૪. દબ્બમલ્લપુત્તત્થેરઅપદાનં

૧૦૮. ‘‘પદુમુત્તરો નામ જિનો, સબ્બલોકવિદૂ મુનિ;

ઇતો સતસહસ્સમ્હિ, કપ્પે ઉપ્પજ્જિ ચક્ખુમા.

૧૦૯. ‘‘ઓવાદકો વિઞ્ઞાપકો, તારકો સબ્બપાણિનં;

દેસનાકુસલો બુદ્ધો, તારેસિ જનતં બહું.

૧૧૦. ‘‘અનુકમ્પકો કારુણિકો, હિતેસી સબ્બપાણિનં;

સમ્પત્તે તિત્થિયે સબ્બે, પઞ્ચસીલે પતિટ્ઠપિ [પતિટ્ઠહિ (સ્યા. ક.)].

૧૧૧. ‘‘એવં નિરાકુલં આસિ, સુઞ્ઞતં [સુઞ્ઞકં (સી.) એવમુપરિપિ] તિત્થિયેહિ ચ;

વિચિત્તં અરહન્તેહિ, વસીભૂતેહિ તાદિભિ.

૧૧૨. ‘‘રતનાનટ્ઠપઞ્ઞાસં, ઉગ્ગતો સો મહામુનિ;

કઞ્ચનગ્ઘિયસઙ્કાસો, બાત્તિંસવરલક્ખણો.

૧૧૩. ‘‘વસ્સસતસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૧૧૪. ‘‘તદાહં હંસવતિયં, સેટ્ઠિપુત્તો મહાયસો;

ઉપેત્વા લોકપજ્જોતં, અસ્સોસિં ધમ્મદેસનં.

૧૧૫. ‘‘સેનાસનાનિ ભિક્ખૂનં, પઞ્ઞાપેન્તં સસાવકં;

કિત્તયન્તસ્સ વચનં, સુણિત્વા મુદિતો અહં.

૧૧૬. ‘‘અધિકારં સસઙ્ઘસ્સ, કત્વા તસ્સ મહેસિનો;

નિપચ્ચ સિરસા પાદે, તં ઠાનમભિપત્થયિં.

૧૧૭. ‘‘તદાહ સ મહાવીરો, મમ કમ્મં પકિત્તયં;

‘યો સસઙ્ઘમભોજેસિ, સત્તાહં લોકનાયકં.

૧૧૮. ‘‘‘સોયં કમલપત્તક્ખો, સીહંસો કનકત્તચો;

મમ પાદમૂલે નિપતિ [પતિતો (પી.)], પત્થયં ઠાનમુત્તમં.

૧૧૯. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૨૦. ‘‘‘સાવકો તસ્સ બુદ્ધસ્સ, દબ્બો નામેન વિસ્સુતો;

સેનાસનપઞ્ઞાપકો, અગ્ગો હેસ્સતિયં તદા’.

૧૨૧. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૧૨૨. ‘‘સતાનં તીણિક્ખત્તુઞ્ચ, દેવરજ્જમકારયિં;

સતાનં પઞ્ચક્ખત્તુઞ્ચ, ચક્કવત્તી અહોસહં.

૧૨૩. ‘‘પદેસરજ્જં વિપુલં, ગણનાતો અસઙ્ખિયં;

સબ્બત્થ સુખિતો આસિં, તસ્સ કમ્મસ્સ વાહસા.

૧૨૪. ‘‘એકનવુતિતો કપ્પે, વિપસ્સી નામ નાયકો;

ઉપ્પજ્જિ ચારુદસ્સનો [ચારુનયનો (સી. સ્યા. પી.)], સબ્બધમ્મવિપસ્સકો.

૧૨૫. ‘‘દુટ્ઠચિત્તો ઉપવદિં, સાવકં તસ્સ તાદિનો;

સબ્બાસવપરિક્ખીણં, સુદ્ધોતિ ચ વિજાનિય.

૧૨૬. ‘‘તસ્સેવ નરવીરસ્સ, સાવકાનં મહેસિનં;

સલાકઞ્ચ ગહેત્વાન [સલાકં પગ્ગહેત્વાન (સી. પી.)], ખીરોદનમદાસહં.

૧૨૭. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૧૨૮. ‘‘સાસનં જોતયિત્વાન, અભિભુય્ય કુતિત્થિયે;

વિનેય્યે વિનયિત્વાવ, નિબ્બુતો સો સસાવકો.

૧૨૯. ‘‘સસિસ્સે નિબ્બુતે નાથે, અત્થમેન્તમ્હિ સાસને;

દેવા કન્દિંસુ સંવિગ્ગા, મુત્તકેસા રુદમ્મુખા.

