૨. સોણકોળિવિસત્થેરઅપદાનં

૨૫. ‘‘અનોમદસ્સિસ્સ મુનિનો, લોકજેટ્ઠસ્સ તાદિનો;

સુધાય લેપનં કત્વા, ચઙ્કમં કારયિં અહં.

૨૬. ‘‘નાનાવણેહિ પુપ્ફેહિ, ચઙ્કમં સન્થરિં અહં;

આકાસે વિતાનં કત્વા, ભોજયિં બુદ્ધમુત્તમં.

૨૭. ‘‘અઞ્જલિં પગ્ગહેત્વાન, અભિવાદેત્વાન સુબ્બતં [પુપ્ફકં (ક.)];

દીઘસાલં ભગવતો, નિય્યાદેસિમહં તદા.

૨૮. ‘‘મમ સઙ્કપ્પમઞ્ઞાય, સત્થા લોકે અનુત્તરો;

પટિગ્ગહેસિ ભગવા, અનુકમ્પાય ચક્ખુમા.

૨૯. ‘‘પટિગ્ગહેત્વાન સમ્બુદ્ધો, દક્ખિણેય્યો સદેવકે;

ભિક્ખુસઙ્ઘે નિસીદિત્વા, ઇમા ગાથા અભાસથ.

૩૦. ‘‘‘યો સો હટ્ઠેન ચિત્તેન, દીઘસાલં અદાસિ [અકાસિ (સી.)] મે;

તમહં કિત્તયિસ્સામિ, સુણાથ મમ ભાસતો.

૩૧. ‘‘‘ઇમસ્સ મચ્ચુકાલમ્હિ, પુઞ્ઞકમ્મસમઙ્ગિનો;

સહસ્સયુત્તસ્સરથો, ઉપટ્ઠિસ્સતિ તાવદે.

૩૨. ‘‘‘તેન યાનેનયં પોસો, દેવલોકં ગમિસ્સતિ;

અનુમોદિસ્સરે દેવા, સમ્પત્તે કુસલબ્ભવે [કુસલે ભવે (સી. સ્યા.)].

૩૩. ‘‘‘મહારહં બ્યમ્હં સેટ્ઠં, રતનમત્તિકલેપનં;

કૂટાગારવરૂપેતં, બ્યમ્હં અજ્ઝાવસિસ્સતિ.

૩૪. ‘‘‘તિંસકપ્પસહસ્સાનિ, દેવલોકે રમિસ્સતિ;

પઞ્ચવીસતિ કપ્પાનિ, દેવરાજા ભવિસ્સતિ.

૩૫. ‘‘‘સત્તસત્તતિક્ખત્તુઞ્ચ, ચક્કવત્તી ભવિસ્સતિ;

યસોધરસનામા [યસેધરા સમાના (સી.)] તે, સબ્બેપિ એકનામકા.

૩૬. ‘‘‘દ્વે સમ્પત્તી અનુભોત્વા, વડ્ઢેત્વા [ચિનિત્વા (સ્યા.)] પુઞ્ઞસઞ્ચયં;

અટ્ઠવીસતિકપ્પમ્હિ, ચક્કવત્તી ભવિસ્સતિ.

૩૭. ‘‘‘તત્રાપિ બ્યમ્હં પવરં, વિસ્સકમ્મેન માપિતં;

દસસદ્દાવિવિત્તં તં, પુરમજ્ઝાવસિસ્સતિ.

૩૮. ‘‘‘અપરિમેય્યે ઇતો કપ્પે, ભૂમિપાલો મહિદ્ધિકો;

ઓક્કાકો નામ નામેન, રાજા રટ્ઠે ભવિસ્સતિ.

૩૯. ‘‘‘સોળસિત્થિસહસ્સાનં, સબ્બાસં પવરા ચ સા [પવરાવ યા (સ્યા.), પવરા પિયા (?)];

અભિજાતા ખત્તિયાની, નવ પુત્તે જનેસ્સતિ.

૪૦. ‘‘‘નવ પુત્તે જનેત્વાન, ખત્તિયાની મરિસ્સતિ;

તરુણી ચ પિયા કઞ્ઞા, મહેસિત્તં કરિસ્સતિ.

૪૧. ‘‘‘ઓક્કાકં તોસયિત્વાન, વરં કઞ્ઞા લભિસ્સતિ;

વરં લદ્ધાન સા કઞ્ઞા, પુત્તે પબ્બાજયિસ્સતિ.

૪૨. ‘‘‘પબ્બાજિતા ચ તે સબ્બે, ગમિસ્સન્તિ નગુત્તમં;

જાતિભેદભયા સબ્બે, ભગિનીહિ વસિસ્સરે [સંવસિસ્સરે (સી.)].

૪૩. ‘‘‘એકા ચ કઞ્ઞા બ્યાધીહિ, ભવિસ્સતિ પરિક્ખતા [પુરક્ખતા (સ્યા. ક.)];

મા નો જાતિ પભિજ્જીતિ, નિખણિસ્સન્તિ ખત્તિયા.

૪૪. ‘‘‘ખત્તિયો નીહરિત્વાન, તાય સદ્ધિં વસિસ્સતિ;

ભવિસ્સતિ તદા ભેદો, ઓક્કાકકુલસમ્ભવો.

૪૫. ‘‘‘તેસં પજા ભવિસ્સન્તિ, કોળિયા નામ જાતિયા;

તત્થ માનુસકં ભોગં, અનુભોસ્સતિનપ્પકં.

૪૬. ‘‘‘તમ્હા કાયા ચવિત્વાન, દેવલોકં ગમિસ્સતિ;

તત્રાપિ પવરં બ્યમ્હં, લભિસ્સતિ મનોરમં.

૪૭. ‘‘‘દેવલોકા ચવિત્વાન, સુક્કમૂલેન ચોદિતો;

આગન્ત્વાન મનુસ્સત્તં, સોણો નામ ભવિસ્સતિ.

૪૮. ‘‘‘આરદ્ધવીરિયો પહિતત્તો, પદહં સત્થુ સાસને;

સબ્બાસવે પરિઞ્ઞાય, નિબ્બાયિસ્સતિનાસવો.

૪૯. ‘‘‘અનન્તદસ્સી ભગવા, ગોતમો સક્યપુઙ્ગવો;

વિસેસઞ્ઞૂ મહાવીરો, અગ્ગટ્ઠાને ઠપેસ્સતિ’.

૫૦. ‘‘વુટ્ઠમ્હિ દેવે ચતુરઙ્ગુલમ્હિ, તિણે અનિલેરિતઅઙ્ગણમ્હિ;

ઠત્વાન યોગસ્સ પયુત્તતાદિનો, તતોત્તરિં પારમતા ન વિજ્જતિ.

૫૧. ‘‘ઉત્તમે દમથે દન્તો, ચિત્તં મે સુપણીહિતં;

ભારો મે ઓહિતો સબ્બો, નિબ્બુતોમ્હિ અનાસવો.

૫૨. ‘‘અઙ્ગીરસો મહાનાગો, અભિજાતોવ કેસરી;

ભિક્ખુસઙ્ઘે નિસીદિત્વા, એતદગ્ગે ઠપેસિ મં.

૫૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સોણો કોળિવિસો [કોળિયવેસ્સો (સી. સ્યા.), કોટિકણ્ણો (ક.)] થેરો ઇમા ગાથાયો અભાસિત્થાતિ.

સોણકોળિવિસત્થેરસ્સાપદાનં દુતિયં.