૬. બાકુલત્થેરઅપદાનં

૩૮૬. ‘‘હિમવન્તસ્સાવિદૂરે, સોભિતો નામ પબ્બતો;

અસ્સમો સુકતો મય્હં, સકસિસ્સેહિ માપિતો.

૩૮૭. ‘‘મણ્ડપા ચ બહૂ તત્થ, પુપ્ફિતા સિન્દુવારકા;

કપિત્થા ચ બહૂ તત્થ, પુપ્ફિતા જીવજીવકા [ચમ્પકા નાગકેતકા (સ્યા.)].

૩૮૮. ‘‘નિગ્ગુણ્ડિયો બહૂ તત્થ, બદરામલકાનિ ચ;

ફારુસકા અલાબૂ ચ, પુણ્ડરીકા ચ પુપ્ફિતા.

૩૮૯. ‘‘આળકા [અળક્કા (સ્યા.)] બેલુવા તત્થ, કદલી માતુલુઙ્ગકા;

મહાનામા બહૂ તત્થ, અજ્જુના ચ પિયઙ્ગુકા.

૩૯૦. ‘‘કોસમ્બા સળલા નિમ્બા [નીપા (સી.)], નિગ્રોધા ચ કપિત્થના;

એદિસો અસ્સમો મય્હં, સસિસ્સોહં તહિં વસિં.

૩૯૧. ‘‘અનોમદસ્સી ભગવા, સયમ્ભૂ લોકનાયકો;

ગવેસં પટિસલ્લાનં, મમસ્સમમુપાગમિ.

૩૯૨. ‘‘ઉપેતમ્હિ મહાવીરે, અનોમદસ્સિમહાયસે;

ખણેન લોકનાથસ્સ, વાતાબાધો સમુટ્ઠહિ.

૩૯૩. ‘‘વિચરન્તો અરઞ્ઞમ્હિ, અદ્દસં લોકનાયકં;

ઉપગન્ત્વાન સમ્બુદ્ધં, ચક્ખુમન્તં મહાયસં.

૩૯૪. ‘‘ઇરિયઞ્ચાપિ દિસ્વાન, ઉપલક્ખેસહં તદા;

અસંસયઞ્હિ બુદ્ધસ્સ, બ્યાધિ નો ઉદપજ્જથ.

૩૯૫. ‘‘ખિપ્પં અસ્સમમાગઞ્છિં, મમ સિસ્સાન સન્તિકે;

ભેસજ્જં કત્તુકામોહં, સિસ્સે આમન્તયિં તદા.

૩૯૬. ‘‘પટિસ્સુણિત્વાન મે વાક્યં, સિસ્સા સબ્બે સગારવા;

એકજ્ઝં સન્નિપતિંસુ, સત્થુગારવતા મમ.

૩૯૭. ‘‘ખિપ્પં પબ્બતમારુય્હ, સબ્બોસધમહાસહં [મકાસહં (સ્યા. ક.)];

પાનીયયોગં [પાનીયયોગ્ગં (સી.)] કત્વાન, બુદ્ધસેટ્ઠસ્સદાસહં.

૩૯૮. ‘‘પરિભુત્તે મહાવીરે, સબ્બઞ્ઞુલોકનાયકે;

ખિપ્પં વાતો વૂપસમિ, સુગતસ્સ મહેસિનો.

૩૯૯. ‘‘પસ્સદ્ધં દરથં દિસ્વા, અનોમદસ્સી મહાયસો;

સકાસને નિસીદિત્વા, ઇમા ગાથા અભાસથ.

૪૦૦. ‘‘‘યો મે પાદાસિ ભેસજ્જં, બ્યાધિઞ્ચ સમયી મમ;

તમહં કિત્તયિસ્સામિ, સુણાથ મમ ભાસતો.

૪૦૧. ‘‘‘કપ્પસતસહસ્સાનિ, દેવલોકે રમિસ્સતિ;

વાદિતે તૂરિયે તત્થ, મોદિસ્સતિ સદા અયં.

૪૦૨. ‘‘‘મનુસ્સલોકમાગન્ત્વા, સુક્કમૂલેન ચોદિતો;

સહસ્સક્ખત્તું રાજા ચ, ચક્કવત્તી ભવિસ્સતિ.

૪૦૩. ‘‘‘પઞ્ચપઞ્ઞાસકપ્પમ્હિ, અનોમો નામ ખત્તિયો;

ચાતુરન્તો વિજિતાવી, જમ્બુમણ્ડસ્સ [જમ્બુદીપસ્સ (સ્યા.)] ઇસ્સરો.

૪૦૪. ‘‘‘સત્તરતનસમ્પન્નો, ચક્કવત્તી મહબ્બલો;

તાવતિંસેપિ ખોભેત્વા, ઇસ્સરં કારયિસ્સતિ.

૪૦૫. ‘‘‘દેવભૂતો મનુસ્સો વા, અપ્પાબાધો ભવિસ્સતિ;

પરિગ્ગહં વિવજ્જેત્વા, બ્યાધિં લોકે તરિસ્સતિ.

૪૦૬. ‘‘‘અપ્પરિમેય્યે ઇતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૪૦૭. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સબ્બાસવે પરિઞ્ઞાય, નિબ્બાયિસ્સતિનાસવો.

૪૦૮. ‘‘‘કિલેસે ઝાપયિત્વાન, તણ્હાસોતં તરિસ્સતિ;

બાકુલો [બક્કુલો (સી. સ્યા.)] નામ નામેન, હેસ્સતિ સત્થુ સાવકો.

૪૦૯. ‘‘‘ઇદં સબ્બં અભિઞ્ઞાય, ગોતમો સક્યપુઙ્ગવો;

ભિક્ખુસઙ્ઘે નિસીદિત્વા, એતદગ્ગે ઠપેસ્સતિ’.

૪૧૦. ‘‘અનોમદસ્સી ભગવા, સયમ્ભૂ લોકનાયકો;

વિવેકાનુવિલોકેન્તો, મમસ્સમમુપાગમિ.

૪૧૧. ‘‘ઉપાગતં મહાવીરં, સબ્બઞ્ઞું લોકનાયકં;

સબ્બોસધેન તપ્પેસિં, પસન્નો સેહિ પાણિભિ.

૪૧૨. ‘‘તસ્સ મે સુકતં કમ્મં, સુખેત્તે બીજસમ્પદા;

ખેપેતું નેવ સક્કોમિ, તદા હિ સુકતં મમ.

૪૧૩. ‘‘લાભા મમ સુલદ્ધં મે, યોહં અદ્દક્ખિ નાયકં;

તેન કમ્માવસેસેન, પત્તોમ્હિ અચલં પદં.

૪૧૪. ‘‘સબ્બમેતં અભિઞ્ઞાય, ગોતમો સક્યપુઙ્ગવો;

ભિક્ખુસઙ્ઘે નિસીદિત્વા, એતદગ્ગે ઠપેસિ મં.

૪૧૫. ‘‘અપરિમેય્યે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, ભેસજ્જસ્સ ઇદં ફલં.

૪૧૬. ‘‘કિલેસા ઝાપિતા મય્હં, ભવા સબ્બે સમૂહતા;

સબ્બાસવા પરિક્ખીણા, નત્થિ દાનિ પુનબ્ભવો.

૪૧૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૪૧૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા બાકુલો [બક્કુલો (સી. સ્યા.)] થેરો ઇમા ગાથાયો અભાસિત્થાતિ;

બાકુલત્થેરસ્સાપદાનં છટ્ઠં.