૩. ભિસદાયકત્થેરઅપદાનં

૨૭. ‘‘ઓગય્હ યં [ઓગય્હાહં (સી. સ્યા. પી.)] પોક્ખરણિં, નાનાકુઞ્જરસેવિતં;

ઉદ્ધરામિ ભિસં તત્થ, ઘાસહેતુ [અસનહેતુ (સ્યા.)] અહં તદા.

૨૮. ‘‘ભગવા તમ્હિ સમયે, પદુમુત્તરસવ્હયો;

રત્તમ્બરધરો [રત્તકમ્બલધરો (સ્યા.)] બુદ્ધો, ગચ્છતિ અનિલઞ્જસે.

૨૯. ‘‘ધુનન્તો પંસુકૂલાનિ, સદ્દમસ્સોસહં તદા;

ઉદ્ધં નિજ્ઝાયમાનોહં, અદ્દસં લોકનાયકં.

૩૦. ‘‘તત્થેવ ઠિતકો સન્તો, આયાચિં લોકનાયકં;

મધું ભિસેહિ સવતિ, ખીરં સપ્પિં મુળાલિભિ.

૩૧. ‘‘પટિગ્ગણ્હાતુ મે બુદ્ધો, અનુકમ્પાય ચક્ખુમા;

તતો કારુણિકો સત્થા, ઓરુહિત્વા મહાયસો.

૩૨. ‘‘પટિગ્ગણ્હિ મમં ભિક્ખં, અનુકમ્પાય ચક્ખુમા;

પટિગ્ગહેત્વા સમ્બુદ્ધો, અકા મે અનુમોદનં.

૩૩. ‘‘‘સુખી હોતુ [હોહિ (સી. સ્યા. પી. ક.)] મહાપુઞ્ઞ, ગતિ તુય્હં સમિજ્ઝતુ;

ઇમિના ભિસદાનેન, લભસ્સુ વિપુલં સુખં’.

૩૪. ‘‘ઇદં વત્વાન સમ્બુદ્ધો, જલજુત્તમનામકો;

ભિક્ખમાદાય સમ્બુદ્ધો, અમ્બરેનાગમા જિનો.

૩૫. ‘‘તતો ભિસં ગહેત્વાન, આગચ્છિં મમ અસ્સમં;

ભિસં રુક્ખે લગેત્વાન [લગ્ગિત્વાન (સ્યા. ક.)], મમ દાનમનુસ્સરિં.

૩૬. ‘‘મહાવાતો વુટ્ઠહિત્વા, સઞ્ચાલેસિ વનં તદા;

આકાસો અભિનાદિત્થ, અસનિયા ફલન્તિયા.

૩૭. ‘‘તતો મે અસનિપાતો, મત્થકે નિપતી તદા;

સોહં નિસિન્નકો સન્તો, તત્થ કાલઙ્કતો અહું.

૩૮. ‘‘પુઞ્ઞકમ્મેન સંયુત્તો, તુસિતં ઉપપજ્જહં;

કળેવરં મે પતિતં, દેવલોકે રમિં અહં.

૩૯. ‘‘છળસીતિસહસ્સાનિ, નારિયો સમલઙ્કતા;

સાયપાતં [સાયં પાતં (સ્યા. ક.)] ઉપટ્ઠન્તિ, ભિસદાનસ્સિદં ફલં.

૪૦. ‘‘મનુસ્સયોનિમાગન્ત્વા, સુખિતો હોમહં સદા;

ભોગે મે ઊનતા નત્થિ, ભિસદાનસ્સિદં ફલં.

૪૧. ‘‘અનુકમ્પિતકો તેન, દેવદેવેન તાદિના;

સબ્બાસવા પરિક્ખીણા, નત્થિ દાનિ પુનબ્ભવો.

૪૨. ‘‘સતસહસ્સિતો કપ્પે, યં ભિસં [ભિક્ખં (સબ્બત્થ)] અદદિં તદા;

દુગ્ગતિં નાભિજાનામિ, ભિસદાનસ્સિદં ફલં.

૪૩. ‘‘કિલેસા ઝાપિતા મય્હં…પે… વિહરામિ અનાસવો.

૪૪. ‘‘સ્વાગતં વત મે આસિ…પે… કતં બુદ્ધસ્સ સાસનં.

૪૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ભિસદાયકો થેરો ઇમા ગાથાયો

અભાસિત્થાતિ.

ભિસદાયકત્થેરસ્સાપદાનં તતિયં.