૨. એકછત્તિયત્થેરઅપદાનં

૩૨. ‘‘ચન્દભાગાનદીતીરે, અસ્સમો સુકતો મમ;

સુસુદ્ધપુલિનાકિણ્ણો, પન્નસાલા સુમાપિતા.

૩૩. ‘‘ઉત્તાનકૂલા નદિકા, સુપતિત્થા મનોરમા;

મચ્છકચ્છપસમ્પન્ના [… સઞ્છન્ના (ક.)], સુસુમારનિસેવિતા.

૩૪. ‘‘અચ્છા દીપી ચ મયૂરા, કરવીકા ચ સાળિકા;

કૂજન્તિ સબ્બદા એતે, સોભયન્તા મમસ્સમં.

૩૫. ‘‘કોકિલા મઞ્જુભાણી ચ, હંસા ચ મધુરસ્સરા;

અભિકૂજન્તિ તે તત્થ, સોભયન્તા મમસ્સમં.

૩૬. ‘‘સીહા બ્યગ્ઘા વરાહા ચ, અચ્છ [વક (સી. પી.), બકા (સ્યા.), વકા (ક.)] કોકતરચ્છકા;

ગિરિદુગ્ગમ્હિ નાદેન્તિ, સોભયન્તા મમસ્સમં.

૩૭. ‘‘એણીમિગા ચ સરભા, ભેરણ્ડા સૂકરા બહૂ;

ગિરિદુગ્ગમ્હિ નાદેન્તિ, સોભયન્તા મમસ્સમં.

૩૮. ‘‘ઉદ્દાલકા ચમ્પકા ચ, પાટલી સિન્દુવારકા;

અતિમુત્તા અસોકા ચ, સોભયન્તિ મમસ્સમં [પુપ્ફન્તિ મમ અસ્સમે (સી. પી.)].

૩૯. ‘‘અઙ્કોલા યૂથિકા ચેવ, સત્તલી બિમ્બિજાલિકા;

કણિકારા ચ પુપ્ફન્તિ, સોભયન્તા મમસ્સમં [કણિકાકણિકારા ચ, પુપ્ફન્તિ મમ અસ્સમે (સી. સ્યા. પી.)].

૪૦. ‘‘નાગા સાલા ચ સળલા, પુણ્ડરીકેત્થ પુપ્ફિતા;

દિબ્બગન્ધં સમ્પવન્તા, સોભયન્તિ મમસ્સમં.

૪૧. ‘‘અજ્જુના અસના ચેત્થ, મહાનામા ચ પુપ્ફિતા;

સાલા ચ કઙ્ગુપુપ્ફા ચ, સોભયન્તિ મમસ્સમં.

૪૨. ‘‘અમ્બા જમ્બૂ ચ તિલકા, નિમ્બા ચ સાલકલ્યાણી;

દિબ્બગન્ધં સમ્પવન્તા, સોભયન્તિ મમસ્સમં.

૪૩. ‘‘અસોકા ચ કપિટ્ઠા ચ, ગિરિમાલેત્થ [ભગિનિમાલેત્થ (સી. પી.), ભગિનિમાલા ચ (સ્યા.)] પુપ્ફિતા;

દિબ્બગન્ધં સમ્પવન્તા, સોભયન્તિ મમસ્સમં.

૪૪. ‘‘કદમ્બા કદલી ચેવ, ઇસિમુગ્ગા ચ રોપિતા;

ધુવં ફલાનિ ધારેન્તિ, સોભયન્તા મમસ્સમં.

૪૫. ‘‘હરીતકા આમલકા, અમ્બજમ્બુવિભીતકા;

કોલા ભલ્લાતકા બિલ્લા, ફલિનો મમ અસ્સમે.

૪૬. ‘‘અવિદૂરે પોક્ખરણી, સુપતિત્થા મનોરમા;

મન્દાલકેહિ સઞ્છન્ના, પદુમુપ્પલકેહિ ચ.

૪૭. ‘‘ગબ્ભં ગણ્હન્તિ પદુમા, અઞ્ઞે પુપ્ફન્તિ કેસરી;

ઓપત્તકણ્ણિકા ચેવ, પુપ્ફન્તિ મમ અસ્સમે.

૪૮. ‘‘પાઠીના પાવુસા મચ્છા, બલજા મુઞ્જરોહિતા;

અચ્છોદકમ્હિ વિચરં, સોભયન્તિ મમસ્સમં.

૪૯. ‘‘નયિતા અમ્બગન્ધી ચ, અનુકૂલે ચ કેતકા;

દિબ્બગન્ધં સમ્પવન્તા, સોભયન્તિ મમસ્સમં.

૫૦. ‘‘મધુ ભિસમ્હા સવતિ, ખીરસપ્પિ મુળાલિભિ;

દિબ્બગન્ધં સમ્પવન્તા, સોભયન્તિ મમસ્સમં.

૫૧. ‘‘પુલિના સોભના તત્થ, આકિણ્ણા જલસેવિતા;

ઓપુપ્ફા પુપ્ફિતા સેન્તિ, સોભયન્તા મમસ્સમં.

૫૨. ‘‘જટાભારેન ભરિતા, અજિનુત્તરવાસના;

વાકચીરધરા સબ્બે, સોભયન્તિ મમસ્સમં.

