૪. સત્તપદુમિયત્થેરઅપદાનં

૧૪. ‘‘નદીકૂલે વસામહં, નેસાદો નામ બ્રાહ્મણો;

સતપત્તેહિ પુપ્ફેહિ, સમ્મજ્જિત્વાન અસ્સમં.

૧૫. ‘‘સુવણ્ણવણ્ણં સમ્બુદ્ધં, સિદ્ધત્થં લોકનાયકં;

દિસ્વા નભેન [વનેન (સ્યા. ક.)] ગચ્છન્તં, હાસો મે ઉદપજ્જથ.

૧૬. ‘‘પચ્ચુગ્ગન્ત્વાન સમ્બુદ્ધં, લોકજેટ્ઠં નરાસભં;

અસ્સમં અતિનામેત્વા, જલજગ્ગેહિ ઓકિરિં.

૧૭. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૮. ‘‘ઇતો તે સત્તમે કપ્પે, ચતુરો પાદપાવરા;

સત્તરતનસમ્પન્ના, ચક્કવત્તી મહબ્બલા.

૧૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સત્તપદુમિયો થેરો ઇમા ગાથાયો અભાસિત્થાતિ.

સત્તપદુમિયત્થેરસ્સાપદાનં ચતુત્થં.