૩૨. આરક્ખદાયકવગ્ગો

૧. આરક્ખદાયકત્થેરઅપદાનં

૧. ‘‘ધમ્મદસ્સિસ્સ મુનિનો, વતિ કારાપિતા મયા;

આરક્ખો ચ મયા દિન્નો, દ્વિપદિન્દસ્સ તાદિનો.

૨. ‘‘અટ્ઠારસે કપ્પસતે, યં કમ્મમકરિં તદા;

તેન કમ્મવિસેસેન, પત્તો મે આસવક્ખયો.

૩. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા આરક્ખદાયકો થેરો ઇમા ગાથાયો અભાસિત્થાતિ.

આરક્ખદાયકત્થેરસ્સાપદાનં પઠમં.

૨. ભોજનદાયકત્થેરઅપદાનં

૪. ‘‘સુજાતો સાલલટ્ઠીવ, સોભઞ્જનમિવુગ્ગતો;

ઇન્દલટ્ઠિરિવાકાસે, વિરોચતિ સદા જિનો.

૫. ‘‘તસ્સ દેવાતિદેવસ્સ, વેસ્સભુસ્સ મહેસિનો;

અદાસિ ભોજનમહં, વિપ્પસન્નેન ચેતસા.

૬. ‘‘તં મે બુદ્ધો અનુમોદિ, સયમ્ભૂ અપરાજિતો;

ભવે નિબ્બત્તમાનમ્હિ, ફલં નિબ્બત્તતૂ તવ.

૭. ‘‘એકત્તિંસે ઇતો કપ્પે, યં દાનમદદિં તદા;

દુગ્ગતિં નાભિજાનામિ, ભોજનસ્સ ઇદં ફલં.

૮. ‘‘પઞ્ચવીસે ઇતો કપ્પે, એકો આસિં અમિત્તકો;

સત્તરતનસમ્પન્નો, ચક્કવત્તી મહબ્બલો.

૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ભોજનદાયકો થેરો ઇમા ગાથાયો અભાસિત્થાતિ.

ભોજનદાયકત્થેરસ્સાપદાનં દુતિયં.

૩. ગતસઞ્ઞકત્થેરઅપદાનં

૧૦. ‘‘આકાસેવ પદં નત્થિ, અમ્બરે અનિલઞ્જસે;

સિદ્ધત્થં જિનમદ્દક્ખિં, ગચ્છન્તં તિદિવઙ્ગણે [તિદિવઙ્ગણં (સ્યા. ક.)].

૧૧. ‘‘અનિલેનેરિતં દિસ્વા, સમ્માસમ્બુદ્ધચીવરં;

વિત્તિ મમાહુ તાવદે [વિત્તિ મે પાહુણા તાવ (સ્યા.), વિત્તિ મે તાવદે જાતા (સી.)], દિસ્વાન ગમનં મુનિં [મુને (સી.)].

૧૨. ‘‘ચતુન્નવુતિતો કપ્પે, યં સઞ્ઞમલભિં તદા;

દુગ્ગતિં નાભિજાનામિ, બુદ્ધસઞ્ઞાયિદં ફલં.

૧૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ગતસઞ્ઞકો થેરો ઇમા ગાથાયો અભાસિત્થાતિ.

ગતસઞ્ઞકત્થેરસ્સાપદાનં તતિયં.

૪. સત્તપદુમિયત્થેરઅપદાનં

૧૪. ‘‘નદીકૂલે વસામહં, નેસાદો નામ બ્રાહ્મણો;

સતપત્તેહિ પુપ્ફેહિ, સમ્મજ્જિત્વાન અસ્સમં.

૧૫. ‘‘સુવણ્ણવણ્ણં સમ્બુદ્ધં, સિદ્ધત્થં લોકનાયકં;

દિસ્વા નભેન [વનેન (સ્યા. ક.)] ગચ્છન્તં, હાસો મે ઉદપજ્જથ.

૧૬. ‘‘પચ્ચુગ્ગન્ત્વાન સમ્બુદ્ધં, લોકજેટ્ઠં નરાસભં;

અસ્સમં અતિનામેત્વા, જલજગ્ગેહિ ઓકિરિં.

૧૭. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૮. ‘‘ઇતો તે સત્તમે કપ્પે, ચતુરો પાદપાવરા;

સત્તરતનસમ્પન્ના, ચક્કવત્તી મહબ્બલા.

૧૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સત્તપદુમિયો થેરો ઇમા ગાથાયો અભાસિત્થાતિ.

સત્તપદુમિયત્થેરસ્સાપદાનં ચતુત્થં.

