૪. ધોતકત્થેરઅપદાનં

૭૨. ‘‘ગઙ્ગા ભાગીરથી નામ, હિમવન્તા પભાવિતા [હિમવન્તપ્પભાવિતા (સી.)];

હંસવતિયા દ્વારેન, અનુસન્દતિ તાવદે.

૭૩. ‘‘સોભિતો નામ આરામો, ગઙ્ગાકૂલે સુમાપિતો;

તત્થ પદુમુત્તરો બુદ્ધો, વસતે લોકનાયકો.

૭૪. ‘‘તિદસેહિ યથા ઇન્દો, મનુજેહિ પુરક્ખતો;

નિસીદિ તત્થ ભગવા, અસમ્ભીતોવ કેસરી.

૭૫. ‘‘નગરે હંસવતિયા, વસામિ [અહોસિં (સ્યા.)] બ્રાહ્મણો અહં;

છળઙ્ગો નામ નામેન, એવંનામો મહામુનિ.

૭૬. ‘‘અટ્ઠારસ સિસ્સસતા, પરિવારેન્તિ મં તદા;

તેહિ સિસ્સેહિ સમિતો, ગઙ્ગાતીરં ઉપાગમિં.

૭૭. ‘‘તત્થદ્દસાસિં સમણે, નિક્કુહે ધોતપાપકે;

ભાગીરથિં તરન્તેહં [તરન્તોહં (સ્યા. પી.)], એવં ચિન્તેસિ તાવદે.

૭૮. ‘‘સાયં પાતં [સાયપાતં (પી.)] તરન્તામે, બુદ્ધપુત્તા મહાયસા;

વિહેસયન્તિ અત્તાનં, તેસં અત્તા વિહઞ્ઞતિ.

૭૯. ‘‘સદેવકસ્સ લોકસ્સ, બુદ્ધો અગ્ગો પવુચ્ચતિ;

નત્થિ મે દક્ખિણે કારં, ગતિમગ્ગવિસોધનં.

૮૦. ‘‘યંનૂન બુદ્ધસેટ્ઠસ્સ, સેતું ગઙ્ગાય કારયે;

કારાપેત્વા ઇમં કમ્મં [સેતું (સ્યા.)], સન્તરામિ ઇમં ભવં.

૮૧. ‘‘સતસહસ્સં દત્વાન, સેતું કારાપયિં અહં;

સદ્દહન્તો કતં કારં, વિપુલં મે ભવિસ્સતિ.

૮૨. ‘‘કારાપેત્વાન તં સેતું, ઉપેસિં લોકનાયકં;

સિરસિ અઞ્જલિં કત્વા, ઇમં વચનમબ્રવિં.

૮૩. ‘‘‘સતસહસ્સસ્સ વયં [વયં સતસહસ્સંવ (ક.)], દત્વા [કત્વા (સી. પી.)] કારાપિતો મયા;

તવત્થાય મહાસેતુ, પટિગ્ગણ્હ મહામુને.

૮૪. ‘‘‘પદુમુત્તરો લોકવિદૂ, આહુતીનં પટિગ્ગહો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૮૫. ‘‘‘યો મે સેતું અકારેસિ, પસન્નો સેહિ પાણિભિ;

તમહં કિત્તયિસ્સામિ, સુણાથ મમ ભાસતો.

(સેતુદાનઆનિસંસો)

૮૬. ‘‘‘દરિતો પબ્બતતો વા, રુક્ખતો પતિતોપિયં;

ચુતોપિ લચ્છતી ઠાનં, સેતુદાનસ્સિદં ફલં.

૮૭. ‘‘‘વિરૂળ્હમૂલસન્તાનં, નિગ્રોધમિવ માલુતો;

અમિત્તા નપ્પસહન્તિ, સેતુદાનસ્સિદં ફલં.

૮૮. ‘‘‘નાસ્સ ચોરા પસહન્તિ, નાતિમઞ્ઞન્તિ ખત્તિયા;

સબ્બે તરિસ્સતામિત્તે, સેતુદાનસ્સિદં ફલં.

૮૯. ‘‘‘અબ્ભોકાસગતં સન્તં, કઠિનાતપતાપિતં;

પુઞ્ઞકમ્મેન સંયુત્તં, ન ભવિસ્સતિ વેદના [તાવદે (ક.)].

૯૦. ‘‘‘દેવલોકે મનુસ્સે વા, હત્થિયાનં સુનિમ્મિતં;

તસ્સ સઙ્કપ્પમઞ્ઞાય, નિબ્બત્તિસ્સતિ તાવદે.

૯૧. ‘‘‘સહસ્સસ્સા વાતજવા, સિન્ધવા સીઘવાહના;

સાયં પાતં ઉપેસ્સન્તિ, સેતુદાનસ્સિદં ફલં.

૯૨. ‘‘‘આગન્ત્વાન મનુસ્સત્તં, સુખિતોયં ભવિસ્સતિ;

વેહાસં [ઇહાપિ (સી. સ્યા. પી.)] મનુજસ્સેવ, હત્થિયાનં ભવિસ્સતિ.

૯૩. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૯૪. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સબ્બાસવે પરિઞ્ઞાય, નિબ્બાયિસ્સતિનાસવો’.

૯૫. ‘‘અહો મે સુકતં કમ્મં, જલજુત્તમનામકે;

તત્થ કારં કરિત્વાન, પત્તોહં આસવક્ખયં.

૯૬. ‘‘પધાનં પહિતત્તોમ્હિ, ઉપસન્તો નિરૂપધિ;

નાગોવ બન્ધનં છેત્વા, વિહરામિ અનાસવો.

૯૭. ‘‘કિલેસા ઝાપિતા મય્હં…પે… વિહરામિ અનાસવો.

૯૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૯૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ધોતકો થેરો ઇમા ગાથાયો અભાસિત્થાતિ.

ધોતકત્થેરસ્સાપદાનં ચતુત્થં.