૯. સુભદ્દત્થેરઅપદાનં

૧૦૧. ‘‘પદુમુત્તરો લોકવિદૂ, આહુતીનં પટિગ્ગહો;

જનતં ઉદ્ધરિત્વાન, નિબ્બાયતિ મહાયસો.

૧૦૨. ‘‘નિબ્બાયન્તે ચ સમ્બુદ્ધે, દસસહસ્સિ કમ્પથ;

જનકાયો મહા આસિ, દેવા સન્નિપતું તદા.

૧૦૩. ‘‘ચન્દનં પૂરયિત્વાન, તગરામલ્લિકાહિ ચ;

હટ્ઠો હટ્ઠેન ચિત્તેન, આરોપયિં [આલેપેસિં (સી.), આરોપેસિં (સ્યા.)] નરુત્તમં.

૧૦૪. ‘‘મમ સઙ્કપ્પમઞ્ઞાય, સત્થા લોકે અનુત્તરો;

નિપન્નકોવ સમ્બુદ્ધો, ઇમા ગાથા અભાસથ.

૧૦૫. ‘‘‘યો મે પચ્છિમકે કાલે, ગન્ધમાલેન [ગન્ધમલ્લેન (સ્યા. ક.) નપુંસકેકત્તં મનસિકાતબ્બં] છાદયિ;

તમહં કિત્તયિસ્સામિ, સુણાથ મમ ભાસતો.

૧૦૬. ‘‘‘ઇતો ચુતો અયં પોસો, તુસિતકાયં ગમિસ્સતિ;

તત્થ રજ્જં કરિત્વાન, નિમ્માનં સો ગમિસ્સતિ.

૧૦૭. ‘‘‘એતેનેવ ઉપાયેન, દત્વા માલં [મલ્યં (સી.), મલ્લં (સ્યા. ક.)] વરુત્તમં;

સકકમ્માભિરદ્ધો સો, સમ્પત્તિં અનુભોસ્સતિ.

૧૦૮. ‘‘‘પુનાપિ તુસિતે કાયે, નિબ્બત્તિસ્સતિયં નરો;

તમ્હા કાયા ચવિત્વાન, મનુસ્સત્તં ગમિસ્સતિ.

૧૦૯. ‘‘‘સક્યપુત્તો મહાનાગો, અગ્ગો લોકે સદેવકે;

બોધયિત્વા બહૂ સત્તે, નિબ્બાયિસ્સતિ ચક્ખુમા.

૧૧૦. ‘‘‘તદા સોપગતો સન્તો, સુક્કમૂલેન ચોદિતો;

ઉપસઙ્કમ્મ સમ્બુદ્ધં, પઞ્હં પુચ્છિસ્સતિ તદા.

૧૧૧. ‘‘‘હાસયિત્વાન સમ્બુદ્ધો, સબ્બઞ્ઞૂ લોકનાયકો;

પુઞ્ઞકમ્મં પરિઞ્ઞાય, સચ્ચાનિ વિવરિસ્સતિ.

૧૧૨. ‘‘‘આરદ્ધો ચ અયં પઞ્હો, તુટ્ઠો એકગ્ગમાનસો;

સત્થારં અભિવાદેત્વા, પબ્બજ્જં યાચયિસ્સતિ.

૧૧૩. ‘‘‘પસન્નમાનસં દિસ્વા, સકકમ્મેન તોસિતં;

પબ્બાજેસ્સતિ સો બુદ્ધો, અગ્ગમગ્ગસ્સ કોવિદો.

૧૧૪. ‘‘‘વાયમિત્વાનયં પોસો, સમ્માસમ્બુદ્ધસાસને;

સબ્બાસવે પરિઞ્ઞાય, નિબ્બાયિસ્સતિનાસવો’.

પઞ્ચમભાણવારં.

૧૧૫. ‘‘પુબ્બકમ્મેન સંયુત્તો, એકગ્ગો સુસમાહિતો;

બુદ્ધસ્સ ઓરસો પુત્તો, ધમ્મજોમ્હિ સુનિમ્મિતો.

૧૧૬. ‘‘ધમ્મરાજં ઉપગમ્મ, અપુચ્છિં પઞ્હમુત્તમં;

કથયન્તો ચ મે પઞ્હં, ધમ્મસોતં ઉપાનયિ.

૧૧૭. ‘‘તસ્સાહં ધમ્મમઞ્ઞાય, વિહાસિં સાસને રતો;

સબ્બાસવે પરિઞ્ઞાય, વિહરામિ અનાસવો.

૧૧૮. ‘‘સતસહસ્સિતો કપ્પે, જલજુત્તમનાયકો;

નિબ્બાયિ અનુપાદાનો, દીપોવ તેલસઙ્ખયા.

૧૧૯. ‘‘સત્તયોજનિકં આસિ, થૂપઞ્ચ રતનામયં;

ધજં તત્થ અપૂજેસિં, સબ્બભદ્દં મનોરમં.

૧૨૦. ‘‘કસ્સપસ્સ ચ બુદ્ધસ્સ, તિસ્સો નામગ્ગસાવકો;

પુત્તો મે ઓરસો આસિ, દાયાદો જિનસાસને.

૧૨૧. ‘‘તસ્સ હીનેન મનસા, વાચં ભાસિં અભદ્દકં;

તેન કમ્મવિપાકેન, પચ્છા મે આસિ ભદ્દકં [પચ્છિમે અદ્દસં જિનં (સી.)].

૧૨૨. ‘‘ઉપવત્તને સાલવને, પચ્છિમે સયને મુનિ;

પબ્બાજેસિ મહાવીરો, હિતો કારુણિકો જિનો.

૧૨૩. ‘‘અજ્જેવ દાનિ પબ્બજ્જા, અજ્જેવ ઉપસમ્પદા;

અજ્જેવ પરિનિબ્બાનં, સમ્મુખા દ્વિપદુત્તમે.

૧૨૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સુભદ્દો થેરો ઇમા ગાથાયો અભાસિત્થાતિ.

સુભદ્દત્થેરસ્સાપદાનં નવમં.