૮. તોદેય્યત્થેરઅપદાનં

૨૨૪. ‘‘રાજા અજિતઞ્જયો [રાજાસિ વિજયો (સી. અટ્ઠ.), રાજા વિજિતજયો (સ્યા.)] નામ, કેતુમતીપુરુત્તમે;

સૂરો વિક્કમસમ્પન્નો, પુરમજ્ઝાવસી તદા.

૨૨૫. ‘‘તસ્સ રઞ્ઞો પમત્તસ્સ, અટવિયો સમુટ્ઠહું;

ઓતારા [ઉત્તરા (સ્યા.), ઓચરા (પી.)] તુણ્ડિકા ચેવ, રટ્ઠં વિદ્ધંસયું તદા.

૨૨૬. ‘‘પચ્ચન્તે કુપિતે ખિપ્પં, સન્નિપાતેસિરિન્દમો;

ભટે ચેવ બલત્થે ચ, અરિં નિગ્ગાહયિ તદા.

૨૨૭. ‘‘હત્થારોહા અનીકટ્ઠા, સૂરા ચ ચમ્મયોધિનો;

ધનુગ્ગહા ચ ઉગ્ગા ચ, સબ્બે સન્નિપતું તદા.

૨૨૮. ‘‘આળારિકા ચ કપ્પકા, ન્હાપકા માલકારકા;

સૂરા વિજિતસઙ્ગામા, સબ્બે સન્નિપતું તદા.

૨૨૯. ‘‘ખગ્ગહત્થા ચ પુરિસા, ચાપહત્થા ચ વમ્મિનો;

લુદ્દા વિજિતસઙ્ગામા, સબ્બે સન્નિપતું તદા.

૨૩૦. ‘‘તિધાપભિન્ના માતઙ્ગા, કુઞ્જરા સટ્ઠિહાયના;

સુવણ્ણકચ્છાલઙ્કારા, સબ્બે સન્નિપતું તદા.

૨૩૧. ‘‘ખમા સીતસ્સ ઉણ્હસ્સ, ઉક્કારુહરણસ્સ ચ;

યોધાજીવા કતકમ્મા, સબ્બે સન્નિપતું તદા.

૨૩૨. ‘‘સઙ્ખસદ્દં ભેરિસદ્દં, અથો ઉતુજ [ઉદ્ધવ (સી.), ઉદ્દટ (સ્યા.)] સદ્દકં;

એતેહિ તે હાસયન્તા, સબ્બે સન્નિપતું તદા.

૨૩૩. ‘‘તિસૂલકોન્તિમન્તેહિ [તિસૂલકોન્તમન્તેહિ (સી.), કવચેહિ તોમરેહિ (સી.), ધનૂહિ તોમરેહિ (સ્યા.)] ચ;

કોટ્ટેન્તાનં નિપાતેન્તા [કોટ્ટયન્તા નિવત્તેન્તા (સ્યા.)], સબ્બે સન્નિપતું તદા.

૨૩૪. ‘‘કિમેવાતિનિસામેત્વા [કવચાનિવાસેત્વા (સ્યા.)], સરાજા અજિતઞ્જયો [અજિનં જિનો (સી.), અજિતઞ્જિનો (સ્યા.)];

સટ્ઠિ પાણસહસ્સાનિ, સૂલે ઉત્તાસયિં તદા.

૨૩૫. ‘‘સદ્દં માનુસકાકંસુ, અહો રાજા અધમ્મિકો;

નિરયે પચ્ચમાનસ્સ, કદા અન્તો ભવિસ્સતિ.

૨૩૬. ‘‘સયનેહં તુવટ્ટેન્તો, પસ્સામિ નિરયે તદા;

ન સુપામિ દિવારત્તિં, સૂલેન તજ્જયન્તિ મં.

૨૩૭. ‘‘કિં પમાદેન રજ્જેન, વાહનેન બલેન ચ;

ન તે પહોન્તિ ધારેતું, તાપયન્તિ [તાસયન્તિ (સી. સ્યા.)] મમં સદા.

૨૩૮. ‘‘કિં મે પુત્તેહિ દારેહિ, રજ્જેન સકલેન ચ;

યંનૂન પબ્બજેય્યાહં, ગતિમગ્ગં વિસોધયે.

૨૩૯. ‘‘સટ્ઠિ નાગસહસ્સાનિ, સબ્બાલઙ્કારભૂસિતે;

સુવણ્ણકચ્છે માતઙ્ગે, હેમકપ્પનવાસસે.

