૭. હેમકત્થેરઅપદાનં

૧૮૩. ‘‘પબ્ભારકૂટં નિસ્સાય, અનોમો નામ તાપસો;

અસ્સમં સુકતં કત્વા, પણ્ણસાલે વસી તદા.

૧૮૪. ‘‘સિદ્ધં તસ્સ તપો કમ્મં, સિદ્ધિપત્તો સકે બલે;

સકસામઞ્ઞવિક્કન્તો, આતાપી નિપકો મુનિ.

૧૮૫. ‘‘વિસારદો સસમયે, પરવાદે ચ કોવિદો;

પટ્ઠો ભૂમન્તલિક્ખમ્હિ, ઉપ્પાતમ્હિ ચ કોવિદો.

૧૮૬. ‘‘વીતસોકો નિરારમ્ભો, અપ્પાહારો અલોલુપો;

લાભાલાભેન સન્તુટ્ઠો, ઝાયી ઝાનરતો મુનિ.

૧૮૭. ‘‘પિયદસ્સી નામ સમ્બુદ્ધો, અગ્ગો કારુણિકો મુનિ;

સત્તે તારેતુકામો સો, કરુણાય ફરી તદા.

૧૮૮. ‘‘બોધનેય્યં જનં દિસ્વા, પિયદસ્સી મહામુનિ;

ચક્કવાળસહસ્સમ્પિ, ગન્ત્વા ઓવદતે મુનિ.

૧૮૯. ‘‘મમુદ્ધરિતુકામો સો, મમસ્સમમુપાગમિ;

ન દિટ્ઠો મે જિનો પુબ્બે, ન સુતોપિ ચ કસ્સચિ.

૧૯૦. ‘‘ઉપ્પાતા સુપિના મય્હં, લક્ખણા સુપ્પકાસિતા;

પટ્ઠો ભૂમન્તલિક્ખમ્હિ, નક્ખત્તપદકોવિદો.

૧૯૧. ‘‘સોહં બુદ્ધસ્સ સુત્વાન, તત્થ ચિત્તં પસાદયિં;

તિટ્ઠન્તો [ભુઞ્જન્તો (સી. પી. ક.)] વા નિસિન્નો વા, સરામિ નિચ્ચકાલિકં.

૧૯૨. ‘‘મયિ એવં સરન્તમ્હિ, ભગવાપિ અનુસ્સરિ;

બુદ્ધં અનુસ્સરન્તસ્સ, પીતિ મે હોતિ તાવદે.

૧૯૩. ‘‘કાલઞ્ચ પુનરાગમ્મ, ઉપેસિ મં મહામુનિ;

સમ્પત્તેપિ ન જાનામિ, અયં બુદ્ધો મહામુનિ.

૧૯૪. ‘‘અનુકમ્પકો કારુણિકો, પિયદસ્સી મહામુનિ;

સઞ્જાનાપેસિ અત્તાનં, ‘અહં બુદ્ધો સદેવકે’.

૧૯૫. ‘‘સઞ્જાનિત્વાન સમ્બુદ્ધં, પિયદસ્સિં મહામુનિં;

સકં ચિત્તં પસાદેત્વા, ઇદં વચનમબ્રવિં.

૧૯૬. ‘‘‘અઞ્ઞે [સબ્બે (સ્યા.)] પીઠે ચ પલ્લઙ્કે, આસન્દીસુ નિસીદરે;

તુવમ્પિ સબ્બદસ્સાવી, નિસીદ રતનાસને’.

૧૯૭. ‘‘સબ્બરતનમયં પીઠં, નિમ્મિનિત્વાન તાવદે;

પિયદસ્સિસ્સ મુનિનો, અદાસિં ઇદ્ધિનિમ્મિતં.

૧૯૮. ‘‘રતને ચ નિસિન્નસ્સ, પીઠકે ઇદ્ધિનિમ્મિતે;

કુમ્ભમત્તં જમ્બુફલં, અદાસિં તાવદે અહં.

૧૯૯. ‘‘મમ હાસં જનેત્વાન, પરિભુઞ્જિ મહામુનિ;

તદા ચિત્તં પસાદેત્વા, સત્થારં અભિવાદયિં.

૨૦૦. ‘‘પિયદસ્સી તુ ભગવા, લોકજેટ્ઠો નરાસભો;

રતનાસનમાસીનો, ઇમા ગાથા અભાસથ.

૨૦૧. ‘‘‘યો મે રતનમયં પીઠં, અમતઞ્ચ ફલં અદા;

તમહં કિત્તયિસ્સામિ, સુણાથ મમ ભાસતો.

૨૦૨. ‘‘‘સત્તસત્તતિ કપ્પાનિ, દેવલોકે રમિસ્સતિ;

પઞ્ચસત્તતિક્ખત્તુઞ્ચ, ચક્કવત્તી ભવિસ્સતિ.

