૭. ગિરિમાનન્દત્થેરઅપદાનં

૪૧૯. ‘‘ભરિયા મે કાલઙ્કતા, પુત્તો સીવથિકં ગતો;

માતા પિતા મતા ભાતા, એકચિતમ્હિ [માતા પિતા ચ ભાતા ચ, એકચિતકમ્હિ (સી. સ્યા.)] ડય્હરે.

૪૨૦. ‘‘તેન સોકેન સન્તત્તો, કિસો પણ્ડુ અહોસહં;

ચિત્તક્ખેપો ચ મે આસિ, તેન સોકેન અટ્ટિતો.

૪૨૧. ‘‘સોકસલ્લપરેતોહં, વનન્તમુપસઙ્કમિં;

પવત્તફલં ભુઞ્જિત્વા, રુક્ખમૂલે વસામહં.

૪૨૨. ‘‘સુમેધો નામ સમ્બુદ્ધો, દુક્ખસ્સન્તકરો જિનો;

મમુદ્ધરિતુકામો સો, આગઞ્છિ મમ સન્તિકં.

૪૨૩. ‘‘પદસદ્દં સુણિત્વાન, સુમેધસ્સ મહેસિનો;

પગ્ગહેત્વાનહં સીસં, ઉલ્લોકેસિં મહામુનિં.

૪૨૪. ‘‘ઉપાગતે મહાવીરે, પીતિ મે ઉદપજ્જથ;

તદાસિમેકગ્ગમનો, દિસ્વા તં લોકનાયકં.

૪૨૫. ‘‘સતિં પટિલભિત્વાન, પણ્ણમુટ્ઠિમદાસહં;

નિસીદિ ભગવા તત્થ, અનુકમ્પાય ચક્ખુમા.

૪૨૬. ‘‘નિસજ્જ તત્થ ભગવા, સુમેધો લોકનાયકો;

ધમ્મં મે કથયી બુદ્ધો, સોકસલ્લવિનોદનં.

૪૨૭. ‘‘‘અનવ્હિતા તતો આગું, અનનુઞ્ઞાતા ઇતો ગતા;

યથાગતા તથા ગતા, તત્થ કા પરિદેવના.

૪૨૮. ‘‘‘યથાપિ પથિકા સત્તા, વસ્સમાનાય વુટ્ઠિયા;

સભણ્ડા ઉપગચ્છન્તિ, વસ્સસ્સાપતનાય તે.

૪૨૯. ‘‘‘વસ્સે ચ તે ઓરમિતે, સમ્પયન્તિ યદિચ્છકં;

એવં માતા પિતા તુય્હં, તત્થ કા પરિદેવના.

૪૩૦. ‘‘‘આગન્તુકા પાહુનકા, ચલિતેરિતકમ્પિતા;

એવં માતા પિતા તુય્હં, તત્થ કા પરિદેવના.

૪૩૧. ‘‘‘યથાપિ ઉરગો જિણ્ણં, હિત્વા ગચ્છતિ સં તચં [સંતનું (સ્યા. ક.)];

એવં માતા પિતા તુય્હં, સં તનું ઇધ હીયરે’.

૪૩૨. ‘‘બુદ્ધસ્સ ગિરમઞ્ઞાય, સોકસલ્લં વિવજ્જયિં;

પામોજ્જં જનયિત્વાન, બુદ્ધસેટ્ઠં અવન્દહં.

૪૩૩. ‘‘વન્દિત્વાન મહાનાગં, પૂજયિં ગિરિમઞ્જરિં [ગિરિમઞ્જરિમપૂજયિં (સી. સ્યા.)];

દિબ્બગન્ધં સમ્પવન્તં [દિબ્બગન્ધેન સમ્પન્નં (સી. સ્યા.)], સુમેધં લોકનાયકં.

૪૩૪. ‘‘પૂજયિત્વાન સમ્બુદ્ધં, સિરે કત્વાન અઞ્જલિં;

અનુસ્સરં ગુણગ્ગાનિ, સન્થવિં લોકનાયકં.

૪૩૫. ‘‘નિત્તિણ્ણોસિ [નિત્તણ્હોસિ (સી.), વિતિણ્ણોસિ (સ્યા.)] મહાવીર, સબ્બઞ્ઞુ લોકનાયક;

સબ્બે સત્તે ઉદ્ધરસિ, ઞાણેન ત્વં મહામુને.

૪૩૬. ‘‘વિમતિં દ્વેળ્હકં વાપિ, સઞ્છિન્દસિ મહામુને;

પટિપાદેસિ મે મગ્ગં, તવ ઞાણેન ચક્ખુમ.

૪૩૭. ‘‘અરહા વસિપત્તા [સિદ્ધિપત્તા (સી. સ્યા.)] ચ, છળભિઞ્ઞા મહિદ્ધિકા;

અન્તલિક્ખચરા ધીરા, પરિવારેન્તિ તાવદે.

૪૩૮. ‘‘પટિપન્ના ચ સેખા ચ, ફલટ્ઠા સન્તિ સાવકા;

સૂરોદયેવ પદુમા, પુપ્ફન્તિ તવ સાવકા.

૪૩૯. ‘‘મહાસમુદ્દોવક્ખોભો, અતુલોપિ [યથા સમુદ્દો અક્ખોભો, અતુલો ચ (સી.)] દુરુત્તરો;

એવં ઞાણેન સમ્પન્નો, અપ્પમેય્યોસિ ચક્ખુમ.

૪૪૦. ‘‘વન્દિત્વાહં લોકજિનં, ચક્ખુમન્તં મહાયસં;

પુથુ દિસા નમસ્સન્તો, પટિકુટિકો અગઞ્છહં.

૪૪૧. ‘‘દેવલોકા ચવિત્વાન, સમ્પજાનો પતિસ્સતો;

ઓક્કમિં માતુયા કુચ્છિં, સન્ધાવન્તો ભવાભવે.

૪૪૨. ‘‘અગારા અભિનિક્ખમ્મ, પબ્બજિં અનગારિયં;

આતાપી નિપકો ઝાયી, પટિસલ્લાનગોચરો.

૪૪૩. ‘‘પધાનં પદહિત્વાન, તોસયિત્વા મહામુનિં;

ચન્દોવબ્ભઘના મુત્તો, વિચરામિ અહં સદા.

૪૪૪. ‘‘વિવેકમનુયુત્તોમ્હિ, ઉપસન્તો નિરૂપધિ;

સબ્બાસવે પરિઞ્ઞાય, વિહરામિ અનાસવો.

૪૪૫. ‘‘તિંસકપ્પસહસ્સમ્હિ, યં બુદ્ધમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૪૪૬. ‘‘કિલેસા ઝાપિતા મય્હં, ભવા સબ્બે સમૂહતા;

સબ્બાસવા પરિક્ખીણા, નત્થિ દાનિ પુનબ્ભવો.

૪૪૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૪૪૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ગિરિમાનન્દો થેરો ઇમા ગાથાયો અભાસિત્થાતિ.

ગિરિમાનન્દત્થેરસ્સાપદાનં સત્તમં.