૩. તિણસૂલકછાદનિયત્થેરઅપદાનં

૭૯. ‘‘જાતિં જરઞ્ચ મરણં, પચ્ચવેક્ખિં અહં તદા;

એકકો અભિનિક્ખમ્મ, પબ્બજિં અનગારિયં.

૮૦. ‘‘ચરમાનોનુપુબ્બેન, ગઙ્ગાતીરં ઉપાગમિં;

તત્થદ્દસાસિં પથવિં, ગઙ્ગાતીરે સમુન્નતં.

૮૧. ‘‘અસ્સમં તત્થ માપેત્વા, વસામિ અસ્સમે અહં;

સુકતો ચઙ્કમો મય્હં, નાનાદિજગણાયુતો.

૮૨. ‘‘મમુપેન્તિ ચ વિસ્સત્થા, કૂજન્તિ ચ મનોહરં;

રમમાનો સહ તેહિ, વસામિ અસ્સમે અહં.

૮૩. ‘‘મમ અસ્સમસામન્તા, મિગરાજા ચતુક્કમો;

આસયા અભિનિક્ખમ્મ, ગજ્જિ સો અસની વિય.

૮૪. ‘‘નદિતે મિગરાજે ચ, હાસો મે ઉદપજ્જથ;

મિગરાજં ગવેસન્તો, અદ્દસં લોકનાયકં.

૮૫. ‘‘દિસ્વાનાહં દેવદેવં, તિસ્સં લોકગ્ગનાયકં;

હટ્ઠો હટ્ઠેન ચિત્તેન, પૂજયિં નાગકેસરં.

૮૬. ‘‘ઉગ્ગચ્છન્તંવ સૂરિયં, સાલરાજંવ પુપ્ફિતં;

ઓસધિંવ વિરોચન્તં, સન્થવિં લોકનાયકં.

૮૭. ‘‘‘તવ ઞાણેન સબ્બઞ્ઞુ, મોચેસિમં સદેવકં;

તવં આરાધયિત્વાન, જાતિયા પરિમુચ્ચરે.

૮૮. ‘‘‘અદસ્સનેન સબ્બઞ્ઞુ, બુદ્ધાનં સબ્બદસ્સિનં;

પતન્તિવીચિનિરયં, રાગદોસેહિ ઓફુટા [ઓત્થટા (સ્યા.)].

૮૯. ‘‘‘તવ દસ્સનમાગમ્મ, સબ્બઞ્ઞુ લોકનાયક;

પમુચ્ચન્તિ ભવા સબ્બા, ફુસન્તિ અમતં પદં.

૯૦. ‘‘‘યદા બુદ્ધા ચક્ખુમન્તો, ઉપ્પજ્જન્તિ પભઙ્કરા;

કિલેસે ઝાપયિત્વાન, આલોકં દસ્સયન્તિ તે’.

૯૧. ‘‘કિત્તયિત્વાન સમ્બુદ્ધં, તિસ્સં લોકગ્ગનાયકં;

હટ્ઠો હટ્ઠેન ચિત્તેન, તિણસૂલં અપૂજયિં.

૯૨. ‘‘મમ સઙ્કપ્પમઞ્ઞાય, તિસ્સો લોકગ્ગનાયકો;

સકાસને નિસીદિત્વા, ઇમા ગાથા અભાસથ.

૯૩. ‘‘‘યો મં પુપ્ફેહિ છાદેસિ, પસન્નો સેહિ પાણિભિ;

તમહં કિત્તયિસ્સામિ, સુણાથ મમ ભાસતો.

૯૪. ‘‘‘પઞ્ચવીસતિક્ખત્તું સો, દેવરજ્જં કરિસ્સતિ;

પઞ્ચસત્તતિક્ખત્તુઞ્ચ, ચક્કવત્તી ભવિસ્સતિ.

૯૫. ‘‘‘પદેસરજ્જં વિપુલં, ગણનાતો અસઙ્ખિયં;

તસ્સ કમ્મનિસ્સન્દેન [કમ્મસ્સ નિસ્સન્દો (સી. સ્યા. પી.)], પુપ્ફાનં પૂજનાય ચ [સો (સ્યા. પી.)].

૯૬. ‘‘‘સીસંન્હાતો ચયં પોસો, પુપ્ફમાકઙ્ખતે યદિ [સાયં પાતો ચયં પોસો, પુપ્ફેહિ મં અછાદયિ (સ્યા.)];

પુઞ્ઞકમ્મેન સંયુત્તં [સંયુત્તો (સી. સ્યા. પી.)], પુરતો પાતુભવિસ્સતિ.

૯૭. ‘‘‘યં યં ઇચ્છતિ કામેહિ, તં તં પાતુભવિસ્સતિ;

સઙ્કપ્પં પરિપૂરેત્વા, નિબ્બાયિસ્સતિનાસવો’.

અટ્ઠારસમં ભાણવારં.

૯૮. ‘‘કિલેસે ઝાપયિત્વાન, સમ્પજાનો પતિસ્સતો;

એકાસને નિસીદિત્વા, અરહત્તમપાપુણિં.

૯૯. ‘‘ચઙ્કમન્તો નિપજ્જન્તો, નિસિન્નો ઉદ વા ઠિતો;

બુદ્ધસેટ્ઠં સરિત્વાન, વિહરામિ અહં સદા.

૧૦૦. ‘‘ચીવરે પિણ્ડપાતે ચ, પચ્ચયે સયનાસને;

તત્થ મે ઊનતા નત્થિ, બુદ્ધપૂજાયિદં ફલં.

૧૦૧. ‘‘સો દાનિ પત્તો અમતં, સન્તં પદમનુત્તરં;

સબ્બાસવે પરિઞ્ઞાય, વિહરામિ અનાસવો.

૧૦૨. ‘‘દ્વેનવુતે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૦૩. ‘‘કિલેસા ઝાપિતા મય્હં…પે… વિહરામિ અનાસવો.

૧૦૪. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૦૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિણસૂલકછાદનિયો [તિણસૂલિકછાદનિયો (ક.)] થેરો ઇમા ગાથાયો અભાસિત્થાતિ.

તિણસૂલકછાદનિયત્થેરસ્સાપદાનં તતિયં.