૯. જતુકણ્ણિત્થેરઅપદાનં

૨૭૬. ‘‘નગરે હંસવતિયા, સેટ્ઠિપુત્તો અહોસહં;

સમપ્પિતો કામગુણે, પરિચારેમહં તદા.

૨૭૭. ‘‘તતો [તયો (સી.)] પાસાદમારુય્હ, મહાભોગે વલઞ્જકો [ઉબ્બિદ્ધા ગેહલુઞ્જકા (ક.), ઉબ્બિદ્ધાગેહલઞ્છકા (સી.)];

તત્થ નચ્ચેહિ ગીતેહિ, પરિચારેમહં તદા.

૨૭૮. ‘‘તૂરિયા આહતા મય્હં, સમ્મતાળસમાહિતા;

નચ્ચન્તા [રઞ્જન્તી (સ્યા.), રજ્જન્તા (ક.)] ઇત્થિયો સબ્બા, હરન્તિયેવ મે મનો.

૨૭૯. ‘‘ચેલાપિકા [ચેલાવકા (સ્યા.), વેલામિકા (પી.)] લામણિકા [વામનિકા (સ્યા. પી.)], કુઞ્જવાસી તિમજ્ઝિકા [કુઞ્જવા સીહિમજ્ઝિતા (સ્યા.), કુજ્જા વા સીહિમજ્ઝિકા (પી.)];

લઙ્ઘિકા સોકજ્ઝાયી ચ, પરિવારેન્તિ મં સદા.

૨૮૦. ‘‘વેતાળિનો કુમ્ભથૂની, નટા ચ નચ્ચકા બહૂ;

નટકા નાટકા ચેવ, પરિવારેન્તિ મં સદા.

૨૮૧. ‘‘કપ્પકા ન્હાપકા સૂદા, માલાકારા સુપાસકા [સુમાપકા (સી. સ્યા.)];

જલ્લા મલ્લા ચ તે સબ્બે, પરિવારેન્તિ મં સદા.

૨૮૨. ‘‘એતેસુ કીળમાનેસુ, સિક્ખિતે કતુપાસને;

રત્તિન્દિવં ન જાનામિ, ઇન્દોવ તિદસઙ્ગણે.

૨૮૩. ‘‘અદ્ધિકા પથિકા સબ્બે, યાચકા વરકા બહૂ;

ઉપગચ્છન્તિ તે નિચ્ચં, ભિક્ખયન્તા મમં ઘરં.

૨૮૪. ‘‘સમણા બ્રાહ્મણા ચેવ, પુઞ્ઞક્ખેત્તા અનુત્તરા;

વડ્ઢયન્તા મમં પુઞ્ઞં, આગચ્છન્તિ મમં ઘરં.

૨૮૫. ‘‘પટગા [પટકા (સી. સ્યા.), પદકા (પી.)] લટુકા [લટકા (સી.)] સબ્બે, નિગણ્ઠા પુપ્ફસાટકા;

તેદણ્ડિકા એકસિખા, આગચ્છન્તિ મમં ઘરં.

૨૮૬. ‘‘આજીવકા વિલુત્તાવી, ગોધમ્મા દેવધમ્મિકા;

રજોજલ્લધરા એતે, આગચ્છન્તિ મમં ઘરં.

૨૮૭. ‘‘પરિત્તકા સન્તિપત્તા [પરિવત્તકા સિદ્ધિપત્તા (સી. સ્યા. પી.)], કોધપુગ્ગનિકા [કોણ્ડપુગ્ગણિકા (સી.), કોણ્ડપુગ્ગલિકા (પી.)] બહૂ;

તપસ્સી વનચારી ચ, આગચ્છન્તિ મમં ઘરં.

૨૮૮. ‘‘ઓડ્ડકા દમિળા ચેવ, સાકુળા મલવાળકા [મલયાલકા (સી. સ્યા. પી.)];

સવરા યોનકા ચેવ, આગચ્છન્તિ મમં ઘરં.

૨૮૯. ‘‘અન્ધકા મુણ્ડકા સબ્બે, કોટલા હનુવિન્દકા [કોલકા સાનુવિન્દકા (સી. પી.)];

આરાવચીનરટ્ઠા ચ, આગચ્છન્તિ મમં ઘરં.

૨૯૦. ‘‘અલસન્દકા [અલસન્તા (ક.)] પલ્લવકા, ધમ્મરા નિગ્ગમાનુસા [બબ્બરા ભગ્ગકારુસા (સી.)];

ગેહિકા [રોહિતા (સી.), બાહિકા (પી.)] ચેતપુત્તા ચ, આગચ્છન્તિ મમં ઘરં.

