૩. મહાકપ્પિનત્થેરઅપદાનં

૬૬. ‘‘પદુમુત્તરો નામ જિનો, સબ્બધમ્માન પારગૂ;

ઉદિતો અજટાકાસે [જગદાકાસે (સી.), જલદાકાસે (પી.)], રવીવ સરદમ્બરે.

૬૭. ‘‘વચનાભાય બોધેતિ, વેનેય્યપદુમાનિ સો;

કિલેસપઙ્કં સોસેતિ, મતિરંસીહિ નાયકો.

૬૮. ‘‘તિત્થિયાનં યસે [યસો (સી. પી.)] હન્તિ, ખજ્જોતાભા યથા રવિ;

સચ્ચત્થાભં પકાસેતિ, રતનંવ દિવાકરો.

૬૯. ‘‘ગુણાનં આયતિભૂતો, રતનાનંવ સાગરો;

પજ્જુન્નોરિવ ભૂતાનિ, ધમ્મમેઘેન વસ્સતિ.

૭૦. ‘‘અક્ખદસ્સો તદા આસિં, નગરે હંસસવ્હયે;

ઉપેચ્ચ ધમ્મમસ્સોસિં, જલજુત્તમનામિનો.

૭૧. ‘‘ઓવાદકસ્સ ભિક્ખૂનં, સાવકસ્સ કતાવિનો;

ગુણં પકાસયન્તસ્સ, તપ્પયન્તસ્સ [તોસયન્તસ્સ (સી.), હાસયન્તસ્સ (સ્યા.), વાસયન્તસ્સ (પી.)] મે મનં.

૭૨. ‘‘સુત્વા પતીતો સુમનો, નિમન્તેત્વા તથાગતં;

સસિસ્સં ભોજયિત્વાન, તં ઠાનમભિપત્થયિં.

૭૩. ‘‘તદા હંસસમભાગો, હંસદુન્દુભિનિસ્સનો [હંસદુન્દુભિસુસ્સરો (સી.)];

પસ્સથેતં મહામત્તં, વિનિચ્છયવિસારદં.

૭૪. ‘‘પતિતં પાદમૂલે મે, સમુગ્ગતતનૂરુહં;

જીમૂતવણ્ણં પીણંસં, પસન્નનયનાનનં.

૭૫. ‘‘પરિવારેન મહતા, રાજયુત્તં મહાયસં;

એસો કતાવિનો ઠાનં, પત્થેતિ મુદિતાસયો.

૭૬. ‘‘‘ઇમિના પણિપાતેન, ચાગેન પણિધીહિ ચ [પિણ્ડપાતેન, ચેતના પણિધીહિ ચ (સી.)];

કપ્પસતસહસ્સાનિ, નુપપજ્જતિ દુગ્ગતિં.

૭૭. ‘‘‘દેવેસુ દેવસોભગ્ગં, મનુસ્સેસુ મહન્તતં;

અનુભોત્વાન સેસેન [અભુત્વાવ સેસેન (સી.), અનુભોત્વાવ સેસેન (સ્યા.)], નિબ્બાનં પાપુણિસ્સતિ.

૭૮. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૭૯. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

કપ્પિનો નામ નામેન, હેસ્સતિ સત્થુ સાવકો’.

૮૦. ‘‘તતોહં સુકતં કારં, કત્વાન જિનસાસને;

જહિત્વા માનુસં દેહં, તુસિતં અગમાસહં.

૮૧. ‘‘દેવમાનુસરજ્જાનિ, સતસો અનુસાસિય;

બારાણસિયમાસન્ને, જાતો કેનિયજાતિયં.

૮૨. ‘‘સહસ્સપરિવારેન [સતસહસ્સપરિવારો (સ્યા.)], સપજાપતિકો અહં;

પઞ્ચ પચ્ચેકબુદ્ધાનં, સતાનિ સમુપટ્ઠહિં.

૮૩. ‘‘તેમાસં ભોજયિત્વાન, પચ્છાદમ્હ તિચીવરં;

તતો ચુતા મયં સબ્બે, અહુમ્હ તિદસૂપગા.

૮૪. ‘‘પુનો સબ્બે મનુસ્સત્તં, અગમિમ્હ તતો ચુતા;

કુક્કુટમ્હિ પુરે જાતા, હિમવન્તસ્સ પસ્સતો.

૮૫. ‘‘કપ્પિનો નામહં આસિં, રાજપુત્તો મહાયસો;

સેસામચ્ચકુલે જાતા, મમેવ પરિવારયું.

૮૬. ‘‘મહારજ્જસુખં પત્તો, સબ્બકામસમિદ્ધિમા;

વાણિજેહિ સમક્ખાતં, બુદ્ધુપ્પાદમહં સુણિં.

