૫. ઉપસીવત્થેરઅપદાનં

૧૦૦. ‘‘હિમવન્તસ્સાવિદૂરે, અનોમો નામ પબ્બતો;

અસ્સમો સુકતો મય્હં, પણ્ણસાલા સુમાપિતા.

૧૦૧. ‘‘નદી ચ સન્દતી તત્થ, સુપતિત્થા મનોરમા;

અનૂપતિત્થે જાયન્તિ, પદુમુપ્પલકા બહૂ.

૧૦૨. ‘‘પાઠીના પાવુસા મચ્છા, બલજા મુઞ્જરોહિતા;

મચ્છકચ્છપસઞ્છન્ના [મચ્છકચ્છપસમ્પન્ના (?)], નદિકા સન્દતે તદા.

૧૦૩. ‘‘તિમિરા પુપ્ફિતા તત્થ, અસોકા ખુદ્દમાલકા;

પુન્નાગા ગિરિપુન્નાગા, સમ્પવન્તિ મમસ્સમં.

૧૦૪. ‘‘કુટજા પુપ્ફિતા તત્થ, તિણસૂલવનાનિ ચ;

સાલા ચ સળલા તત્થ, ચમ્પકા પુપ્ફિતા બહૂ.

૧૦૫. ‘‘અજ્જુના અતિમુત્તા ચ, મહાનામા ચ પુપ્ફિતા;

અસના મધુગન્ધી ચ, પુપ્ફિતા તે મમસ્સમે.

૧૦૬. ‘‘ઉદ્દાલકા પાટલિકા, યૂથિકા ચ પિયઙ્ગુકા;

બિમ્બિજાલકસઞ્છન્ના, સમન્તા અડ્ઢયોજનં.

૧૦૭. ‘‘માતગ્ગારા [માતઙ્ગવા (સી.), માતકરા (સ્યા.), માતઙ્ગા વા (પી.)] સત્તલિયો, પાટલી સિન્દુવારકા;

અઙ્કોલકા બહૂ તત્થ, તાલકુટ્ઠિ [તાલકૂટા (સી. સ્યા.), તાલકુટ્ઠા (પી.)] ચ પુપ્ફિતા;

સેલેય્યકા બહૂ તત્થ, પુપ્ફિતા મમ અસ્સમે.

૧૦૮. ‘‘એતેસુ પુપ્ફજાતેસુ [પુપ્ફમાનેસુ (સી. પી.)], સોભન્તિ પાદપા બહૂ;

સમન્તા તેન ગન્ધેન, વાયતે મમ અસ્સમો.

૧૦૯. ‘‘હરીતકા આમલકા, અમ્બજમ્બુવિભીતકા [વિભિટકા (સી.)];

કોલા ભલ્લાતકા બિલ્લા, ફારુસકફલાનિ ચ.

૧૧૦. ‘‘તિન્દુકા ચ પિયાલા ચ, મધુકા કાસુમારયો;

લબુજા પનસા તત્થ, કદલી બદરીફલા [મન્દરિફલા (ક.), ચન્દરીફલા (સ્યા. પી.)].

૧૧૧. ‘‘અમ્બાટકા બહૂ તત્થ, વલ્લિકારફલાનિ ચ;

બીજપૂરસપારિયો [ચિરસંરસપાકા ચ (સ્યા.), વિટપા ચ સપાકા ચ (પી), વિદપરપદાદયો (ક.)], ફલિતા મમ અસ્સમે.

૧૧૨. ‘‘આળકા ઇસિમુગ્ગા ચ, તતો મોદફલા બહૂ;

અવટા પક્કભરિતા [સક્કરારિતા (ક.)], પિલક્ખુદુમ્બરાનિ ચ.

૧૧૩. ‘‘પિપ્ફિલી મરીચા તત્થ, નિગ્રોધા ચ કપિત્થના;

ઉદુમ્બરકા બહવો, કણ્ડુપણ્ણા ચ હરિયો [કણ્ડપક્કા ચ પારિયો (સી. સ્યા. પી.)].

૧૧૪. ‘‘એતે ચઞ્ઞે ચ બહવો, ફલિતા અસ્સમે મમ;

પુપ્ફરુક્ખાપિ બહવો, પુપ્ફિતા મમ અસ્સમે.

૧૧૫. ‘‘આલુવા ચ કળમ્બા ચ, બિળાલી તક્કલાનિ ચ;

આલકા તાલકા ચેવ, વિજ્જન્તિ અસ્સમે મમ.

૧૧૬. ‘‘અસ્સમસ્સાવિદૂરે મે, મહાજાતસ્સરો અહુ;

અચ્છોદકો સીતજલો, સુપતિત્થો મનોરમો.

૧૧૭. ‘‘પદુમુપ્પલા બહૂ તત્થ, પુણ્ડરીકસમાયુતા;

મન્દાલકેહિ સઞ્છન્ના, નાનાગન્ધસમેરિતા.

૧૧૮. ‘‘ગબ્ભં ગણ્હન્તિ પદુમા, અઞ્ઞે પુપ્ફન્તિ કેસરી;

ઓપુપ્ફપત્તા તિટ્ઠન્તિ, પદુમાકણ્ણિકા બહૂ.