૨૯૧. ‘‘માધુરકા કોસલકા, કલિઙ્ગા [કાસિકા (સી.)] હત્થિપોરિકા;

ઇસિણ્ડા મક્કલા ચેવ, આગચ્છન્તિ મમં ઘરં.

૨૯૨. ‘‘ચેલાવકા આરબ્ભા [અરમ્મા (સી. પી.)] ચ, ઓઘુળ્હા [ઓક્કલા (સી.)] મેઘલા બહૂ;

ખુદ્દકા સુદ્દકા ચેવ, આગચ્છન્તિ મમં ઘરં.

૨૯૩. ‘‘રોહણા સિન્ધવા ચેવ, ચિતકા એકકણ્ણિકા;

સુરટ્ઠા અપરન્તા ચ, આગચ્છન્તિ મમં ઘરં.

૨૯૪. ‘‘સુપ્પારકા કુમારા [કિકુમારા (સી. પી.)] ચ, મલ્લસોવણ્ણભૂમિકા [મલયા સોણ્ણભૂમિકા (સી. સ્યા. પી.)];

વજ્જીતઙ્ગા [વજ્જી તારા (સી.), વજ્જીહારા (સ્યા. પી.)] ચ તે સબ્બે, આગચ્છન્તિ મમં ઘરં.

૨૯૫. ‘‘નળકારા પેસકારા, ચમ્મકારા ચ તચ્છકા;

કમ્મારા કુમ્ભકારા ચ, આગચ્છન્તિ મમં ઘરં.

૨૯૬. ‘‘મણિકારા લોહકારા, સોણ્ણકારા ચ દુસ્સિકા;

તિપુકારા ચ તે સબ્બે, આગચ્છન્તિ મમં ઘરં.

૨૯૭. ‘‘ઉસુકારા ભમકારા, પેસકારા ચ ગન્ધિકા;

રજકા તુન્નવાયા ચ, આગચ્છન્તિ મમં ઘરં.

૨૯૮. ‘‘તેલિકા કટ્ઠહારા ચ, ઉદહારા ચ પેસ્સિકા;

સૂપિકા સૂપરક્ખા ચ, આગચ્છન્તિ મમં ઘરં.

૨૯૯. ‘‘દોવારિકા અનીકટ્ઠા, બન્ધિકા [વન્દિકા (સી.), ગન્થિકા (સ્યા.), સન્દિકા (પી.)] પુપ્ફછડ્ડકા;

હત્થારુહા હત્થિપાલા, આગચ્છન્તિ મમં ઘરં.

૩૦૦. ‘‘આનન્દસ્સ મહારઞ્ઞો [આનન્દસ્સ નામ રઞ્ઞો (સ્યા.), અરિન્દમનામ રઞ્ઞો (પી.)], મમત્થસ્સ [પમત્તસ્સ (સી. પી.), સમગ્ગસ્સ (સ્યા.)] અદાસહં;

સત્તવણ્ણેન રતનેન, ઊનત્થં [ઊનત્તં (સી. સ્યા. પી.)] પૂરયામહં.

૩૦૧. ‘‘યે મયા કિત્તિતા સબ્બે, નાનાવણ્ણા બહૂ જના;

તેસાહં ચિત્તમઞ્ઞાય, તપ્પયિં રતનેનહં.

૩૦૨. ‘‘વગ્ગૂસુ ભાસમાનાસુ, વજ્જમાનાસુ ભેરિસુ;

સઙ્ખેસુ ધમયન્તેસુ, સકગેહે રમામહં.

૩૦૩. ‘‘ભગવા તમ્હિ સમયે, પદુમુત્તરનાયકો;

વસીસતસહસ્સેહિ, પરિક્ખીણાસવેહિ સો.

૩૦૪. ‘‘ભિક્ખૂહિ સહિતો વીથિં, પટિપજ્જિત્થ ચક્ખુમા;

ઓભાસેન્તો દિસા સબ્બા, દીપરુક્ખોવ જોતતિ.

૩૦૫. ‘‘વજ્જન્તિ ભેરિયો સબ્બા, ગચ્છન્તે લોકનાયકે;

પભા નિદ્ધાવતે તસ્સ, સતરંસીવ ઉગ્ગતો.

૩૦૬. ‘‘કવાટન્તરિકાયાપિ, પવિટ્ઠેન ચ રસ્મિના;

અન્તોઘરેસુ વિપુલો, આલોકો આસિ તાવદે.

૩૦૭. ‘‘પભં દિસ્વાન બુદ્ધસ્સ, પારિસજ્જે અવોચહં;

નિસ્સંસયં બુદ્ધસેટ્ઠો, ઇમં વીથિમુપાગતો.

