૩. કાળિગોધાપુત્તભદ્દિયત્થેરઅપદાનં

૫૪. ‘‘પદુમુત્તરસમ્બુદ્ધં, મેત્તચિત્તં મહામુનિં;

ઉપેતિ જનતા સબ્બા, સબ્બલોકગ્ગનાયકં.

૫૫. ‘‘સત્તુકઞ્ચ બદ્ધકઞ્ચ [વત્થં સેનાસનઞ્ચેવ (સી.), સત્તુકઞ્ચ પદકઞ્ચ (સી. અટ્ઠ.), સત્તુકઞ્ચ પવાકઞ્ચ (સ્યા.)], આમિસં પાનભોજનં;

દદન્તિ સત્થુનો સબ્બે, પુઞ્ઞક્ખેત્તે અનુત્તરે.

૫૬. ‘‘અહમ્પિ દાનં દસ્સામિ, દેવદેવસ્સ તાદિનો;

બુદ્ધસેટ્ઠં નિમન્તેત્વા, સઙ્ઘમ્પિ ચ અનુત્તરં.

૫૭. ‘‘ઉય્યોજિતા મયા ચેતે, નિમન્તેસું તથાગતં;

કેવલં ભિક્ખુસઙ્ઘઞ્ચ, પુઞ્ઞક્ખેત્તં અનુત્તરં.

૫૮. ‘‘સતસહસ્સપલ્લઙ્કં, સોવણ્ણં ગોનકત્થતં;

તૂલિકાપટલિકાય, ખોમકપ્પાસિકેહિ ચ;

મહારહં પઞ્ઞાપયિં, આસનં બુદ્ધયુત્તકં.

૫૯. ‘‘પદુમુત્તરો લોકવિદૂ, દેવદેવો નરાસભો;

ભિક્ખુસઙ્ઘપરિબ્યૂળ્હો, મમ દ્વારમુપાગમિ.

૬૦. ‘‘પચ્ચુગ્ગન્ત્વાન સમ્બુદ્ધં, લોકનાથં યસસ્સિનં;

પસન્નચિત્તો સુમનો, અભિનામયિં સઙ્ઘરં [સકં ઘરં (સી.)].

૬૧. ‘‘ભિક્ખૂનં સતસહસ્સં, બુદ્ધઞ્ચ લોકનાયકં;

પસન્નચિત્તો સુમનો, પરમન્નેન તપ્પયિં.

૬૨. ‘‘પદુમુત્તરો લોકવિદૂ, આહુતીનં પટિગ્ગહો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૬૩. ‘‘‘યેનિદં આસનં દિન્નં, સોવણ્ણં ગોનકત્થતં;

તમહં કિત્તયિસ્સામિ, સુણાથ મમ ભાસતો.

૬૪. ‘‘‘ચતુસત્તતિક્ખત્તું સો, દેવરજ્જં કરિસ્સતિ;

અનુભોસ્સતિ સમ્પત્તિં, અચ્છરાહિ પુરક્ખતો.

૬૫. ‘‘‘પદેસરજ્જં સહસ્સં, વસુધં આવસિસ્સતિ;

એકપઞ્ઞાસક્ખત્તુઞ્ચ, ચક્કવત્તી ભવિસ્સતિ.

૬૬. ‘‘‘સબ્બાસુ ભવયોનીસુ, ઉચ્ચાકુલી [ઉચ્ચાકુલે (ક.)] ભવિસ્સતિ;

સો ચ પચ્છા પબ્બજિત્વા, સુક્કમૂલેન ચોદિતો;

ભદ્દિયો નામ નામેન, હેસ્સતિ સત્થુ સાવકો.

૬૭. ‘‘‘વિવેકમનુયુત્તોમ્હિ, પન્તસેનનિવાસહં;

ફલઞ્ચાધિગતં સબ્બં, ચત્તક્લેસોમ્હિ અજ્જહં.

૬૮. ‘‘‘મમ સબ્બં [કમ્મં (?)] અભિઞ્ઞાય, સબ્બઞ્ઞૂ લોકનાયકો;

ભિક્ખુસઙ્ઘે નિસીદિત્વા, એતદગ્ગે ઠપેસિ મં’.

૬૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ભદ્દિયો કાળિગોધાય પુત્તો થેરો ઇમા ગાથાયો અભાસિત્થાતિ.

ભદ્દિયસ્સ કાળિગોધાય પુત્તત્થેરસ્સાપદાનં તતિયં.