૮૭. ‘‘‘બુદ્ધો લોકે સમુપ્પન્નો, અસમો એકપુગ્ગલો;

સો પકાસેતિ સદ્ધમ્મં, અમતં સુખમુત્તમં.

૮૮. ‘‘‘સુયુત્તા તસ્સ સિસ્સા ચ, સુમુત્તા ચ અનાસવા’;

‘‘સુત્વા નેસં સુવચનં, સક્કરિત્વાન વાણિજે.

૮૯. ‘‘પહાય રજ્જં સામચ્ચો, નિક્ખમિં બુદ્ધમામકો;

નદિં દિસ્વા મહાચન્દં, પૂરિતં સમતિત્તિકં.

૯૦. ‘‘અપ્પતિટ્ઠં અનાલમ્બં, દુત્તરં સીઘવાહિનિં;

ગુણં સરિત્વા બુદ્ધસ્સ, સોત્થિના સમતિક્કમિં.

૯૧. ‘‘‘ભવસોતં સચે બુદ્ધો, તિણ્ણો લોકન્તગૂ વિદૂ [વિભૂ (ક.)];

એતેન સચ્ચવજ્જેન, ગમનં મે સમિજ્ઝતુ.

૯૨. ‘‘‘યદિ સન્તિગમો મગ્ગો, મોક્ખો ચચ્ચન્તિકં [મોક્ખદં સન્તિકં (સ્યા.)] સુખં;

એતેન સચ્ચવજ્જેન, ગમનં મે સમિજ્ઝતુ.

૯૩. ‘‘‘સઙ્ઘો ચે તિણ્ણકન્તારો, પુઞ્ઞક્ખેત્તો અનુત્તરો;

એતેન સચ્ચવજ્જેન, ગમનં મે સમિજ્ઝતુ’.

૯૪. ‘‘સહ કતે સચ્ચવરે, મગ્ગા અપગતં જલં;

તતો સુખેન ઉત્તિણ્ણો, નદીતીરે મનોરમે.

૯૫. ‘‘નિસિન્નં અદ્દસં બુદ્ધં, ઉદેન્તંવ પભઙ્કરં;

જલન્તં હેમસેલંવ, દીપરુક્ખંવ જોતિતં.

૯૬. ‘‘સસિંવ તારાસહિતં, સાવકેહિ પુરક્ખતં;

વાસવં વિય વસ્સન્તં, દેસનાજલદન્તરં [દેવેન જલનન્દનં (સ્યા. પી.)].

૯૭. ‘‘વન્દિત્વાન સહામચ્ચો, એકમન્તમુપાવિસિં;

તતો નો આસયં [તતો અજ્ઝાસયં (સ્યા.)] ઞત્વા, બુદ્ધો ધમ્મમદેસયિ.

૯૮. ‘‘સુત્વાન ધમ્મં વિમલં, અવોચુમ્હ મયં જિનં;

‘પબ્બાજેહિ મહાવીર, નિબ્બિન્દામ્હ [નિબ્બિન્નામ્હ (સી. પી.), ઓતિણ્ણમ્હ (સ્યા.)] મયં ભવે’.

૯૯. ‘‘‘સ્વક્ખાતો ભિક્ખવે ધમ્મો, દુક્ખન્તકરણાય વો;

ચરથ બ્રહ્મચરિયં’, ઇચ્ચાહ મુનિસત્તમો.

૧૦૦. ‘‘સહ વાચાય સબ્બેપિ, ભિક્ખુવેસધરા મયં;

અહુમ્હ ઉપસમ્પન્ના, સોતાપન્ના ચ સાસને.

૧૦૧. ‘‘તતો જેતવનં ગન્ત્વા, અનુસાસિ વિનાયકો;

અનુસિટ્ઠો જિનેનાહં, અરહત્તમપાપુણિં.

૧૦૨. ‘‘તતો ભિક્ખુસહસ્સાનિ [ભિક્ખુસહસ્સં તં (સી. પી.)], અનુસાસિમહં તદા;

મમાનુસાસનકરા, તેપિ આસું અનાસવા.

૧૦૩. ‘‘જિનો તસ્મિં ગુણે તુટ્ઠો, એતદગ્ગે ઠપેસિ મં;

ભિક્ખુઓવાદકાનગ્ગો, કપ્પિનોતિ મહાજને.

૧૦૪. ‘‘સતસહસ્સે કતં કમ્મં, ફલં દસ્સેસિ મે ઇધ;

પમુત્તો સરવેગોવ, કિલેસે ઝાપયિં [ઝાપયી (સી.)] મમ.

૧૦૫. ‘‘કિલેસા ઝાપિતા મય્હં…પે… વિહરામિ અનાસવો.

૧૦૬. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૦૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મહાકપ્પિનો થેરો ઇમા ગાથાયો

અભાસિત્થાતિ.

મહાકપ્પિનત્થેરસ્સાપદાનં તતિયં.