૨૪૦. ‘‘આરૂળ્હે ગામણીયેહિ, તોમરઙ્કુસપાણિભિ;

સઙ્ગામાવચરે ઠાને, અનપેક્ખો વિહાયહં;

સકકમ્મેન સન્તત્તો, નિક્ખમિં અનગારિયં.

૨૪૧. ‘‘સટ્ઠિ અસ્સસહસ્સાનિ, સબ્બાલઙ્કારભૂસિતે;

આજાનીયેવ જાતિયા, સિન્ધવે સીઘવાહને.

૨૪૨. ‘‘આરૂળ્હે ગામણીયેહિ, ચાપહત્થેહિ વમ્મિભિ;

પહારેત્વાન [પહાયિત્વાન (સી. પી.), છડ્ડયિત્વાન (સ્યા.)] તે સબ્બે, નિક્ખમિં અનગારિયં.

૨૪૩. ‘‘સટ્ઠિ રથસહસ્સાનિ, સબ્બાલઙ્કારભૂસિતે;

દીપે અથોપિ વેયગ્ઘે, સન્નદ્ધે ઉસ્સિતદ્ધજે;

તે સબ્બે પરિહારેત્વા [પરિવજ્જેત્વા (સ્યા.), પરિહાયિત્વા (પી.)], પબ્બજિં અનગારિયં.

૨૪૪. ‘‘સટ્ઠિ ધેનુસહસ્સાનિ, સબ્બા કંસૂપધારણા;

તાયોપિ [ગાવિયો (સ્યા.), ધેનુયો (ક.)] છડ્ડયિત્વાન, પબ્બજિં અનગારિયં.

૨૪૫. ‘‘સટ્ઠિ ઇત્થિસહસ્સાનિ, સબ્બાલઙ્કારભૂસિતા;

વિચિત્તવત્થાભરણા, આમુક્કમણિકુણ્ડલા.

૨૪૬. ‘‘અળારપમ્હા હસુલા, સુસઞ્ઞા તનુમજ્ઝિમા;

તા હિત્વા કન્દમાનાયો, પબ્બજિં અનગારિયં.

૨૪૭. ‘‘સટ્ઠિ ગામસહસ્સાનિ, પરિપુણ્ણાનિ સબ્બસો;

છડ્ડયિત્વાન તં રજ્જં, પબ્બજિં અનગારિયં.

૨૪૮. ‘‘નગરા નિક્ખમિત્વાન, હિમવન્તમુપાગમિં;

ભાગીરથીનદીતીરે, અસ્સમં માપયિં અહં.

૨૪૯. ‘‘પણ્ણસાલં કરિત્વાન, અગ્યાગારં અકાસહં;

આરદ્ધવીરિયો પહિતત્તો, વસામિ અસ્સમે અહં.

૨૫૦. ‘‘મણ્ડપે રુક્ખમૂલે વા, સુઞ્ઞાગારે ચ ઝાયતો;

ન તુ વિજ્જતિ તાસો મે, ન પસ્સે ભયભેરવં.

૨૫૧. ‘‘સુમેધો નામ સમ્બુદ્ધો, અગ્ગો કારુણિકો મુનિ;

ઞાણાલોકેન જોતન્તો, લોકે ઉપ્પજ્જિ તાવદે.

૨૫૨. ‘‘મમ અસ્સમસામન્તા, યક્ખો આસિ મહિદ્ધિકો;

બુદ્ધસેટ્ઠમ્હિ ઉપ્પન્ને, આરોચેસિ મમં તદા.

૨૫૩. ‘‘બુદ્ધો લોકે સમુપ્પન્નો, સુમેધો નામ ચક્ખુમા;

તારેતિ જનતં સબ્બં, તમ્પિ સો તારયિસ્સતિ.

૨૫૪. ‘‘યક્ખસ્સ વચનં સુત્વા, સંવિગ્ગો આસિ તાવદે;

બુદ્ધો બુદ્ધોતિ ચિન્તેન્તો, અસ્સમં પટિસામયિં.

૨૫૫. ‘‘અગ્ગિદારુઞ્ચ છડ્ડેત્વા, સંસામેત્વાન સન્થતં;

અસ્સમં અભિવન્દિત્વા, નિક્ખમિં વિપિના અહં.

