૮. ચઙ્કમનદાયકત્થેરઅપદાનં

૯૩. ‘‘અત્થદસ્સિસ્સ મુનિનો, લોકજેટ્ઠસ્સ તાદિનો;

ઇટ્ઠકાહિ ચિનિત્વાન, ચઙ્કમં કારયિં અહં.

૯૪. ‘‘ઉચ્ચતો પઞ્ચરતનં, ચઙ્કમં સાધુમાપિતં;

આયામતો હત્થસતં, ભાવનીય્યં મનોરમં.

૯૫. ‘‘પટિગ્ગહેસિ ભગવા, અત્થદસ્સી નરુત્તમો;

હત્થેન પુલિનં ગય્હ, ઇમા ગાથા અભાસથ.

૯૬. ‘‘‘ઇમિના પુલિનદાનેન, ચઙ્કમં સુકતેન ચ;

સત્તરતનસમ્પન્નં, પુલિનં અનુભોસ્સતિ.

૯૭. ‘‘‘તીણિ કપ્પાનિ દેવેસુ, દેવરજ્જં કરિસ્સતિ;

અનુભોસ્સતિ સમ્પત્તિં, અચ્છરાહિ પુરક્ખતો.

૯૮. ‘‘‘મનુસ્સલોકમાગન્ત્વા, રાજા રટ્ઠે ભવિસ્સતિ;

તિક્ખત્તું ચક્કવત્તી ચ, મહિયા સો ભવિસ્સતિ’.

૯૯. ‘‘અટ્ઠારસે કપ્પસતે, યં કમ્મમકરિં તદા;

દુગ્ગતિં નાભિજાનામિ, ચઙ્કમસ્સ ઇદં ફલં.

૧૦૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ચઙ્કમનદાયકો થેરો ઇમા ગાથાયો અભાસિત્થાતિ.

ચઙ્કમનદાયકત્થેરસ્સાપદાનં અટ્ઠમં.