૨. પુલિનપૂજકત્થેરઅપદાનં

૭. ‘‘કકુધં વિલસન્તંવ, નિસભાજાનિયં યથા;

ઓસધિંવ વિરોચન્તં, ઓભાસન્તં નરાસભં.

૮. ‘‘અઞ્જલિં પગ્ગહેત્વાન, અવન્દિં સત્થુનો અહં;

સત્થારં પરિવણ્ણેસિં, સકકમ્મેન તોસયિં [તોસિતો (સી.)].

૯. ‘‘સુસુદ્ધં પુલિનં ગય્હ, ગતમગ્ગે સમોકિરિં;

ઉચ્છઙ્ગેન ગહેત્વાન, વિપસ્સિસ્સ મહેસિનો.

૧૦. ‘‘તતો ઉપડ્ઢપુલિનં, વિપ્પસન્નેન ચેતસા;

દિવાવિહારે ઓસિઞ્ચિં, દ્વિપદિન્દસ્સ તાદિનો.

૧૧. ‘‘એકનવુતિતો કપ્પે, પુલિનં યમસિઞ્ચહં;

દુગ્ગતિં નાભિજાનામિ, પુલિનસ્સ ઇદં ફલં.

૧૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પુલિનપૂજકો થેરો ઇમા ગાથાયો અભાસિત્થાતિ.

પુલિનપૂજકત્થેરસ્સાપદાનં દુતિયં.