૨૫૬. ‘‘તતો ચન્દનમાદાય, ગામા ગામં પુરા પુરં;

દેવદેવં ગવેસન્તો, ઉપગચ્છિં વિનાયકં.

૨૫૭. ‘‘ભગવા તમ્હિ સમયે, સુમેધો લોકનાયકો;

ચતુસચ્ચં પકાસેન્તો, બોધેતિ જનતં બહું.

૨૫૮. ‘‘અઞ્જલિં પગ્ગહેત્વાન, સીસે કત્વાન ચન્દનં;

સમ્બુદ્ધં અભિવાદેત્વા, ઇમા ગાથા અભાસહં.

૨૫૯. ‘‘‘વસ્સિકે પુપ્ફમાનમ્હિ, સન્તિકે ઉપવાયતિ;

ત્વં વીર ગુણગન્ધેન, દિસા સબ્બા પવાયસિ.

૨૬૦. ‘‘‘ચમ્પકે નાગવનિકે, અતિમુત્તકકેતકે;

સાલેસુ પુપ્ફમાનેસુ, અનુવાતં પવાયતિ.

૨૬૧. ‘‘‘તવ ગન્ધં સુણિત્વાન, હિમવન્તા ઇધાગમિં;

પૂજેમિ તં મહાવીર, લોકજેટ્ઠ મહાયસ’.

૨૬૨. ‘‘વરચન્દનેનાનુલિમ્પિં, સુમેધં લોકનાયકં;

સકં ચિત્તં પસાદેત્વા, તુણ્હી અટ્ઠાસિ તાવદે.

૨૬૩. ‘‘સુમેધો નામ ભગવા, લોકજેટ્ઠો નરાસભો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૨૬૪. ‘‘‘યો મે ગુણે પકિત્તેસિ, ચન્દનઞ્ચ અપૂજયિ;

તમહં કિત્તયિસ્સામિ, સુણાથ મમ ભાસતો.

૨૬૫. ‘‘‘આદેય્યવાક્યવચનો, બ્રહ્મા ઉજુ પતાપવા;

પઞ્ચવીસતિકપ્પાનિ, સપ્પભાસો ભવિસ્સતિ.

૨૬૬. ‘‘‘છબ્બીસતિકપ્પસતે, દેવલોકે રમિસ્સતિ;

સહસ્સક્ખત્તું રાજા ચ, ચક્કવત્તી ભવિસ્સતિ.

૨૬૭. ‘‘‘તેત્તિંસક્ખત્તું દેવિન્દો, દેવરજ્જં કરિસ્સતિ;

પદેસરજ્જં વિપુલં, ગણનાતો અસઙ્ખિયં.

૨૬૮. ‘‘‘તતો ચુતોયં મનુજો, મનુસ્સત્તં ગમિસ્સતિ;

પુઞ્ઞકમ્મેન સંયુત્તો, બ્રહ્મબન્ધુ ભવિસ્સતિ.

૨૬૯. ‘‘‘અજ્ઝાયકો મન્તધરો, તિણ્ણં વેદાન પારગૂ;

તિલક્ખણેન સમ્પન્નો, બાવરી નામ બ્રાહ્મણો.

૨૭૦. ‘‘‘તસ્સ સિસ્સો ભવિત્વાન, હેસ્સતિ મન્તપારગૂ;

ઉપગન્ત્વાન સમ્બુદ્ધં, ગોતમં સક્યપુઙ્ગવં.

૨૭૧. ‘‘‘પુચ્છિત્વા નિપુણે પઞ્હે, ભાવયિત્વાન અઞ્જસં [હાસયિત્વાન માનસં (સ્યા.), ભાવયિત્વાન સઞ્ચયં (ક.)];

સબ્બાસવે પરિઞ્ઞાય, વિહરિસ્સતિનાસવો’.

૨૭૨. ‘‘તિવિધગ્ગિ નિબ્બુતા મય્હં, ભવા સબ્બે સમૂહતા;

સબ્બાસવે પરિઞ્ઞાય, વિહરામિ અનાસવો.

૨૭૩. ‘‘કિલેસા ઝાપિતા મય્હં…પે… વિહરામિ અનાસવો.

૨૭૪. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૭૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તોદેય્યો થેરો ઇમા ગાથાયો અભાસિત્થાતિ.

તોદેય્યત્થેરસ્સાપદાનં અટ્ઠમં.