૧. ભાગિનેય્યુપાલિત્થેરઅપદાનં

૧. ‘‘ખીણાસવસહસ્સેહિ, પરિવુતો [પરેતો (ક. અટ્ઠ)] લોકનાયકો;

વિવેકમનુયુત્તો સો, ગચ્છતે પટિસલ્લિતું.

૨. ‘‘અજિનેન નિવત્થોહં, તિદણ્ડપરિધારકો;

ભિક્ખુસઙ્ઘપરિબ્યૂળ્હં, અદ્દસં લોકનાયકં.

૩. ‘‘એકંસં અજિનં કત્વા, સિરે કત્વાન અઞ્જલિં;

સમ્બુદ્ધં અભિવાદેત્વા, સન્થવિં લોકનાયકં.

૪. ‘‘યથાણ્ડજા ચ સંસેદા, ઓપપાતી જલાબુજા;

કાકાદિપક્ખિનો સબ્બે, અન્તલિક્ખચરા સદા.

૫. ‘‘યે કેચિ પાણભૂતત્થિ, સઞ્ઞિનો વા અસઞ્ઞિનો;

સબ્બે તે તવ ઞાણમ્હિ, અન્તો હોન્તિ સમોગધા.

૬. ‘‘ગન્ધા ચ પબ્બતેય્યા યે, હિમવન્તનગુત્તમે;

સબ્બે તે તવ સીલમ્હિ, કલાયપિ ન યુજ્જરે.

૭. ‘‘મોહન્ધકારપક્ખન્દો, અયં લોકો સદેવકો;

તવ ઞાણમ્હિ જોતન્તે, અન્ધકારા વિધંસિતા.

૮. ‘‘યથા અત્થઙ્ગતે સૂરિયે, હોન્તિ સત્તા તમોગતા;

એવં બુદ્ધે અનુપ્પન્ને, હોતિ લોકો તમોગતો.

૯. ‘‘યથોદયન્તો આદિચ્ચો, વિનોદેતિ તમં સદા;

તથેવ ત્વં બુદ્ધસેટ્ઠ, વિદ્ધંસેસિ તમં સદા.

૧૦. ‘‘પધાનપહિતત્તોસિ, બુદ્ધો લોકે સદેવકે;

તવ કમ્માભિરદ્ધેન, તોસેસિ જનતં બહું.

૧૧. ‘‘તં સબ્બં અનુમોદિત્વા, પદુમુત્તરો મહામુનિ;

નભં અબ્ભુગ્ગમી ધીરો, હંસરાજાવ અમ્બરે.

૧૨. ‘‘અબ્ભુગ્ગન્ત્વાન સમ્બુદ્ધો, મહેસિ પદુમુત્તરો;

અન્તલિક્ખે ઠિતો સત્થા, ઇમા ગાથા અભાસથ.

૧૩. ‘‘યેનિદં થવિતં ઞાણં, ઓપમ્મેહિ સમાયુતં;

તમહં કિત્તયિસ્સામિ, સુણાથ મમ ભાસતો.

૧૪. ‘‘‘અટ્ઠારસઞ્ચ ખત્તું સો, દેવરાજા ભવિસ્સતિ;

પથબ્યા રજ્જં તિસતં, વસુધં આવસિસ્સતિ.

૧૫. ‘‘‘પઞ્ચવીસતિક્ખત્તુઞ્ચ, ચક્કવત્તી ભવિસ્સતિ;

પદેસરજ્જં વિપુલં, ગણનાતો અસઙ્ખિયં.

૧૬. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૭. ‘‘‘તુસિતા હિ ચવિત્વાન, સુક્કમૂલેન ચોદિતો;

હીનોવ જાતિયા સન્તો, ઉપાલિ નામ હેસ્સતિ.

૧૮. ‘‘‘સો પચ્છા પબ્બજિત્વાન, વિરાજેત્વાન પાપકં;

સબ્બાસવે પરિઞ્ઞાય, નિબ્બાયિસ્સતિનાસવો.

૧૯. ‘‘‘તુટ્ઠો ચ ગોતમો બુદ્ધો, સક્યપુત્તો મહાયસો;

વિનયાધિગતં તસ્સ, એતદગ્ગે ઠપેસ્સતિ’.

૨૦. ‘‘સદ્ધાયાહં પબ્બજિતો, કતકિચ્ચો અનાસવો;

સબ્બાસવે પરિઞ્ઞાય, વિહરામિ અનાસવો.

૨૧. ‘‘ભગવા ચાનુકમ્પી મં, વિનયેહં વિસારદો;

સકકમ્માભિરદ્ધો ચ, વિહરામિ અનાસવો.

૨૨. ‘‘સંવુતો પાતિમોક્ખમ્હિ, ઇન્દ્રિયેસુ ચ પઞ્ચસુ;

ધારેમિ વિનયં સબ્બં, કેવલં રતનાકરં [રતનગ્ઘરં (ક.)].

૨૩. ‘‘મમઞ્ચ ગુણમઞ્ઞાય, સત્થા લોકે અનુત્તરો;

ભિક્ખુસઙ્ઘે નિસીદિત્વા, એતદગ્ગે ઠપેસિ મં.

૨૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા ઉપાલિથેરો ઇમા ગાથાયો અભાસિત્થાતિ.

ભાગિનેય્યુપાલિત્થેરસ્સાપદાનં પઠમં.