૧૦. ઉદેનત્થેરઅપદાનં

૩૩૦. ‘‘હિમવન્તસ્સાવિદૂરે, પદુમો નામ પબ્બતો;

અસ્સમો સુકતો મય્હં, પણ્ણસાલા સુમાપિતા.

૩૩૧. ‘‘નદિયો સન્દરે તત્થ, સુપતિત્થા મનોરમા;

અચ્છોદકા સીતજલા, સન્દરે નદિયો સદા.

૩૩૨. ‘‘પાઠીના પાવુસા મચ્છા, બલજા મુઞ્જરોહિતા;

સોભેન્તા નદિયો એતે, વસન્તિ નદિયા સદા.

૩૩૩. ‘‘અમ્બજમ્બૂહિ સઞ્છન્ના, કરેરિતિલકા તથા;

ઉદ્દાલકા પાટલિયો, સોભેન્તિ મમ અસ્સમં.

૩૩૪. ‘‘અઙ્કોલકા બિમ્બિજાલા, માયાકારી ચ પુપ્ફિતા;

ગન્ધેન ઉપવાયન્તા, સોભેન્તિ મમ અસ્સમં.

૩૩૫. ‘‘અતિમુત્તા સત્તલિકા, નાગા સાલા ચ પુપ્ફિતા;

દિબ્બગન્ધં સમ્પવન્તા, સોભેન્તિ મમ અસ્સમં.

૩૩૬. ‘‘કોસમ્બા સળલા નીપા, અટ્ઠઙ્ગાપિ ચ પુપ્ફિતા [અટ્ઠઙ્ગા ચ સુપુપ્ફિતા (સી.), કટ્ઠઙ્ગા ચ સુપુપ્ફિતા (પી.)];

દિબ્બગન્ધં સમ્પવન્તા, સોભેન્તિ મમ અસ્સમં.

૩૩૭. ‘‘હરીતકા આમલકા, અમ્બજમ્બુવિભીતકા;

કોલા ભલ્લાતકા બિલ્લા, ફલાનિ બહુ અસ્સમે.

૩૩૮. ‘‘કલમ્બા કન્દલી તત્થ, પુપ્ફન્તિ મમ અસ્સમે;

દિબ્બગન્ધં [દિબ્બગન્ધા (સી. સ્યા. પી.) એવં પરત્થપિ] સમ્પવન્તા, સોભેન્તિ મમ અસ્સમં.

૩૩૯. ‘‘અસોકપિણ્ડિવારી ચ [અસોકપિણ્ડી ચ વરી (સી. સ્યા.), અસોકપિણ્ડી ચ વારી (પી.)], નિમ્બરુક્ખા ચ પુપ્ફિતા;

દિબ્બગન્ધં સમ્પવન્તા, સોભેન્તિ મમ અસ્સમં.

૩૪૦. ‘‘પુન્નાગા ગિરિપુન્નાગા, તિમિરા તત્થ પુપ્ફિતા;

દિબ્બગન્ધં સમ્પવન્તા, સોભેન્તિ મમ અસ્સમં.

૩૪૧. ‘‘નિગ્ગુણ્ડી સિરિનિગ્ગુણ્ડી, ચમ્પરુક્ખેત્થ પુપ્ફિતા;

દિબ્બગન્ધં સમ્પવન્તા, સોભેન્તિ મમ અસ્સમં.

૩૪૨. ‘‘અવિદૂરે પોક્ખરણી, ચક્કવાકૂપકૂજિતા;

મન્દાલકેહિ સઞ્છન્ના, પદુમુપ્પલકેહિ ચ.

૩૪૩. ‘‘અચ્છોદકા સીતજલા, સુપતિત્થા મનોરમા;

અચ્છા ફલિકસમાના, સોભેન્તિ મમ અસ્સમં.