૫. પુપ્ફાસનદાયકત્થેરઅપદાનં

૨૦. ‘‘સુવણ્ણવણ્ણં સમ્બુદ્ધં, પીતરંસિંવ [સતરંસિંવ (સી. સ્યા.)] ભાણુમં;

અવિદૂરેન ગચ્છન્તં, સિદ્ધત્થં અપરાજિતં.

૨૧. ‘‘તસ્સ પચ્ચુગ્ગમિત્વાન, પવેસેત્વાન અસ્સમં;

પુપ્ફાસનં મયા દિન્નં, વિપ્પસન્નેન ચેતસા.

૨૨. ‘‘અઞ્જલિં પગ્ગહેત્વાન, વેદજાતો તદા અહં;

બુદ્ધે ચિત્તં પસાદેત્વા, તં કમ્મં પરિણામયિં.

૨૩. ‘‘યં મે અત્થિ કતં પુઞ્ઞં, સયમ્ભુમ્હપરાજિતે;

સબ્બેન તેન કુસલેન, વિમલો હોમિ સાસને.

૨૪. ‘‘ચતુન્નવુતિતો કપ્પે, પુપ્ફાસનમદં તદા;

દુગ્ગતિં નાભિજાનામિ, પુપ્ફાસનસ્સિદં ફલં.

૨૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પુપ્ફાસનદાયકો થેરો ઇમા ગાથાયો અભાસિત્થાતિ.

પુપ્ફાસનદાયકત્થેરસ્સાપદાનં પઞ્ચમં.

૬. આસનસન્થવિકત્થેરઅપદાનં

૨૬. ‘‘ચેતિયં ઉત્તમં નામ, સિખિનો લોકબન્ધુનો;

અરઞ્ઞે ઇરીણે વને, અન્ધાહિણ્ડામહં તદા.

૨૭. ‘‘પવના નિક્ખમન્તેન, દિટ્ઠં સીહાસનં મયા;

એકંસં અઞ્જલિં કત્વા, સન્થવિં [થવિસ્સં (સી.)] લોકનાયકં.

૨૮. ‘‘દિવસભાગં થવિત્વાન, બુદ્ધં લોકગ્ગનાયકં;

હટ્ઠો હટ્ઠેન ચિત્તેન, ઇમં વાચં ઉદીરયિં.

૨૯. ‘‘‘નમો તે પુરિસાજઞ્ઞ, નમો તે પુરિસુત્તમ;

સબ્બઞ્ઞૂસિ મહાવીર, લોકજેટ્ઠ નરાસભ’.

૩૦. ‘‘અભિત્થવિત્વા સિખિનં, નિમિત્તકરણેનહં;

આસનં અભિવાદેત્વા, પક્કામિં ઉત્તરામુખો.

૩૧. ‘‘એકત્તિંસે ઇતો કપ્પે, યં થવિં વદતં વરં;

દુગ્ગતિં નાભિજાનામિ, થોમનાય ઇદં ફલં.

૩૨. ‘‘સત્તવીસે ઇતો કપ્પે, અતુલા સત્ત આસુ તે;

સત્તરતનસમ્પન્ના, ચક્કવત્તી મહબ્બલા.

૩૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આસનસન્થવિકો [આસનસન્થવકો (?), આસનથવિકો (ક.), આસનત્થવિકો (સી. સ્યા.)] થેરો ઇમા ગાથાયો અભાસિત્થાતિ.

આસનસન્થવિકત્થેરસ્સાપદાનં છટ્ઠં.

૭. સદ્દસઞ્ઞકત્થેરઅપદાનં

૩૪. ‘‘સુદસ્સનો મહાવીરો, દેસેતિ અમતં પદં;

પરિવુતો સાવકેહિ, વસતિ ઘરમુત્તમે.

૩૫. ‘‘તાય વાચાય મધુરાય, સઙ્ગણ્હાતિ [સઙ્ગણ્હન્તે (સી.)] મહાજનં;

ઘોસો ચ વિપુલો આસિ, આસીસો [આસંસો (સી.)] દેવમાનુસે.

૩૬. ‘‘નિગ્ઘોસસદ્દં સુત્વાન, સિદ્ધત્થસ્સ મહેસિનો;

સદ્દે ચિત્તં પસાદેત્વા, અવન્દિં લોકનાયકં.

૩૭. ‘‘ચતુન્નવુતિતો કપ્પે, યં સઞ્ઞમલભિં તદા;

દુગ્ગતિં નાભિજાનામિ, બુદ્ધસઞ્ઞાયિદં ફલં.