૧૧૯. ‘‘મધુ ભિસમ્હા સવતિ, ખીરં સપ્પિ મુલાળિભિ;

સમન્તા તેન ગન્ધેન, નાનાગન્ધસમેરિતા.

૧૨૦. ‘‘કુમુદા અમ્બગન્ધિ ચ, નયિતા દિસ્સરે બહૂ;

જાતસ્સરસ્સાનુકૂલં, કેતકા પુપ્ફિતા બહૂ.

૧૨૧. ‘‘સુફુલ્લા બન્ધુજીવા ચ, સેતવારી સુગન્ધિકા;

કુમ્ભિલા સુસુમારા ચ, ગહકા તત્થ જાયરે.

૧૨૨. ‘‘ઉગ્ગાહકા અજગરા, તત્થ જાતસ્સરે બહૂ;

પાઠીના પાવુસા મચ્છા, બલજા મુઞ્જરોહિતા.

૧૨૩. ‘‘મચ્છકચ્છપસઞ્છન્ના, અથો પપટકાહિ [પમ્પટકેહિ (સી.), સપટકેહિ (સ્યા.), પપ્પટકેહિ (પી)] ચ;

પારેવતા રવિહંસા, કુકુત્થા [કુક્કુત્થા (સ્યા. ક.), કુત્થકા (પી.)] ચ નદીચરા.

૧૨૪. ‘‘દિન્દિભા [ટિટ્ટિભા (પી.)] ચક્કવાકા ચ, પમ્પકા જીવજીવકા;

કલન્દકા ઉક્કુસા ચ, સેનકા ઉદ્ધરા બહૂ.

૧૨૫. ‘‘કોટ્ઠકા સુકપોતા ચ, તુલિયા ચમરા બહૂ;

કારેનિયો [કાસેનિયા (સ્યા.)] ચ તિલકા [કિલકા (ક.)], ઉપજીવન્તિ તં સરં.

૧૨૬. ‘‘સીહા બ્યગ્ઘા ચ દીપી ચ, અચ્છકોકતરચ્છકા;

વાનરા કિન્નરા ચેવ, દિસ્સન્તિ મમ અસ્સમે.

૧૨૭. ‘‘તાનિ ગન્ધાનિ ઘાયન્તો, ભક્ખયન્તો ફલાનહં;

ગન્ધોદકં પિવન્તો ચ, વસામિ મમ અસ્સમે.

૧૨૮. ‘‘એણીમિગા વરાહા ચ, પસદા ખુદ્દરૂપકા;

અગ્ગિકા જોતિકા ચેવ, વસન્તિ મમ અસ્સમે.

૧૨૯. ‘‘હંસા કોઞ્ચા મયૂરા ચ, સાલિકાપિ ચ કોકિલા;

મજ્જારિકા [મઞ્જરિકા (સી. સ્યા. પી.)] બહૂ તત્થ, કોસિકા પોટ્ઠસીસકા.

૧૩૦. ‘‘પિસાચા દાનવા ચેવ, કુમ્ભણ્ડા રક્ખસા બહૂ;

ગરુળા પન્નગા ચેવ, વસન્તિ મમ અસ્સમે.

૧૩૧. ‘‘મહાનુભાવા ઇસયો, સન્તચિત્તા સમાહિતા;

કમણ્ડલુધરા સબ્બે, અજિનુત્તરવાસના;

જટાભારભરિતાવ [તે જટાભારભરિતા (સી. પી.), જટાભારભરિતા ચ (સ્યા.)], વસન્તિ મમ અસ્સમે.

૧૩૨. ‘‘યુગમત્તઞ્ચ પેક્ખન્તા, નિપકા સન્તવુત્તિનો;

લાભાલાભેન સન્તુટ્ઠા, વસન્તિ મમ અસ્સમે.

૧૩૩. ‘‘વાકચીરં ધુનન્તા તે, ફોટેન્તાજિનચમ્મકં;

સબલેહિ ઉપત્થદ્ધા, ગચ્છન્તિ અમ્બરે તદા.

૧૩૪. ‘‘ન તે દકં આહરન્તિ, કટ્ઠં વા અગ્ગિદારુકં;

સયઞ્ચ ઉપસમ્પન્ના, પાટિહીરસ્સિદં ફલં.

૧૩૫. ‘‘લોહદોણિં ગહેત્વાન, વનમજ્ઝે વસન્તિ તે;

કુઞ્જરાવ મહાનાગા, અસમ્ભીતાવ કેસરી.

૧૩૬. ‘‘અઞ્ઞે ગચ્છન્તિ ગોયાનં, અઞ્ઞે પુબ્બવિદેહકં [પુબ્બવિદેહનં (સ્યા. પી. ક.)];

અઞ્ઞે ચ ઉત્તરકુરું, સકં બલમવસ્સિતા [બલમપસ્સિતા (સ્યા. પી. ક.)].