૧૩૦. ‘‘નિબ્બાયિસ્સતિ ધમ્મક્ખો, ન પસ્સિસ્સામ સુબ્બતે;

ન સુણિસ્સામ સદ્ધમ્મં, અહો નો અપ્પપુઞ્ઞતા.

૧૩૧. ‘‘તદાયં પથવી સબ્બા, અચલા સા ચલાચલા [ચલાચલી (સી.), પુલાપુલી (સ્યા.)];

સાગરો ચ સસોકોવ, વિનદી કરુણં ગિરં.

૧૩૨. ‘‘ચતુદ્દિસા દુન્દુભિયો, નાદયિંસુ અમાનુસા;

સમન્તતો અસનિયો, ફલિંસુ ચ ભયાવહા.

૧૩૩. ‘‘ઉક્કા પતિંસુ નભસા, ધૂમકેતુ ચ દિસ્સતિ;

સધૂમા જાલવટ્ટા ચ [સબ્બથલજસત્તા ચ (સી.)], રવિંસુ કરુણં મિગા.

૧૩૪. ‘‘ઉપ્પાદે દારુણે દિસ્વા, સાસનત્થઙ્ગસૂચકે;

સંવિગ્ગા ભિક્ખવો સત્ત, ચિન્તયિમ્હ મયં તદા.

૧૩૫. ‘‘સાસનેન વિનામ્હાકં, જીવિતેન અલં મયં;

પવિસિત્વા મહારઞ્ઞં, યુઞ્જામ જિનસાસનં.

૧૩૬. ‘‘અદ્દસમ્હ તદારઞ્ઞે, ઉબ્બિદ્ધં સેલમુત્તમં;

નિસ્સેણિયા તમારુય્હ, નિસ્સેણિં પાતયિમ્હસે.

૧૩૭. ‘‘તદા ઓવદિ નો થેરો, બુદ્ધુપ્પાદો સુદુલ્લભો;

સદ્ધાતિદુલ્લભા લદ્ધા, થોકં સેસઞ્ચ સાસનં.

૧૩૮. ‘‘નિપતન્તિ ખણાતીતા, અનન્તે દુક્ખસાગરે;

તસ્મા પયોગો કત્તબ્બો, યાવ ઠાતિ મુને મતં [યાવ તિટ્ઠતિ સાસનં (સ્યા.)].

૧૩૯. ‘‘અરહા આસિ સો થેરો, અનાગામી તદાનુગો;

સુસીલા ઇતરે યુત્તા, દેવલોકં અગમ્હસે.

૧૪૦. ‘‘નિબ્બુતો તિણ્ણસંસારો, સુદ્ધાવાસે ચ એકકો;

અહઞ્ચ પક્કુસાતિ ચ, સભિયો બાહિયો તથા.

૧૪૧. ‘‘કુમારકસ્સપો ચેવ, તત્થ તત્થૂપગા મયં;

સંસારબન્ધના મુત્તા, ગોતમેનાનુકમ્પિતા.

૧૪૨. ‘‘મલ્લેસુ કુસિનારાયં, જાતો ગબ્ભેવ મે સતો;

માતા મતા ચિતારુળ્હા, તતો નિપ્પતિતો અહં.

૧૪૩. ‘‘પતિતો દબ્બપુઞ્જમ્હિ, તતો દબ્બોતિ વિસ્સુતો;

બ્રહ્મચારીબલેનાહં, વિમુત્તો સત્તવસ્સિકો.

૧૪૪. ‘‘ખીરોદનબલેનાહં, પઞ્ચહઙ્ગેહુપાગતો;

ખીણાસવોપવાદેન, પાપેહિ બહુચોદિતો.

૧૪૫. ‘‘ઉભો પુઞ્ઞઞ્ચ પાપઞ્ચ, વીતિવત્તોમ્હિ દાનિહં;

પત્વાન પરમં સન્તિં, વિહરામિ અનાસવો.

૧૪૬. ‘‘સેનાસનં પઞ્ઞાપયિં, હાસયિત્વાન સુબ્બતે;

જિનો તસ્મિં ગુણે તુટ્ઠો, એતદગ્ગે ઠપેસિ મં.

૧૪૭. ‘‘કિલેસા ઝાપિતા મય્હં…પે… વિહરામિ અનાસવો.

૧૪૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૪૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા દબ્બમલ્લપુત્તો થેરો ઇમા ગાથાયો

અભાસિત્થાતિ.

દબ્બમલ્લપુત્તત્થેરસ્સાપદાનં ચતુત્થં.