૬. નન્દકત્થેરઅપદાનં

૧૬૧. ‘‘મિગલુદ્દો પુરે આસિં, અરઞ્ઞે કાનને અહં;

પસદં મિગમેસન્તો, સયમ્ભું અદ્દસં અહં [જિનં (સી.)].

૧૬૨. ‘‘અનુરુદ્ધો નામ સમ્બુદ્ધો, સયમ્ભૂ અપરાજિતો;

વિવેકકામો સો ધીરો, વનમજ્ઝોગહી તદા.

૧૬૩. ‘‘ચતુદણ્ડે ગહેત્વાન, ચતુટ્ઠાને ઠપેસહં;

મણ્ડપં સુકતં કત્વા, પદ્મપુપ્ફેહિ છાદયિં.

૧૬૪. ‘‘મણ્ડપં છાદયિત્વાન, સયમ્ભું અભિવાદયિં;

ધનું તત્થેવ નિક્ખિપ્પ, પબ્બજિં અનગારિયં.

૧૬૫. ‘‘નચિરં પબ્બજિતસ્સ [પબ્બજિતસ્સ અચિરં (સી.)], બ્યાધિ મે ઉદપજ્જથ;

પુબ્બકમ્મં સરિત્વાન, તત્થ કાલઙ્કતો અહં.

૧૬૬. ‘‘પુબ્બકમ્મેન સંયુત્તો, તુસિતં અગમાસહં;

તત્થ સોણ્ણમયં બ્યમ્હં, નિબ્બત્તતિ યદિચ્છકં.

૧૬૭. ‘‘સહસ્સયુત્તં હયવાહિં, દિબ્બયાનમધિટ્ઠિતો;

આરુહિત્વાન તં યાનં, ગચ્છામહં યદિચ્છકં.

૧૬૮. ‘‘તતો મે નિય્યમાનસ્સ, દેવભૂતસ્સ મે સતો;

સમન્તા યોજનસતં, મણ્ડપો મે ધરીયતિ.

૧૬૯. ‘‘સયનેહં તુવટ્ટામિ, અચ્છન્ને [અચ્ચન્તં (સી.), અચ્ચન્ત (પી.)] પુપ્ફસન્થતે;

અન્તલિક્ખા ચ પદુમા, વસ્સન્તે નિચ્ચકાલિકં.

૧૭૦. ‘‘મરીચિકે ફન્દમાને, તપ્પમાને ચ આતપે;

ન મં તાપેતિ આતાપો, મણ્ડપસ્સ ઇદં ફલં.

૧૭૧. ‘‘દુગ્ગતિં સમતિક્કન્તો, અપાયા પિહિતા મમ;

મણ્ડપે રુક્ખમૂલે વા, સન્તાપો મે ન વિજ્જતિ.

૧૭૨. ‘‘મહીસઞ્ઞં અધિટ્ઠાય, લોણતોયં તરામહં;

તસ્સ મે સુકતં કમ્મં, બુદ્ધપૂજાયિદં ફલં.

૧૭૩. ‘‘અપથમ્પિ [અબ્ભમ્હિ (સ્યા. ક.)] પથં કત્વા, ગચ્છામિ અનિલઞ્જસે;

અહો મે સુકતં કમ્મં, બુદ્ધપૂજાયિદં ફલં.

૧૭૪. ‘‘પુબ્બેનિવાસં જાનામિ, દિબ્બચક્ખુ વિસોધિતં;

આસવા મે પરિક્ખીણા, બુદ્ધપૂજાયિદં ફલં.

૧૭૫. ‘‘જહિતા પુરિમા જાતિ, બુદ્ધસ્સ ઓરસો અહં;

દાયાદોમ્હિ ચ સદ્ધમ્મે, બુદ્ધપૂજાયિદં ફલં.

૧૭૬. ‘‘આરાધિતોમ્હિ સુગતં, ગોતમં સક્યપુઙ્ગવં;

ધમ્મધજો ધમ્મદાયાદો [ધમ્માદાસો (ક.)], બુદ્ધપૂજાયિદં ફલં.

૧૭૭. ‘‘ઉપટ્ઠિત્વાન સમ્બુદ્ધં, ગોતમં સક્યપુઙ્ગવં;

પારઙ્ગમનિયં મગ્ગં, અપુચ્છિં લોકનાયકં.

૧૭૮. ‘‘અજ્ઝિટ્ઠો કથયી બુદ્ધો, ગમ્ભીરં નિપુણં પદં;

તસ્સાહં ધમ્મં સુત્વાન, પત્તોમ્હિ આસવક્ખયં.

૧૭૯. ‘‘અહો મે સુકતં કમ્મં, પરિમુત્તોમ્હિ જાતિયા;

સબ્બાસવપરિક્ખીણો, નત્થિ દાનિ પુનબ્ભવો.

૧૮૦. ‘‘કિલેસા ઝાપિતા મય્હં…પે… વિહરામિ અનાસવો.

૧૮૧. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૮૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા નન્દકો થેરો ઇમા ગાથાયો અભાસિત્થાતિ.

નન્દકત્થેરસ્સાપદાનં છટ્ઠં.