૩૧. પદુમકેસરવગ્ગો

૧. પદુમકેસરિયત્થેરઅપદાનં

૧. ‘‘ઇસિસઙ્ઘે અહં પુબ્બે, આસિં માતઙ્ગવારણો;

મહેસીનં પસાદેન, પદ્મકેસરમોકિરિં.

૨. ‘‘પચ્ચેકજિનસેટ્ઠેસુ, ધુતરાગેસુ તાદિસુ;

તેસુ ચિત્તં પસાદેત્વા, કપ્પં સગ્ગમ્હિ મોદહં.

૩. ‘‘એકનવુતિતો કપ્પે, કેસરં ઓકિરિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા પદુમકેસરિયો થેરો ઇમા ગાથાયો અભાસિત્થાતિ.

પદુમકેસરિયત્થેરસ્સાપદાનં પઠમં.

૨. સબ્બગન્ધિયત્થેરઅપદાનં

૫. ‘‘ગન્ધમાલં મયા દિન્નં, વિપસ્સિસ્સ મહેસિનો;

અદાસિં ઉજુભૂતસ્સ, કોસેય્યવત્થમુત્તમં.

૬. ‘‘એકનવુતિતો કપ્પે, યં વત્થમદદિં [ગન્ધમદદિં (સ્યા.)] પુરે;

દુગ્ગતિં નાભિજાનામિ, ગન્ધદાનસ્સિદં ફલં.

૭. ‘‘ઇતો પન્નરસે કપ્પે, સુચેળો નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સબ્બગન્ધિયો થેરો ઇમા ગાથાયો અભાસિત્થાતિ.

સબ્બગન્ધિયત્થેરસ્સાપદાનં દુતિયં.

૩. પરમન્નદાયકત્થેરઅપદાનં

૯. ‘‘કણિકારંવ જોતન્તં, ઉદયન્તંવ ભાણુમં;

વિપસ્સિં અદ્દસં બુદ્ધં, લોકજેટ્ઠં નરાસભં.

૧૦. ‘‘અઞ્જલિં પગ્ગહેત્વાન, અભિનેસિં સકં ઘરં;

અભિનેત્વાન સમ્બુદ્ધં, પરમન્નમદાસહં.

૧૧. ‘‘એકનવુતિતો કપ્પે, પરમન્નમદિં [પરમન્નં દદિં (સી.), પરમન્નમદં (સ્યા.)] તદા;

દુગ્ગતિં નાભિજાનામિ, પરમન્નસ્સિદં ફલં.

૧૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પરમન્નદાયકો થેરો ઇમા ગાથાયો અભાસિત્થાતિ.

પરમન્નદાયકત્થેરસ્સાપદાનં તતિયં.

૪. ધમ્મસઞ્ઞકત્થેરઅપદાનં

૧૩. ‘‘વિપસ્સિનો ભગવતો, મહાબોધિમહો અહુ;

રુક્ખટ્ઠસ્સેવ સમ્બુદ્ધો, [રુક્ખટ્ઠેયેવ સમ્બુદ્ધે (સી.), રુક્ખટ્ઠો ઇવ સમ્બુદ્ધો (અટ્ઠ.) એત્થ રુક્ખટ્ઠસ્સેવ બોધિમહકારજનસ્સ સમ્બુદ્ધો ચતુસચ્ચં પકાસેતીતિ અત્થોપિ સક્કા ઞાતું] લોકજેટ્ઠો નરાસભો [લોકજેટ્ઠે નરાસભે (સી.)].

૧૪. ‘‘ભગવા તમ્હિ સમયે, ભિક્ખુસઙ્ઘપુરક્ખતો;

ચતુસચ્ચં પકાસેતિ, વાચાસભિમુદીરયં.

૧૫. ‘‘સઙ્ખિત્તેન ચ દેસેન્તો, વિત્થારેન ચ દેસયં [દેસયિ (સ્યા.), ભાસતિ (ક.)];

વિવટ્ટચ્છદો સમ્બુદ્ધો, નિબ્બાપેસિ મહાજનં.

૧૬. ‘‘તસ્સાહં ધમ્મં સુત્વાન, લોકજેટ્ઠસ્સ તાદિનો;

વન્દિત્વા સત્થુનો પાદે, પક્કામિં ઉત્તરામુખો.

૧૭. ‘‘એકનવુતિતો કપ્પે, યં ધમ્મમસુણિં તદા;

દુગ્ગતિં નાભિજાનામિ, ધમ્મસવસ્સિદં ફલં.

૧૮. ‘‘તેત્તિંસમ્હિ ઇતો કપ્પે, એકો આસિં મહીપતિ;

સુતવા નામ નામેન, ચક્કવત્તી મહબ્બલો.

૧૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ધમ્મસઞ્ઞકો થેરો ઇમા ગાથાયો અભાસિત્થાતિ.

ધમ્મસઞ્ઞકત્થેરસ્સાપદાનં ચતુત્થં.

૫. ફલદાયકત્થેરઅપદાનં

૨૦. ‘‘ભાગીરથીનદીતીરે, અહોસિ અસ્સમો તદા;

તમહં અસ્સમં ગચ્છિં, ફલહત્થો અપેક્ખવા.