૫૩. ‘‘યુગમત્તમપેક્ખન્તા, નિપકા સન્તવુત્તિનો;

કામભોગે અનપેક્ખા, વસન્તિ મમ અસ્સમે.

૫૪. ‘‘પરૂળ્હકચ્છનખલોમા, પઙ્કદન્તા રજસ્સિરા;

રજોજલ્લધરા સબ્બે, વસન્તિ મમ અસ્સમે.

૫૫. ‘‘અભિઞ્ઞાપારમિપ્પત્તા, અન્તલિક્ખચરા ચ તે;

ઉગ્ગચ્છન્તા નભં એતે, સોભયન્તિ મમસ્સમં.

૫૬. ‘‘તેહિ સિસ્સેહિ પરિવુતો, વસામિ વિપિને તદા;

રત્તિન્દિવં ન જાનામિ, સદા ઝાનસમપ્પિતો.

૫૭. ‘‘ભગવા તમ્હિ સમયે, અત્થદસ્સી મહામુનિ;

તમન્ધકારં નાસેન્તો, ઉપ્પજ્જિ લોકનાયકો.

૫૮. ‘‘અથ અઞ્ઞતરો સિસ્સો, આગચ્છિ મમ સન્તિકં;

મન્તે અજ્ઝેતુકામો સો, છળઙ્ગં નામ લક્ખણં.

૫૯. ‘‘બુદ્ધો લોકે સમુપ્પન્નો, અત્થદસ્સી મહામુનિ;

ચતુસચ્ચં પકાસેન્તો, દેસેતિ અમતં પદં.

૬૦. ‘‘તુટ્ઠહટ્ઠો પમુદિતો, ધમ્મન્તરગતાસયો;

અસ્સમા અભિનિક્ખમ્મ, ઇદં વચનમબ્રવિં.

૬૧. ‘‘‘બુદ્ધો લોકે સમુપ્પન્નો, દ્વત્તિંસવરલક્ખણો;

એથ સબ્બે ગમિસ્સામ, સમ્માસમ્બુદ્ધસન્તિકં’.

૬૨. ‘‘ઓવાદપટિકરા તે, સધમ્મે પારમિં ગતા;

સાધૂતિ સમ્પટિચ્છિંસુ, ઉત્તમત્થગવેસકા.

૬૩. ‘‘જટાભારભરિતા તે [જટાભારેન ભરિતા (ક.)], અજિનુત્તરવાસના;

ઉત્તમત્થં ગવેસન્તા, નિક્ખમિંસુ વના તદા.

૬૪. ‘‘ભગવા તમ્હિ સમયે, અત્થદસ્સી મહાયસો;

ચતુસચ્ચં પકાસેન્તો, દેસેતિ અમતં પદં.

૬૫. ‘‘સેતચ્છત્તં ગહેત્વાન, બુદ્ધસેટ્ઠસ્સ ધારયિં;

એકાહં ધારયિત્વાન, બુદ્ધસેટ્ઠં અવન્દહં.

૬૬. ‘‘અત્થદસ્સી તુ ભગવા, લોકજેટ્ઠો નરાસભો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૬૭. ‘‘‘યો મે છત્તં અધારેસિ, પસન્નો સેહિ પાણિભિ;

તમહં કિત્તયિસ્સામિ, સુણાથ મમ ભાસતો.

૬૮. ‘‘‘ઇમસ્સ જાયમાનસ્સ, દેવત્તે અથ માનુસે;

ધારેસ્સતિ સદા છત્તં, છત્તદાનસ્સિદં ફલં.

૬૯. ‘‘‘સત્તસત્તતિકપ્પાનિ, દેવલોકે રમિસ્સતિ;

સહસ્સક્ખત્તું રાજા ચ, ચક્કવત્તી ભવિસ્સતિ.

૭૦. ‘‘‘સત્તસત્તતિક્ખત્તુઞ્ચ, દેવરજ્જં કરિસ્સતિ;

પદેસરજ્જં વિપુલં, ગણનાતો અસઙ્ખિયં.

૭૧. ‘‘‘અટ્ઠારસે કપ્પસતે, ગોતમો સક્યપુઙ્ગવો;

તમન્ધકારં નાસેન્તો, ઉપ્પજ્જિસ્સતિ ચક્ખુમા.

૭૨. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સબ્બાસવે પરિઞ્ઞાય, વિહરિસ્સતિનાસવો’.

૭૩. ‘‘યતો અહં કમ્મમકં, છત્તં બુદ્ધસ્સ ધારયં;

એત્થન્તરે ન જાનામિ, સેતચ્છત્તં અધારિતં.

૭૪. ‘‘ઇદં પચ્છિમકં મય્હં, ચરિમો વત્તતે ભવો;

છત્તધારણમજ્જાપિ, વત્તતે નિચ્ચકાલિકં.

૭૫. ‘‘અહો મે સુકતં કમ્મં, અત્થદસ્સિસ્સ તાદિનો;

સબ્બાસવા પરિક્ખીણા, નત્થિ દાનિ પુનબ્ભવો.

૭૬. ‘‘કિલેસા ઝાપિતા મય્હં…પે… વિહરામિ અનાસવો.

૭૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૭૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા એકછત્તિયો થેરો ઇમા ગાથાયો અભાસિત્થાતિ;

એકછત્તિયત્થેરસ્સાપદાનં દુતિયં.