૫. પદુમકૂટાગારિયત્થેરઅપદાનં

૩૫૩. ‘‘પિયદસ્સી નામ ભગવા, સયમ્ભૂ લોકનાયકો;

વિવેકકામો સમ્બુદ્ધો, સમાધિકુસલો મુનિ.

૩૫૪. ‘‘વનસણ્ડં સમોગય્હ, પિયદસ્સી મહામુનિ;

પંસુકૂલં પત્થરિત્વા, નિસીદિ પુરિસુત્તમો.

૩૫૫. ‘‘મિગલુદ્દો પુરે આસિં, અરઞ્ઞે [વિપિને (સી.), ઇરિને (સ્યા. ક.)] કાનને અહં;

પસદં મિગમેસન્તો, આહિણ્ડામિ અહં તદા.

૩૫૬. ‘‘તત્થદ્દસાસિં સમ્બુદ્ધં, ઓઘતિણ્ણમનાસવં;

પુપ્ફિતં સાલરાજંવ, સતરંસિંવ ઉગ્ગતં.

૩૫૭. ‘‘દિસ્વાનહં દેવદેવં, પિયદસ્સિં મહાયસં;

જાતસ્સરં સમોગય્હ, પદુમં આહરિં તદા.

૩૫૮. ‘‘આહરિત્વાન પદુમં, સતપત્તં મનોરમં;

કૂટાગારં કરિત્વાન, છાદયિં પદુમેનહં.

૩૫૯. ‘‘અનુકમ્પકો કારુણિકો, પિયદસ્સી મહામુનિ;

સત્તરત્તિન્દિવં બુદ્ધો, કૂટાગારે વસી જિનો.

૩૬૦. ‘‘પુરાણં છડ્ડયિત્વાન, નવેન છાદયિં અહં;

અઞ્જલિં પગ્ગહેત્વાન, અટ્ઠાસિં તાવદે અહં.

૩૬૧. ‘‘વુટ્ઠહિત્વા સમાધિમ્હા, પિયદસ્સી મહામુનિ;

દિસં અનુવિલોકેન્તો, નિસીદિ લોકનાયકો.

૩૬૨. ‘‘તદા સુદસ્સનો નામ, ઉપટ્ઠાકો મહિદ્ધિકો;

ચિત્તમઞ્ઞાય બુદ્ધસ્સ, પિયદસ્સિસ્સ સત્થુનો.

૩૬૩. ‘‘અસીતિયા સહસ્સેહિ, ભિક્ખૂહિ પરિવારિતો;

વનન્તે સુખમાસીનં, ઉપેસિ લોકનાયકં.

૩૬૪. ‘‘યાવતા વનસણ્ડમ્હિ, અધિવત્થા ચ દેવતા;

બુદ્ધસ્સ ચિત્તમઞ્ઞાય, સબ્બે સન્નિપતું તદા.

૩૬૫. ‘‘સમાગતેસુ યક્ખેસુ, કુમ્ભણ્ડે સહરક્ખસે;

ભિક્ખુસઙ્ઘે ચ સમ્પત્તે, ગાથા પબ્યાહરી [સબ્યાહરી (સ્યા.), માબ્યાહરી (સી.)] જિનો.

૩૬૬. ‘‘‘યો મં સત્તાહં પૂજેસિ, આવાસઞ્ચ અકાસિ મે;

તમહં કિત્તયિસ્સામિ, સુણાથ મમ ભાસતો.

૩૬૭. ‘‘‘સુદુદ્દસં સુનિપુણં, ગમ્ભીરં સુપ્પકાસિતં;

ઞાણેન કિત્તયિસ્સામિ, સુણાથ મમ ભાસતો.

૩૬૮. ‘‘‘ચતુદ્દસાનિ કપ્પાનિ, દેવરજ્જં કરિસ્સતિ;

કૂટાગારં મહન્તસ્સ [બ્રહં તસ્સ (સી. સ્યા.)], પદ્મપુપ્ફેહિ છાદિતં.

