૪. મધુદાયકત્થેરઅપદાનં

૩૩૩. ‘‘સિન્ધુયા નદિયા તીરે, સુકતો અસ્સમો મમ;

તત્થ વાચેમહં સિસ્સે, ઇતિહાસં સલક્ખણં.

૩૩૪. ‘‘ધમ્મકામા વિનીતા તે, સોતુકામા સુસાસનં;

છળઙ્ગે પારમિપ્પત્તા, સિન્ધુકૂલે વસન્તિ તે.

૩૩૫. ‘‘ઉપ્પાતગમને ચેવ, લક્ખણેસુ ચ કોવિદા;

ઉત્તમત્થં ગવેસન્તા, વસન્તિ વિપિને તદા.

૩૩૬. ‘‘સુમેધો નામ સમ્બુદ્ધો, લોકે ઉપ્પજ્જિ તાવદે;

અમ્હાકં અનુકમ્પન્તો, ઉપાગચ્છિ વિનાયકો.

૩૩૭. ‘‘ઉપાગતં મહાવીરં, સુમેધં લોકનાયકં;

તિણસન્થારકં કત્વા, લોકજેટ્ઠસ્સદાસહં.

૩૩૮. ‘‘વિપિનાતો મધું ગય્હ, બુદ્ધસેટ્ઠસ્સદાસહં;

સમ્બુદ્ધો પરિભુઞ્જિત્વા, ઇદં વચનમબ્રવિ.

૩૩૯. ‘‘‘યો તં અદાસિ મધું મે, પસન્નો સેહિ પાણિભિ;

તમહં કિત્તયિસ્સામિ, સુણાથ મમ ભાસતો.

૩૪૦. ‘‘‘ઇમિના મધુદાનેન, તિણસન્થારકેન ચ;

તિંસ કપ્પસહસ્સાનિ, દેવલોકે રમિસ્સતિ.

૩૪૧. ‘‘‘તિંસ કપ્પસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૩૪૨. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સબ્બાસવે પરિઞ્ઞાય, નિબ્બાયિસ્સતિનાસવો.

૩૪૩. ‘‘‘દેવલોકા ઇધાગન્ત્વા, માતુકુચ્છિં ઉપાગતે;

મધુવસ્સં પવસ્સિત્થ, છાદયં મધુના મહિં’.

૩૪૪. ‘‘મયિ નિક્ખન્તમત્તમ્હિ, કુચ્છિયા ચ સુદુત્તરા;

તત્રાપિ મધુવસ્સં મે, વસ્સતે નિચ્ચકાલિકં.

૩૪૫. ‘‘અગારા અભિનિક્ખમ્મ, પબ્બજિં અનગારિયં;

લાભી અન્નસ્સ પાનસ્સ, મધુદાનસ્સિદં ફલં.

૩૪૬. ‘‘સબ્બકામસમિદ્ધોહં, ભવિત્વા દેવમાનુસે;

તેનેવ મધુદાનેન, પત્તોમ્હિ આસવક્ખયં.

૩૪૭. ‘‘વુટ્ઠમ્હિ દેવે ચતુરઙ્ગુલે તિણે, સમ્પુપ્ફિતે [સુપુપ્ફિતે (સ્યા.)] ધરણીરુહે સઞ્છન્ને [વપ્પદેસે (સ્યા.)];

સુઞ્ઞે ઘરે મણ્ડપરુક્ખમૂલકે, વસામિ નિચ્ચં સુખિતો અનાસવો.

૩૪૮. ‘‘મજ્ઝે મહન્તે હીને ચ [મજ્ઝે મય્હં ભવા અસ્સુ (સ્યા. પી. ક.)], ભવે સબ્બે અતિક્કમિં [યે ભવે સમતિક્કમિં (સ્યા. ક.), યો ભવેસુ પકિત્તયિ (ક.)];

અજ્જ મે આસવા ખીણા, નત્થિ દાનિ પુનબ્ભવો.

૩૪૯. ‘‘તિંસકપ્પસહસ્સમ્હિ, યં દાનમદદિં તદા;

દુગ્ગતિં નાભિજાનામિ, મધુદાનસ્સિદં ફલં.

૩૫૦. ‘‘કિલેસા ઝાપિતા મય્હં, ભવા સબ્બે સમૂહતા;

સબ્બાસવા પરિક્ખીણા, નત્થિ દાનિ પુનબ્ભવો.

૩૫૧. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૫૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મધુદાયકો થેરો ઇમા ગાથાયો અભાસિત્થાતિ.

મધુદાયકત્થેરસ્સાપદાનં ચતુત્થં.