૩૪૪. ‘‘પદુમા પુપ્ફરે તત્થ, પુણ્ડરીકા ચ ઉપ્પલા;

મન્દાલકેહિ સઞ્છન્ના, સોભેન્તિ મમ અસ્સમં.

૩૪૫. ‘‘પાઠીના પાવુસા મચ્છા, બલજા મુઞ્જરોહિતા;

વિચરન્તાવ તે તત્થ, સોભેન્તિ મમ અસ્સમં.

૩૪૬. ‘‘કુમ્ભીલા સુસુમારા ચ, કચ્છપા ચ ગહા બહૂ;

ઓગહા અજગરા ચ, સોભેન્તિ મમ અસ્સમં.

૩૪૭. ‘‘પારેવતા રવિહંસા, ચક્કવાકા નદીચરા;

દિન્દિભા સાળિકા ચેત્થ, સોભેન્તિ મમ અસ્સમં.

૩૪૮. ‘‘નયિતા અમ્બગન્ધી ચ, કેતકા તત્થ પુપ્ફિતા;

દિબ્બગન્ધં સમ્પવન્તા, સોભેન્તિ મમ અસ્સમં.

૩૪૯. ‘‘સીહા બ્યગ્ઘા ચ દીપી ચ, અચ્છકોકતરચ્છકા;

અનુસઞ્ચરન્તા પવને, સોભેન્તિ મમ અસ્સમં.

૩૫૦. ‘‘જટાભારેન ભરિતા, અજિનુત્તરવાસના;

અનુસઞ્ચરન્તા પવને, સોભેન્તિ મમ અસ્સમં.

૩૫૧. ‘‘અજિનાનિધરા એતે, નિપકા સન્તવુત્તિનો;

અપ્પાહારાવ તે સબ્બે, સોભેન્તિ મમ અસ્સમં.

૩૫૨. ‘‘ખારિભારં ગહેત્વાન, અજ્ઝોગય્હ વનં તદા;

મૂલફલાનિ ભુઞ્જન્તા, વસન્તિ અસ્સમે તદા.

૩૫૩. ‘‘ન તે દારું આહરન્તિ, ઉદકં પાદધોવનં;

સબ્બેસં આનુભાવેન, સયમેવાહરીયતિ.

૩૫૪. ‘‘ચુલ્લાસીતિસહસ્સાનિ, ઇસયેત્થ સમાગતા;

સબ્બેવ ઝાયિનો એતે, ઉત્તમત્થગવેસકા.

૩૫૫. ‘‘તપસ્સિનો બ્રહ્મચારી, ચોદેન્તા અપ્પનાવ તે;

અમ્બરાવચરા સબ્બે, વસન્તિ અસ્સમે તદા.

૩૫૬. ‘‘પઞ્ચાહં સન્નિપતન્તિ, એકગ્ગા સન્તવુત્તિનો;

અઞ્ઞોઞ્ઞં અભિવાદેત્વા, પક્કમન્તિ દિસામુખા.

૩૫૭. ‘‘પદુમુત્તરો નામ જિનો, સબ્બધમ્માન પારગૂ;

તમન્ધકારં વિધમં, ઉપ્પજ્જિ તાવદે જિનો.

૩૫૮. ‘‘મમ અસ્સમસામન્તા, યક્ખો આસિ મહિદ્ધિકો;

સો મે સંસિત્થ સમ્બુદ્ધં, જલજુત્તમનાયકં.

૩૫૯. ‘‘એસ બુદ્ધો સમુપ્પન્નો, પદુમુત્તરો મહામુનિ;

ખિપ્પં ગન્ત્વાન સમ્બુદ્ધં, પયિરૂપાસ મારિસ.

૩૬૦. ‘‘યક્ખસ્સ વચનં સુત્વા, વિપ્પસન્નેન ચેતસા;

અસ્સમં સંસામેત્વાન, નિક્ખમિં વિપિના તદા.