૩૬૯. ‘‘‘આકાસે ધારયિસ્સતિ, પુપ્ફકમ્મસ્સિદં [પુબ્બકમ્મસ્સિદં (સ્યા.)] ફલં;

ચતુબ્બીસે [ચતુદ્દસે (સ્યા.)] કપ્પસતે, વોકિણ્ણં સંસરિસ્સતિ.

૩૭૦. ‘‘‘તત્થ પુપ્ફમયં બ્યમ્હં, આકાસે ધારયિસ્સતિ;

યથા પદુમપત્તમ્હિ, તોયં ન ઉપલિમ્પતિ.

૩૭૧. ‘‘‘તથેવીમસ્સ ઞાણમ્હિ, કિલેસા નોપલિમ્પરે;

મનસા વિનિવટ્ટેત્વા, પઞ્ચ નીવરણે અયં.

૩૭૨. ‘‘‘ચિત્તં જનેત્વા નેક્ખમ્મે, અગારા પબ્બજિસ્સતિ;

તતો પુપ્ફમયે બ્યમ્હે, ધારેન્તે [પુપ્ફમયં બ્યમ્હં, ધારેન્તં (સ્યા. ક.)] નિક્ખમિસ્સતિ.

૩૭૩. ‘‘‘રુક્ખમૂલે વસન્તસ્સ, નિપકસ્સ સતીમતો;

તત્થ પુપ્ફમયં બ્યમ્હં, મત્થકે ધારયિસ્સતિ.

૩૭૪. ‘‘‘ચીવરં પિણ્ડપાતઞ્ચ, પચ્ચયં સયનાસનં;

દત્વાન ભિક્ખુસઙ્ઘસ્સ, નિબ્બાયિસ્સતિનાસવો’.

૩૭૫. ‘‘કૂટાગારેન ચરતા [ચરણા (સી. પી. ક.), ચરિતે (સ્યા.)], પબ્બજ્જં અભિનિક્ખમિં;

રુક્ખમૂલે વસન્તમ્પિ [વસન્તમ્હિ (સી.), વસતોપિ (?)], કૂટાગારં ધરીયતિ.

૩૭૬. ‘‘ચીવરે પિણ્ડપાતે ચ, ચેતના મે ન વિજ્જતિ;

પુઞ્ઞકમ્મેન સંયુત્તો, લભામિ પરિનિટ્ઠિતં.

૩૭૭. ‘‘ગણનાતો અસઙ્ખેય્યા, કપ્પકોટી બહૂ મમ;

રિત્તકા તે અતિક્કન્તા, પમુત્તા લોકનાયકા.

૩૭૮. ‘‘અટ્ઠારસે કપ્પસતે, પિયદસ્સી વિનાયકો;

તમહં પયિરુપાસિત્વા, ઇમં યોનિં ઉપાગતો.

૩૭૯. ‘‘ઇધ પસ્સામિ [ઇધદ્દસાસિં (સી.)] સમ્બુદ્ધં, અનોમં નામ ચક્ખુમં;

તમહં ઉપગન્ત્વાન, પબ્બજિં અનગારિયં.

૩૮૦. ‘‘દુક્ખસ્સન્તકરો બુદ્ધો, મગ્ગં મે દેસયી જિનો;

તસ્સ ધમ્મં સુણિત્વાન, પત્તોમ્હિ અચલં પદં.

૩૮૧. ‘‘તોસયિત્વાન સમ્બુદ્ધં, ગોતમં સક્યપુઙ્ગવં;

સબ્બાસવે પરિઞ્ઞાય, વિહરામિ અનાસવો.

૩૮૨. ‘‘અટ્ઠારસે કપ્પસતે, યં બુદ્ધમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૮૩. ‘‘કિલેસા ઝાપિતા મય્હં, ભવા સબ્બે સમૂહતા;

સબ્બાસવા પરિક્ખીણા, નત્થિ દાનિ પુનબ્ભવો.

૩૮૪. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૮૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પદુમકૂટાગારિયો થેરો ઇમા ગાથાયો અભાસિત્થાતિ.

પદુમકૂટાગારિયત્થેરસ્સાપદાનં પઞ્ચમં.