૩૦૮. ‘‘ખિપ્પં ઓરુય્હ પાસાદા, અગમિં અન્તરાપણં;

સમ્બુદ્ધં અભિવાદેત્વા, ઇદં વચનમબ્રવિં.

૩૦૯. ‘‘‘અનુકમ્પતુ મે બુદ્ધો, જલજુત્તમનાયકો;

વસીસતસહસ્સેહિ, અધિવાસેસિ સો મુનિ’.

૩૧૦. ‘‘નિમન્તેત્વાન સમ્બુદ્ધં, અભિનેસિં સકં ઘરં;

તત્થ અન્નેન પાનેન, સન્તપ્પેસિં મહામુનિં.

૩૧૧. ‘‘ભુત્તાવિં કાલમઞ્ઞાય, બુદ્ધસેટ્ઠસ્સ તાદિનો;

સતઙ્ગિકેન તૂરિયેન, બુદ્ધસેટ્ઠં ઉપટ્ઠહિં.

૩૧૨. ‘‘પદુમુત્તરો લોકવિદૂ, આહુતીનં પટિગ્ગહો;

અન્તોઘરે નિસીદિત્વા, ઇમા ગાથા અભાસથ.

૩૧૩. ‘‘‘યો મં તૂરિયેહુપટ્ઠાસિ, અન્નપાનઞ્ચદાસિ મે;

તમહં કિત્તયિસ્સામિ, સુણાથ મમ ભાસતો.

૩૧૪. ‘‘‘પહૂતભક્ખો હુત્વાન, સહિરઞ્ઞો સભોજનો;

ચતુદીપે એકરજ્જં, કારયિસ્સતિયં નરો.

૩૧૫. ‘‘‘પઞ્ચસીલે સમાદાય, દસકમ્મપથે તતો;

સમાદાય પવત્તેન્તો, પરિસં સિક્ખાપયિસ્સતિ.

૩૧૬. ‘‘‘તૂરિયસતસહસ્સાનિ, ભેરિયો સમલઙ્કતા;

વજ્જયિસ્સન્તિમં નિચ્ચં, ઉપટ્ઠાનસ્સિદં ફલં.

૩૧૭. ‘‘‘તિંસકપ્પસહસ્સાનિ, દેવલોકે રમિસ્સતિ;

ચતુસટ્ઠિક્ખત્તું દેવિન્દો, દેવરજ્જં કરિસ્સતિ.

૩૧૮. ‘‘‘ચતુસટ્ઠિક્ખત્તું રાજા, ચક્કવત્તી ભવિસ્સતિ;

પદેસરજ્જં વિપુલં, ગણનાતો અસઙ્ખિયં.

૩૧૯. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૩૨૦. ‘‘‘ઉપપજ્જતિ યં યોનિં, દેવત્તં અથ માનુસં;

અનૂનભોગો હુત્વાન, મનુસ્સત્તં ગમિસ્સતિ.

૩૨૧. ‘‘‘અજ્ઝાયકો ભવિત્વાન, તિણ્ણં વેદાન પારગૂ;

ઉત્તમત્થં ગવેસન્તો, ચરિસ્સતિ મહિં ઇમં.

૩૨૨. ‘‘‘સો પચ્છા પબ્બજિત્વાન, સુક્કમૂલેન ચોદિતો;

ગોતમસ્સ ભગવતો, સાસનેભિરમિસ્સતિ.

૩૨૩. ‘‘‘આરાધયિત્વાન સમ્બુદ્ધં, ગોતમં સક્યપુઙ્ગવં;

કિલેસે ઝાપયિત્વાન, અરહાયં ભવિસ્સતિ’.

૩૨૪. ‘‘વિપિને બ્યગ્ઘરાજાવ, મિગરાજાવ કેસરી;

અભીતો વિહરામજ્જ, સક્યપુત્તસ્સ સાસને.

૩૨૫. ‘‘દેવલોકે મનુસ્સે વા, દલિદ્દે દુગ્ગતિમ્હિ વા;

નિબ્બત્તિં મે ન પસ્સામિ, ઉપટ્ઠાનસ્સિદં ફલં.

૩૨૬. ‘‘વિવેકમનુયુત્તોમ્હિ, ઉપસન્તો નિરૂપધિ;

નાગોવ બન્ધનં છેત્વા, વિહરામિ અનાસવો.

૩૨૭. ‘‘કિલેસા ઝાપિતા મય્હં…પે… વિહરામિ અનાસવો.

૩૨૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા જતુકણ્ણિત્થેરો ઇમા ગાથાયો અભાસિત્થાતિ.

જતુકણ્ણિત્થેરસ્સાપદાનં નવમં.