારકસ્સપો થેરો ઇમા ગાથાયો

અભાસિત્થાતિ.

કુમારકસ્સપત્થેરસ્સાપદાનં પઞ્ચમં.

ચતુવીસતિમં ભાણવારં.