૧૩૭. ‘‘તતો પિણ્ડં આહરિત્વા, પરિભુઞ્જન્તિ એકતો;

સબ્બેસં પક્કમન્તાનં, ઉગ્ગતેજાન તાદિનં.

૧૩૮. ‘‘અજિનચમ્મસદ્દેન, વનં સદ્દાયતે તદા;

એદિસા તે મહાવીર, સિસ્સા ઉગ્ગતપા મમ.

૧૩૯. ‘‘પરિવુતો અહં તેહિ, વસામિ મમ અસ્સમે;

તોસિતા સકકમ્મેન, વિનીતાપિ સમાગતા.

૧૪૦. ‘‘આરાધયિંસુ મં એતે, સકકમ્માભિલાસિનો;

સીલવન્તો ચ નિપકા, અપ્પમઞ્ઞાસુ કોવિદા.

૧૪૧. ‘‘પદુમુત્તરો લોકવિદૂ, આહુતીનં પટિગ્ગહો;

સમયં સંવિદિત્વાન, ઉપગચ્છિ વિનાયકો.

૧૪૨. ‘‘ઉપગન્ત્વાન સમ્બુદ્ધો, આતાપી નિપકો મુનિ;

પત્તં પગ્ગય્હ સમ્બુદ્ધો, ભિક્ખાય મમુપાગમિ.

૧૪૩. ‘‘ઉપાગતં મહાવીરં, જલજુત્તમનાયકં;

તિણસન્થરં [તિણત્થરં (સ્યા.), તિણત્થતં (ક.)] પઞ્ઞાપેત્વા, સાલપુપ્ફેહિ ઓકિરિં.

૧૪૪. ‘‘નિસાદેત્વાન [નિસીદેત્વાન (સી.), નિસીદિત્વાન (સ્યા. પી.)] સમ્બુદ્ધં, હટ્ઠો સંવિગ્ગમાનસો;

ખિપ્પં પબ્બતમારુય્હ, અગળું [અગરું (સી.)] અગ્ગહિં અહં.

૧૪૫. ‘‘કુમ્ભમત્તં ગહેત્વાન, પનસં દેવગન્ધિકં;

ખન્ધે આરોપયિત્વાન, ઉપગચ્છિં વિનાયકં.

૧૪૬. ‘‘ફલં બુદ્ધસ્સ દત્વાન, અગળું અનુલિમ્પહં;

પસન્નચિત્તો સુમનો, બુદ્ધસેટ્ઠં અવન્દિહં.

૧૪૭. ‘‘પદુમુત્તરો લોકવિદૂ, આહુતીનં પટિગ્ગહો;

ઇસિમજ્ઝે નિસીદિત્વા, ઇમા ગાથા અભાસથ.

૧૪૮. ‘‘‘યો મે ફલઞ્ચ અગળું, આસનઞ્ચ અદાસિ મે;

તમહં કિત્તયિસ્સામિ, સુણાથ મમ ભાસતો.

૧૪૯. ‘‘‘ગામે વા યદિ વારઞ્ઞે, પબ્ભારેસુ ગુહાસુ વા;

ઇમસ્સ ચિત્તમઞ્ઞાય, નિબ્બત્તિસ્સતિ ભોજનં.

૧૫૦. ‘‘‘દેવલોકે મનુસ્સે વા, ઉપપન્નો અયં નરો;

ભોજનેહિ ચ વત્થેહિ, પરિસં તપ્પયિસ્સતિ.

૧૫૧. ‘‘‘ઉપપજ્જતિ યં યોનિં, દેવત્તં અથ માનુસં;

અક્ખોભભોગો હુત્વાન, સંસરિસ્સતિયં નરો.

૧૫૨. ‘‘‘તિંસકપ્પસહસ્સાનિ, દેવલોકે રમિસ્સતિ;

સહસ્સક્ખત્તું રાજા ચ, ચક્કવત્તી ભવિસ્સતિ.

૧૫૩. ‘‘‘એકસત્તતિક્ખત્તુઞ્ચ, દેવરજ્જં કરિસ્સતિ;

પદેસરજ્જં વિપુલં, ગણનાતો અસઙ્ખિયં.

૧૫૪. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૫૫. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો [(ઉપસીવો નામ નામેન, હેસ્સતિ સત્થુ સાવકો) (સ્યા.)];

સબ્બાસવે પરિઞ્ઞાય, વિહરિસ્સતિનાસવો’.

૧૫૬. ‘‘સુલદ્ધલાભો લદ્ધો મે, યોહં અદ્દક્ખિં નાયકં;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૧૫૭. ‘‘ગામે વા યદિ વારઞ્ઞે, પબ્ભારેસુ ગુહાસુ વા;

મમ સઙ્કપ્પમઞ્ઞાય, ભોજનં હોતિ મે સદા.

૧૫૮. ‘‘કિલેસા ઝાપિતા મય્હં…પે… વિહરામિ અનાસવો.

૧૫૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૬૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉપસીવો [ઉપસિવો (ક.)] થેરો ઇમા ગાથાયો અભાસિત્થાતિ.

ઉપસીવત્થેરસ્સાપદાનં પઞ્ચમં.