૩૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સદ્દસઞ્ઞકો થેરો ઇમા ગાથાયો અભાસિત્થાતિ.

સદ્દસઞ્ઞકત્થેરસ્સાપદાનં સત્તમં.

૮. તિરંસિયત્થેરઅપદાનં

૩૯. ‘‘કેસરિં અભિજાતંવ, અગ્ગિક્ખન્ધંવ પબ્બતે;

ઓભાસેન્તં દિસા સબ્બા [નિવાસેન્તં (ક.), દિસાસિન્નં (સ્યા.)], સિદ્ધત્થં પબ્બતન્તરે.

૪૦. ‘‘સૂરિયસ્સ ચ આલોકં, ચન્દાલોકં તથેવ ચ;

બુદ્ધાલોકઞ્ચ દિસ્વાન, વિત્તિ મે ઉદપજ્જથ.

૪૧. ‘‘તયો આલોકે દિસ્વાન, સમ્બુદ્ધં [બુદ્ધઞ્ચ (સી.)] સાવકુત્તમં;

એકંસં અજિનં કત્વા, સન્થવિં લોકનાયકં.

૪૨. ‘‘તયો હિ આલોકકરા, લોકે લોકતમોનુદા;

ચન્દો ચ સૂરિયો ચાપિ, બુદ્ધો ચ લોકનાયકો.

૪૩. ‘‘ઓપમ્મં ઉપદસ્સેત્વા, કિત્તિતો મે મહામુનિ;

બુદ્ધસ્સ વણ્ણં કિત્તેત્વા, કપ્પં સગ્ગમ્હિ મોદહં.

૪૪. ‘‘ચતુન્નવુતિતો કપ્પે, યં બુદ્ધમભિકિત્તયિં;

દુગ્ગતિં નાભિજાનામિ, કિત્તનાય ઇદં ફલં.

૪૫. ‘‘એકસટ્ઠિમ્હિતો કપ્પે, એકો ઞાણધરો અહુ;

સત્તરતનસમ્પન્નો, ચક્કવત્તી મહબ્બલો.

૪૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિરંસિયો થેરો ઇમા ગાથાયો અભાસિત્થાતિ.

તિરંસિયત્થેરસ્સાપદાનં અટ્ઠમં.

૯. કન્દલિપુપ્ફિયત્થેરઅપદાનં

૪૭. ‘‘સિન્ધુયા નદિયા તીરે, અહોસિં કસ્સકો તદા;

પરકમ્માયને યુત્તો, પરભત્તં અપસ્સિતો.

૪૮. ‘‘સિન્ધું અનુચરન્તોહં, સિદ્ધત્થં જિનમદ્દસં;

સમાધિના નિસિન્નંવ, સતપત્તંવ પુપ્ફિતં.

૪૯. ‘‘સત્ત કન્દલિપુપ્ફાનિ, વણ્ટે છેત્વાનહં તદા;

મત્થકે અભિરોપેસિં, બુદ્ધસ્સાદિચ્ચબન્ધુનો.

૫૦. ‘‘સુવણ્ણવણ્ણં સમ્બુદ્ધં, અનુકૂલે સમાહિતં;

તિધાપભિન્નમાતઙ્ગં, કુઞ્જરંવ દુરાસદં.

૫૧. ‘‘તમહં ઉપગન્ત્વાન, નિપકં ભાવિતિન્દ્રિયં;

અઞ્જલિં પગ્ગહેત્વાન, અવન્દિં સત્થુનો અહં.

૫૨. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૫૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કન્દલિપુપ્ફિયો થેરો ઇમા ગાથાયો અભાસિત્થાતિ.

કન્દલિપુપ્ફિયત્થેરસ્સાપદાનં નવમં.

૧૦. કુમુદમાલિયત્થેરઅપદાનં

૫૪. ‘‘ઉસભં પવરં વીરં, મહેસિં વિજિતાવિનં;

વિપસ્સિનં મહાવીરં, અભિજાતંવ કેસરિં.

૫૫. ‘‘રથિયં પટિપજ્જન્તં, આહુતીનં પટિગ્ગહં;

ગહેત્વા કુમુદં માલં, બુદ્ધસેટ્ઠં સમોકિરિં.

૫૬. ‘‘એકનવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૫૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કુમુદમાલિયો થેરો ઇમા ગાથાયો અભાસિત્થાતિ.

કુમુદમાલિયત્થેરસ્સાપદાનં દસમં.

આરક્ખદાયકવગ્ગો બાત્તિંસતિમો [બત્તિંસતિમો (સી. સ્યા.)].