૧. ભદ્દાલિત્થેરઅપદાનં

૧. ‘‘સુમેધો નામ સમ્બુદ્ધો, અગ્ગો કારુણિકો મુનિ;

વિવેકકામો લોકગ્ગો, હિમવન્તમુપાગમિ.

૨. ‘‘અજ્ઝોગાહેત્વા હિમવં, સુમેધો લોકનાયકો;

પલ્લઙ્કં આભુજિત્વાન, નિસીદિ પુરિસુત્તમો.

૩. ‘‘સમાધિં સો સમાપન્નો, સુમેધો લોકનાયકો;

સત્તરત્તિન્દિવં બુદ્ધો, નિસીદિ પુરિસુત્તમો.

૪. ‘‘ખારિભારં [ખારિકાજં (સી.)] ગહેત્વાન, વનમજ્ઝોગહિં અહં;

તત્થદ્દસાસિં સમ્બુદ્ધં, ઓઘતિણ્ણમનાસવં.

૫. ‘‘સમ્મજ્જનિં ગહેત્વાન, સમ્મજ્જિત્વાન અસ્સમં;

ચતુદણ્ડે ઠપેત્વાન, અકાસિં મણ્ડપં તદા.

૬. ‘‘સાલપુપ્ફં આહરિત્વા, મણ્ડપં છાદયિં અહં;

પસન્નચિત્તો સુમનો, અભિવન્દિં તથાગતં.

૭. ‘‘યં વદન્તિ સુમેધોતિ, ભૂરિપઞ્ઞં સુમેધસં;

ભિક્ખુસઙ્ઘે નિસીદિત્વા, ઇમા ગાથા અભાસથ.

૮. ‘‘‘બુદ્ધસ્સ ગિરમઞ્ઞાય, સબ્બે દેવા સમાગમું;

અસંસયં બુદ્ધસેટ્ઠો, ધમ્મં દેસેતિ ચક્ખુમા.

૯. ‘‘‘સુમેધો નામ સમ્બુદ્ધો, આહુતીનં પટિગ્ગહો;

દેવસઙ્ઘે નિસીદિત્વા, ઇમા ગાથા અભાસથ.

૧૦. ‘‘‘યો મે સત્તાહં મણ્ડપં, ધારયી સાલછાદિતં;

તમહં કિત્તયિસ્સામિ, સુણાથ મમ ભાસતો.

૧૧. ‘‘‘દેવભૂતો મનુસ્સો વા, હેમવણ્ણો ભવિસ્સતિ;

પહૂતભોગો હુત્વાન, કામભોગી ભવિસ્સતિ.

૧૨. ‘‘‘સટ્ઠિ નાગસહસ્સાનિ, સબ્બાલઙ્કારભૂસિતા;

સુવણ્ણકચ્છા માતઙ્ગા, હેમકપ્પનવાસસા.

૧૩. ‘‘‘આરૂળ્હા ગામણીયેહિ, તોમરઙ્કુસપાણિભિ;

સાયં પાતો [સાયપાતો (પી.)] ઉપટ્ઠાનં, આગમિસ્સન્તિમં નરં;

તેહિ નાગેહિ પરિવુતો, રમિસ્સતિ અયં નરો.

૧૪. ‘‘‘સટ્ઠિ અસ્સસહસ્સાનિ, સબ્બાલઙ્કારભૂસિતા;

આજાનીયાવ જાતિયા, સિન્ધવા સીઘવાહિનો.

૧૫. ‘‘‘આરૂળ્હા ગામણીયેહિ, ઇલ્લિયાચાપધારિભિ;

પરિવારેસ્સન્તિમં નિચ્ચં, બુદ્ધપૂજાયિદં ફલં.

૧૬. ‘‘‘સટ્ઠિ રથસહસ્સાનિ, સબ્બાલઙ્કારભૂસિતા;

દીપા અથોપિ વેયગ્ઘા, સન્નદ્ધા ઉસ્સિતદ્ધજા.

૧૭. ‘‘‘આરૂળ્હા ગામણીયેહિ, ચાપહત્થેહિ વમ્મિભિ;

પરિવારેસ્સન્તિમં નિચ્ચં, બુદ્ધપૂજાયિદં ફલં.

૧૮. ‘‘‘સટ્ઠિ ગામસહસ્સાનિ, પરિપુણ્ણાનિ સબ્બસો;

પહૂતધનધઞ્ઞાનિ, સુસમિદ્ધાનિ સબ્બસો;

સદા પાતુભવિસ્સન્તિ, બુદ્ધપૂજાયિદં ફલં.

૧૯. ‘‘‘હત્થી અસ્સા રથા પત્તી, સેના ચ ચતુરઙ્ગિની;

પરિવારેસ્સન્તિમં નિચ્ચં, બુદ્ધપૂજાયિદં ફલં.

૨૦. ‘‘‘અટ્ઠારસે કપ્પસતે, દેવલોકે રમિસ્સતિ;

સહસ્સક્ખત્તું રાજા ચ, ચક્કવત્તી ભવિસ્સતિ.

૨૧. ‘‘‘સતાનં તીણિક્ખત્તુઞ્ચ, દેવરજ્જં કરિસ્સતિ;

પદેસરજ્જં વિપુલં, ગણનાતો અસઙ્ખિયં.

૨૨. ‘‘‘તિંસકપ્પસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૨૩. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સબ્બાસવે પરિઞ્ઞાય, વિહરિસ્સતિનાસવો’.

૨૪. ‘‘તિંસકપ્પસહસ્સમ્હિ, અદ્દસં લોકનાયકં;

એત્થન્તરમુપાદાય, ગવેસિં અમતં પદં.

૨૫. ‘‘લાભા મય્હં સુલદ્ધં મે, યમહઞ્ઞાસિ સાસનં;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૨૬. ‘‘નમો તે પુરિસાજઞ્ઞ, નમો તે પુરિસુત્તમ;

તવ ઞાણં પકિત્તેત્વા, પત્તોમ્હિ અચલં પદં.

૨૭. ‘‘યં યં યોનુપપજ્જામિ, દેવત્તં અથ માનુસં;

સબ્બત્થ સુખિતો હોમિ, ફલં મે ઞાણકિત્તને.

૨૮. ‘‘ઇદં પચ્છિમકં મય્હં, ચરિમો વત્તતે ભવો;

નાગોવ બન્ધનં છેત્વા, વિહરામિ અનાસવો.

૨૯. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૩૦. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૩૧. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા ભદ્દાલિત્થેરો ઇમા ગાથાયો અભાસિત્થાતિ.

ભદ્દાલિત્થેરસ્સાપદાનં પઠમં.