૧. ઉમાપુપ્ફિયત્થેરઅપદાનં

૧. ‘‘સમાહિતં સમાપન્નં, સિદ્ધત્થમપરાજિતં;

સમાધિના ઉપવિટ્ઠં, અદ્દસાહં નરુત્તમં.

૨. ‘‘ઉમાપુપ્ફં ગહેત્વાન, બુદ્ધસ્સ અભિરોપયિં;

સબ્બપુપ્ફા એકસીસા, ઉદ્ધંવણ્ટા અધોમુખા.

૩. ‘‘સુચિત્તા વિય તિટ્ઠન્તે, આકાસે પુપ્ફસન્થરા;

તેન ચિત્તપ્પસાદેન, તુસિતં ઉપપજ્જહં.

૪. ‘‘ચતુન્નવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૫. ‘‘પઞ્ચપઞ્ઞાસિતો કપ્પે, એકો આસિં મહીપતિ;

સમન્તછદનો નામ, ચક્કવત્તી મહબ્બલો.

૬. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં.

ઇત્થં સુદં આયસ્મા ઉમાપુપ્ફિયો થેરો ઇમા ગાથાયો અભાસિત્થાતિ.

ઉમાપુપ્ફિયત્થેરસ્સાપદાનં પઠમં.