૨૦૩. ‘‘‘દ્વત્તિંસક્ખત્તું દેવિન્દો, દેવરજ્જં કરિસ્સતિ;

પદેસરજ્જં વિપુલં, ગણનાતો અસઙ્ખિયં.

૨૦૪. ‘‘‘સોણ્ણમયં રૂપિમયં, પલ્લઙ્કં સુકતં બહું;

લોહિતઙ્ગમયઞ્ચેવ, લચ્છતિ રતનામયં.

૨૦૫. ‘‘‘ચઙ્કમન્તમ્પિ મનુજં, પુઞ્ઞકમ્મસમઙ્ગિનં;

પલ્લઙ્કાનિ અનેકાનિ, પરિવારેસ્સરે તદા.

૨૦૬. ‘‘‘કૂટાગારા ચ પાસાદા, સયનઞ્ચ મહારહં;

ઇમસ્સ ચિત્તમઞ્ઞાય, નિબ્બત્તિસ્સન્તિ તાવદે.

૨૦૭. ‘‘‘સટ્ઠિ નાગસહસ્સાનિ, સબ્બાલઙ્કારભૂસિતા;

સુવણ્ણકચ્છા માતઙ્ગા, હેમકપ્પનવાસસા [હેમકપ્પનિવાસના (સી. સ્યા.), હેમકપ્પનિવાસસા (ક.)].

૨૦૮. ‘‘‘આરૂળ્હા ગામણીયેહિ, તોમરઙ્કુસપાણિભિ;

ઇમં પરિચરિસ્સન્તિ, રત્નપીઠસ્સિદં ફલં.

૨૦૯. ‘‘‘સટ્ઠિ અસ્સસહસ્સાનિ, સબ્બાલઙ્કારભૂસિતા;

આજાનીયાવ જાતિયા, સિન્ધવા સીઘવાહિનો.

૨૧૦. ‘‘‘આરૂળ્હા ગામણીયેહિ, ઇલ્લિયાચાપધારિભિ;

તેપિમં પરિચરિસ્સન્તિ, રત્નપીઠસ્સિદં ફલં.

૨૧૧. ‘‘‘સટ્ઠિ રથસહસ્સાનિ, સબ્બાલઙ્કારભૂસિતા;

દીપા અથોપિ વેયગ્ઘા, સન્નદ્ધા ઉસ્સિતદ્ધજા.

૨૧૨. ‘‘‘આરૂળ્હા ગામણીયેહિ, ચાપહત્થેહિ વમ્મિભિ;

પરિવારેસ્સન્તિમં નિચ્ચં, રત્નપીઠસ્સિદં ફલં.

૨૧૩. ‘‘‘સટ્ઠિ ધેનુસહસ્સાનિ, દોહઞ્ઞા પુઙ્ગવૂસભે;

વચ્છકે જનયિસ્સન્તિ, રત્નપીઠસ્સિદં ફલં.

૨૧૪. ‘‘‘સોળસિત્થિસહસ્સાનિ, સબ્બાલઙ્કારભૂસિતા;

વિચિત્તવત્થાભરણા, આમુક્કમણિકુણ્ડલા.

૨૧૫. ‘‘‘અળારપમ્હા હસુલા, સુસઞ્ઞા તનુમજ્ઝિમા;

પરિવારેસ્સન્તિમં નિચ્ચં, રત્નપીઠસ્સિદં ફલં.

૨૧૬. ‘‘‘અટ્ઠારસે કપ્પસતે, ગોતમો નામ ચક્ખુમા;

તમન્ધકારં વિધમિત્વા, બુદ્ધો લોકે ભવિસ્સતિ.

૨૧૭. ‘‘‘તસ્સ દસ્સનમાગમ્મ, પબ્બજિસ્સતિકિઞ્ચનો;

તોસયિત્વાન સત્થારં, સાસનેભિરમિસ્સતિ.

૨૧૮. ‘‘‘તસ્સ ધમ્મં સુણિત્વાન, કિલેસે ઘાતયિસ્સતિ;

સબ્બાસવે પરિઞ્ઞાય, નિબ્બાયિસ્સતિનાસવો’.

૨૧૯. ‘‘વીરિયં મે ધુરધોરય્હં, યોગક્ખેમાધિવાહનં;

ઉત્તમત્થં પત્થયન્તો, સાસને વિહરામહં.

૨૨૦. ‘‘ઇદં પચ્છિમકં મય્હં, ચરિમો વત્તતે ભવો;

સબ્બાસવા પરિક્ખીણા, નત્થિ દાનિ પુનબ્ભવો.

૨૨૧. ‘‘કિલેસા ઝાપિતા મય્હં…પે… વિહરામિ અનાસવો.

૨૨૨. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૨૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા હેમકો થેરો ઇમા ગાથાયો અભાસિત્થાતિ;

હેમકત્થેરસ્સાપદાનં સત્તમં.

સત્તરસમં ભાણવારં.