૧૦. ચુન્દત્થેરઅપદાનં

૧૨૫. ‘‘સિદ્ધત્થસ્સ ભગવતો, લોકજેટ્ઠસ્સ તાદિનો;

અગ્ઘિયં કારયિત્વાન, જાતિપુપ્ફેહિ છાદયિં.

૧૨૬. ‘‘નિટ્ઠાપેત્વાન તં પુપ્ફં, બુદ્ધસ્સ ઉપનામયિં;

પુપ્ફાવસેસં પગ્ગય્હ, બુદ્ધસ્સ અભિરોપયિં.

૧૨૭. ‘‘કઞ્ચનગ્ઘિયસઙ્કાસં, બુદ્ધં લોકગ્ગનાયકં;

પસન્નચિત્તો સુમનો, પુપ્ફગ્ઘિયમુપાનયિં.

૧૨૮. ‘‘વિતિણ્ણકઙ્ખો સમ્બુદ્ધો, તિણ્ણોઘેહિ પુરક્ખતો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૧૨૯. ‘‘‘દિબ્બગન્ધં પવાયન્તં, યો મે પુપ્ફગ્ઘિયં અદા;

તમહં કિત્તયિસ્સામિ, સુણાથ મમ ભાસતો.

૧૩૦. ‘‘‘ઇતો ચુતો અયં પોસો, દેવસઙ્ઘપુરક્ખતો;

જાતિપુપ્ફેહિ પરિકિણ્ણો, દેવલોકં ગમિસ્સતિ.

૧૩૧. ‘‘‘ઉબ્બિદ્ધં ભવનં તસ્સ, સોવણ્ણઞ્ચ મણીમયં;

બ્યમ્હં પાતુભવિસ્સતિ, પુઞ્ઞકમ્મપ્પભાવિતં.

૧૩૨. ‘‘‘ચતુસત્તતિક્ખત્તું સો, દેવરજ્જં કરિસ્સતિ;

અનુભોસ્સતિ સમ્પત્તિં, અચ્છરાહિ પુરક્ખતો.

૧૩૩. ‘‘‘પથબ્યા રજ્જં તિસતં, વસુધં આવસિસ્સતિ;

પઞ્ચસત્તતિક્ખત્તુઞ્ચ, ચક્કવત્તી ભવિસ્સતિ.

૧૩૪. ‘‘‘દુજ્જયો નામ નામેન, હેસ્સતિ મનુજાધિપો;

અનુભોત્વાન તં પુઞ્ઞં, સકકમ્મં અપસ્સિતો [સકકમ્મૂપસંહિતો (સ્યા.)].

૧૩૫. ‘‘‘વિનિપાતં અગન્ત્વાન, મનુસ્સત્તં ગમિસ્સતિ;

હિરઞ્ઞં તસ્સ [હિરઞ્ઞસ્સ ચ (સી. ક.)] નિચિતં, કોટિસતમનપ્પકં.

૧૩૬. ‘‘‘નિબ્બત્તિસ્સતિ યોનિમ્હિ, બ્રાહ્મણે સો ભવિસ્સતિ;

વઙ્ગન્તસ્સ સુતો ધીમા, સારિયા ઓરસો પિયો.

૧૩૭. ‘‘‘સો ચ પચ્છા પબ્બજિત્વા, અઙ્ગીરસસ્સ સાસને;

ચૂળચુન્દોતિ [ચૂલચુન્દોતિ (સી.)] નામેન, હેસ્સતિ સત્થુ સાવકો.

૧૩૮. ‘‘‘સામણેરોવ સો સન્તો, ખીણાસવો ભવિસ્સતિ;

સબ્બાસવે પરિઞ્ઞાય, નિબ્બાયિસ્સતિનાસવો’.

૧૩૯. ‘‘ઉપટ્ઠહિં મહાવીરં, અઞ્ઞે ચ પેસલે બહૂ;

ભાતરં મે ચુપટ્ઠાસિં, ઉત્તમત્થસ્સ પત્તિયા.

૧૪૦. ‘‘ભાતરં મે ઉપટ્ઠિત્વા, ધાતું પત્તમ્હિ ઓહિય [ઓપિય (સી.), ઓચિય (સ્યા.)];

સમ્બુદ્ધં ઉપનામેસિં, લોકજેટ્ઠં નરાસભં.

૧૪૧. ‘‘ઉભો હત્થેહિ પગ્ગય્હ, બુદ્ધો લોકે સદેવકે;

સન્દસ્સયન્તો તં ધાતું, કિત્તયિ અગ્ગસાવકં.

૧૪૨. ‘‘ચિત્તઞ્ચ સુવિમુત્તં મે, સદ્ધા મય્હં પતિટ્ઠિતા;

સબ્બાસવે પરિઞ્ઞાય, વિહરામિ અનાસવો.

૧૪૩. ‘‘પટિસમ્ભિદાનુપ્પત્તા, વિમોક્ખાપિ ચ ફસ્સિતા [પટિસમ્ભિદા ચતસ્સો, વિમોક્ખાપિ ચ અટ્ઠિમે (સ્યા.)];

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા ચુન્દો થેરો ઇમા ગાથાયો અભાસિત્થાતિ.

ચુન્દત્થેરસ્સાપદાનં દસમં.

ઉપાલિવગ્ગો પઞ્ચમો.