૩૬૧. ‘‘ચેળેવ ડય્હમાનમ્હિ, નિક્ખમિત્વાન અસ્સમા;

એકરત્તિં નિવાસેત્વા [નિવસિત્વા (સી.), નિવાસેન (?)], ઉપગચ્છિં વિનાયકં.

૩૬૨. ‘‘પદુમુત્તરો લોકવિદૂ, આહુતીનં પટિગ્ગહો;

ચતુસચ્ચં પકાસેન્તો, દેસેસિ અમતં પદં.

૩૬૩. ‘‘સુફુલ્લં પદુમં ગય્હ, ઉપગન્ત્વા મહેસિનો;

પસન્નચિત્તો સુમનો, બુદ્ધસ્સ અભિરોપયિં.

૩૬૪. ‘‘પૂજયિત્વાન સમ્બુદ્ધં, જલજુત્તમનાયકં;

એકંસં અજિનં કત્વા, સન્થવિં લોકનાયકં.

૩૬૫. ‘‘યેન ઞાણેન સમ્બુદ્ધો, વસતીહ અનાસવો;

તં ઞાણં કિત્તયિસ્સામિ, સુણાથ મમ ભાસતો.

૩૬૬. ‘‘‘સંસારસોતં છિન્દિત્વા, તારેસિ સબ્બપાણિનં;

તવ ધમ્મં સુણિત્વાન, તણ્હાસોતં તરન્તિ તે.

૩૬૭. ‘‘‘તુવં સત્થા ચ કેતુ ચ, ધજો યૂપો ચ પાણિનં;

પરાયણો પતિટ્ઠા ચ, દીપો ચ દ્વિપદુત્તમ [દિપદુત્તમ (સી. સ્યા. પી.)].

૩૬૮. ‘‘‘યાવતા ગણિનો લોકે, સત્થવાહા પવુચ્ચરે;

તુવં અગ્ગોસિ સબ્બઞ્ઞુ, તવ અન્તોગધાવ તે.

૩૬૯. ‘‘‘તવ ઞાણેન સબ્બઞ્ઞુ, તારેસિ જનતં બહું;

તવ દસ્સનમાગમ્મ, દુક્ખસ્સન્તં કરિસ્સરે.

૩૭૦. ‘‘‘યે કેચિમે ગન્ધજાતા, લોકે વાયન્તિ ચક્ખુમ;

તવ ગન્ધસમો નત્થિ, પુઞ્ઞક્ખેત્તે મહામુને’.

૩૭૧. ‘‘‘તિરચ્છાનયોનિં નિરયં, પરિમોચેસિ [પરિમોચેહિ (સ્યા. ક.)] ચક્ખુમ;

અસઙ્ખતં પદં સન્તં, દેસેસિ [દેસેહિ (સ્યા. ક.)] ત્વં મહામુને’.

૩૭૨. ‘‘પદુમુત્તરો લોકવિદૂ, આહુતીનં પટિગ્ગહો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૩૭૩. ‘‘‘યો મે ઞાણં અપૂજેસિ, પસન્નો સેહિ પાણિભિ;

તમહં કિત્તયિસ્સામિ, સુણાથ મમ ભાસતો.

૩૭૪. ‘‘‘તિંસકપ્પસહસ્સાનિ, દેવલોકે રમિસ્સતિ;

સહસ્સક્ખત્તું રાજા ચ, ચક્કવત્તી ભવિસ્સતિ’.

૩૭૫. ‘‘સુલદ્ધલાભં લદ્ધોમ્હિ, તોસયિત્વાન સુબ્બતં;

સબ્બાસવે પરિઞ્ઞાય, વિહરામિ અનાસવો.

૩૭૬. ‘‘કિલેસા ઝાપિતા મય્હં…પે… વિહરામિ અનાસવો.

૩૭૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૭૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉદેનો થેરો ઇમા ગાથાયો અભાસિત્થાતિ.

ઉદેનત્થેરસ્સાપદાનં દસમં.

મેત્તેય્યવગ્ગો એકચત્તાલીસમો.