૬. આસનસન્થવિકત્થેરઅપદાનં

૨૬. ‘‘ચેતિયં ઉત્તમં નામ, સિખિનો લોકબન્ધુનો;

અરઞ્ઞે ઇરીણે વને, અન્ધાહિણ્ડામહં તદા.

૨૭. ‘‘પવના નિક્ખમન્તેન, દિટ્ઠં સીહાસનં મયા;

એકંસં અઞ્જલિં કત્વા, સન્થવિં [થવિસ્સં (સી.)] લોકનાયકં.

૨૮. ‘‘દિવસભાગં થવિત્વાન, બુદ્ધં લોકગ્ગનાયકં;

હટ્ઠો હટ્ઠેન ચિત્તેન, ઇમં વાચં ઉદીરયિં.

૨૯. ‘‘‘નમો તે પુરિસાજઞ્ઞ, નમો તે પુરિસુત્તમ;

સબ્બઞ્ઞૂસિ મહાવીર, લોકજેટ્ઠ નરાસભ’.

૩૦. ‘‘અભિત્થવિત્વા સિખિનં, નિમિત્તકરણેનહં;

આસનં અભિવાદેત્વા, પક્કામિં ઉત્તરામુખો.

૩૧. ‘‘એકત્તિંસે ઇતો કપ્પે, યં થવિં વદતં વરં;

દુગ્ગતિં નાભિજાનામિ, થોમનાય ઇદં ફલં.

૩૨. ‘‘સત્તવીસે ઇતો કપ્પે, અતુલા સત્ત આસુ તે;

સત્તરતનસમ્પન્ના, ચક્કવત્તી મહબ્બલા.

૩૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આસનસન્થવિકો [આસનસન્થવકો (?), આસનથવિકો (ક.), આસનત્થવિકો (સી. સ્યા.)] થેરો ઇમા ગાથાયો અભાસિત્થાતિ.

આસનસન્થવિકત્થેરસ્સાપદાનં છટ્ઠં.