૧૦. પબ્ભારદાયકત્થેરઅપદાનં

૪૭. ‘‘પિયદસ્સિનો ભગવતો, પબ્ભારો સોધિતો મયા;

ઘટકઞ્ચ ઉપટ્ઠાસિં, પરિભોગાય તાદિનો.

૪૮. ‘‘તં મે બુદ્ધો વિયાકાસિ, પિયદસ્સી મહામુનિ;

સહસ્સકણ્ડો સતભેણ્ડુ [સતગેણ્ડુ (સ્યા. ક.)], ધજાલુ હરિતામયો.

૪૯. ‘‘નિબ્બત્તિસ્સતિ સો યૂપો, રતનઞ્ચ અનપ્પકં;

પબ્ભારદાનં દત્વાન, કપ્પં સગ્ગમ્હિ મોદહં.

૫૦. ‘‘ઇતો બાત્તિંસકપ્પમ્હિ, સુસુદ્ધો નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૫૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પબ્ભારદાયકો થેરો ઇમા ગાથાયો અભાસિત્થાતિ.

પબ્ભારદાયકત્થેરસ્સાપદાનં દસમં.

પદુમકેસરવગ્ગો એકતિંસતિમો.