૪. ઞાણથવિકત્થેરઅપદાનં

૪૬. ‘‘દક્ખિણે હિમવન્તસ્સ, સુકતો અસ્સમો મમ;

ઉત્તમત્થં ગવેસન્તો, વસામિ વિપિને તદા.

૪૭. ‘‘લાભાલાભેન સન્તુટ્ઠો, મૂલેન ચ ફલેન ચ;

અન્વેસન્તો આચરિયં, વસામિ એકકો અહં.

૪૮. ‘‘સુમેધો નામ સમ્બુદ્ધો, લોકે ઉપ્પજ્જિ તાવદે;

ચતુસચ્ચં પકાસેતિ, ઉદ્ધરન્તો મહાજનં.

૪૯. ‘‘નાહં સુણોમિ સમ્બુદ્ધં, નપિ મે કોચિ સંસતિ [ભાસતિ (સી.), સાસતિ (સ્યા. પી.)];

અટ્ઠવસ્સે અતિક્કન્તે, અસ્સોસિં લોકનાયકં.

૫૦. ‘‘અગ્ગિદારું નીહરિત્વા, સમ્મજ્જિત્વાન અસ્સમં;

ખારિભારં ગહેત્વાન, નિક્ખમિં વિપિના અહં.

૫૧. ‘‘એકરત્તિં વસન્તોહં, ગામેસુ નિગમેસુ ચ;

અનુપુબ્બેન ચન્દવતિં, તદાહં ઉપસઙ્કમિં.

૫૨. ‘‘ભગવા તમ્હિ સમયે, સુમેધો લોકનાયકો;

ઉદ્ધરન્તો બહૂ સત્તે, દેસેતિ અમતં પદં.

૫૩. ‘‘જનકાયમતિક્કમ્મ, વન્દિત્વા જિનસાગરં;

એકંસં અજિનં કત્વા, સન્થવિં લોકનાયકં.

૫૪. ‘‘‘તુવં સત્થા ચ કેતુ ચ, ધજો યૂપો ચ પાણિનં;

પરાયનો [પરાયણો (સી. પી.)] પતિટ્ઠા ચ, દીપો ચ દ્વિપદુત્તમો.

એકવીસતિમં ભાણવારં.

૫૫. ‘‘‘નેપુઞ્ઞો દસ્સને વીરો, તારેસિ જનતં તુવં;

નત્થઞ્ઞો તારકો લોકે, તવુત્તરિતરો મુને.

૫૬. ‘‘‘સક્કા થેવે [હવે (સી. પી.) ભવે (સ્યા. ક.)] કુસગ્ગેન, પમેતું સાગરુત્તમે [સાગરુત્તમો (સી. સ્યા. પી.)];

નત્વેવ તવ સબ્બઞ્ઞુ, ઞાણં સક્કા પમેતવે.

૫૭. ‘‘‘તુલદણ્ડે [તુલમણ્ડલે (સી. પી.)] ઠપેત્વાન, મહિં [મહી (સ્યા. પી.)] સક્કા ધરેતવે;

નત્વેવ તવ પઞ્ઞાય, પમાણમત્થિ ચક્ખુમ.

૫૮. ‘‘‘આકાસો મિનિતું સક્કા, રજ્જુયા અઙ્ગુલેન વા;

નત્વેવ તવ સબ્બઞ્ઞુ, સીલં સક્કા પમેતવે.

૫૯. ‘‘‘મહાસમુદ્દે ઉદકં, આકાસો ચ વસુન્ધરા;

પરિમેય્યાનિ એતાનિ, અપ્પમેય્યોસિ ચક્ખુમ’.

૬૦. ‘‘છહિ ગાથાહિ સબ્બઞ્ઞું, કિત્તયિત્વા મહાયસં;

અઞ્જલિં પગ્ગહેત્વાન, તુણ્હી અટ્ઠાસહં તદા.

૬૧. ‘‘યં વદન્તિ સુમેધોતિ, ભૂરિપઞ્ઞં સુમેધસં;

ભિક્ખુસઙ્ઘે નિસીદિત્વા, ઇમા ગાથા અભાસથ.

૬૨. ‘‘‘યો મે ઞાણં પકિત્તેસિ, વિપ્પસન્નેન ચેતસા;

તમહં કિત્તયિસ્સામિ, સુણાથ મમ ભાસતો.

૬૩. ‘‘‘સત્તસત્તતિ કપ્પાનિ, દેવલોકે રમિસ્સતિ;

સહસ્સક્ખત્તું દેવિન્દો, દેવરજ્જં કરિસ્સતિ.

૬૪. ‘‘‘અનેકસતક્ખત્તુઞ્ચ, ચક્કવત્તી ભવિસ્સતિ;

પદેસરજ્જં વિપુલં, ગણનાતો અસઙ્ખિયં.

૬૫. ‘‘‘દેવભૂતો મનુસ્સો વા, પુઞ્ઞકમ્મસમાહિતો;

અનૂનમનસઙ્કપ્પો, તિક્ખપઞ્ઞો ભવિસ્સતિ’.

૬૬. ‘‘તિંસકપ્પસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૬૭. ‘‘અગારા અભિનિક્ખમ્મ, પબ્બજિસ્સતિ કિઞ્ચનો;

જાતિયા સત્તવસ્સેન, અરહત્તં ફુસિસ્સતિ.

૬૮. ‘‘યતો સરામિ અત્તાનં, યતો પત્તોસ્મિ સાસનં;

એત્થન્તરે ન જાનામિ, ચેતનં અમનોરમં.

૬૯. ‘‘સંસરિત્વા ભવે સબ્બે, સમ્પત્તાનુભવિં અહં;

ભોગે મે ઊનતા નત્થિ, ફલં ઞાણસ્સ થોમને.

૭૦. ‘‘તિયગ્ગી નિબ્બુતા મય્હં, ભવા સબ્બે સમૂહતા;

સબ્બાસવા પરિક્ખીણા, નત્થિ દાનિ પુનબ્ભવો.

૭૧. ‘‘તિંસકપ્પસહસ્સમ્હિ, યં ઞાણમથવિં અહં [મભિથોમયિં (સી. પી.), મભિથોમહં (સ્યા.)];

દુગ્ગતિં નાભિજાનામિ, ફલં ઞાણસ્સ થોમને.

૭૨. ‘‘કિલેસા ઝાપિતા મય્હં…પે… વિહરામિ અનાસવો.

૭૩. ‘‘સ્વાગતં વત મે આસિ…પે… કતં બુદ્ધસ્સ સાસનં.

૭૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઞાણથવિકો થેરો ઇમા ગાથાયો

અભાસિત્થાતિ.

ઞાણથવિકત્થેરસ્સાપદાનં ચતુત્થં.