૨૧. ‘‘વિપસ્સિં તત્થ અદ્દક્ખિં, પીતરંસિંવ ભાણુમં;

યં મે અત્થિ ફલં સબ્બં, અદાસિં સત્થુનો અહં.

૨૨. ‘‘એકનવુતિતો કપ્પે, યં ફલં અદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૨૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ફલદાયકો થેરો ઇમા ગાથાયો અભાસિત્થાતિ.

ફલદાયકત્થેરસ્સાપદાનં પઞ્ચમં.

૬. સમ્પસાદકત્થેરઅપદાનં

૨૪. ‘‘‘નમો તે બુદ્ધ વીરત્થુ, વિપ્પમુત્તોસિ સબ્બધિ;

બ્યસનમ્હિ [બ્યસનં હિ (સી.)] અનુપ્પત્તો, તસ્સ મે સરણં ભવ’.

૨૫. ‘‘સિદ્ધત્થો તસ્સ બ્યાકાસિ, લોકે અપ્પટિપુગ્ગલો;

‘મહોદધિસમો સઙ્ઘો, અપ્પમેય્યો અનુત્તરો.

૨૬. ‘‘‘તત્થ ત્વં વિરજે ખેત્તે, અનન્તફલદાયકે;

સઙ્ઘે ચિત્તં પસાદેત્વા, સુબીજં વાપ [ચાપિ (સી.), વાપિ (સ્યા.)] રોપય.

૨૭. ‘‘ઇદં વત્વાન સબ્બઞ્ઞૂ, લોકજેટ્ઠો નરાસભો;

મમેવ અનુસાસિત્વા, વેહાસં નભમુગ્ગમિ.

૨૮. ‘‘અચિરં ગતમત્તમ્હિ, સબ્બઞ્ઞુમ્હિ નરાસભે;

મરણં સમનુપ્પત્તો, તુસિતં ઉપપજ્જહં.

૨૯. ‘‘તદાહં વિરજે ખેત્તે, અનન્તફલદાયકે;

સઙ્ઘે ચિત્તં પસાદેત્વા, કપ્પં સગ્ગમ્હિ મોદહં.

૩૦. ‘‘ચતુન્નવુતિતો કપ્પે, પસાદમલભિં તદા;

દુગ્ગતિં નાભિજાનામિ, પસાદસ્સ ઇદં ફલં.

૩૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સમ્પસાદકો થેરો ઇમા ગાથાયો અભાસિત્થાતિ.

સમ્પસાદકત્થેરસ્સાપદાનં છટ્ઠં.

૭. આરામદાયકત્થેરઅપદાનં

૩૨. ‘‘સિદ્ધત્થસ્સ ભગવતો, આરામો રોપિતો મયા;

સન્દચ્છાયેસુ [સીતછાયેસુ (સ્યા.), સન્તચ્છાયેસુ (ક.)] રુક્ખેસુ, ઉપાસન્તેસુ પક્ખિસુ.

૩૩. ‘‘અદ્દસં વિરજં બુદ્ધં, આહુતીનં પટિગ્ગહં;

આરામં અભિનામેસિં, લોકજેટ્ઠં નરાસભં.

૩૪. ‘‘હટ્ઠો હટ્ઠેન ચિત્તેન, ફલં પુપ્ફમદાસહં;

તતો જાતપ્પસાદોવ, તં વનં પરિણામયિં.

૩૫. ‘‘બુદ્ધસ્સ યમિદં દાસિં, વિપ્પસન્નેન ચેતસા;

ભવે નિબ્બત્તમાનમ્હિ, નિબ્બત્તતિ ફલં મમ.

૩૬. ‘‘ચતુન્નવુતિતો કપ્પે, યં આરામમદં તદા;

દુગ્ગતિં નાભિજાનામિ, આરામસ્સ ઇદં ફલં.

૩૭. ‘‘સત્તતિંસે ઇતો કપ્પે, સત્તાસું મુદુસીતલા;

સત્તરતનસમ્પન્ના, ચક્કવત્તી મહબ્બલા.

૩૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આરામદાયકો થેરો ઇમા ગાથાયો અભાસિત્થાતિ.

આરામદાયકત્થેરસ્સાપદાનં સત્તમં.

૮. અનુલેપદાયકત્થેરઅપદાનં

૩૯. ‘‘અત્થદસ્સિસ્સ મુનિનો, અદ્દસં સાવકં અહં;

નવકમ્મં કરોન્તસ્સ, સીમાય ઉપગચ્છહં.

૪૦. ‘‘નિટ્ઠિતે નવકમ્મે ચ, અનુલેપમદાસહં;

પસન્નચિત્તો સુમનો, પુઞ્ઞક્ખેત્તે અનુત્તરે.

૪૧. ‘‘અટ્ઠારસે કપ્પસતે, યં કમ્મમકરિં તદા;

દુગ્ગતિં નાભિજાનામિ, અનુલેપસ્સિદં ફલં.

૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અનુલેપદાયકો થેરો ઇમા ગાથાયો અભાસિત્થાતિ.

અનુલેપદાયકત્થેરસ્સાપદાનં અટ્ઠમં.

૯. બુદ્ધસઞ્ઞકત્થેરઅપદાનં

૪૩. ‘‘ઉદેન્તં સતરંસિંવ, પીતરંસિંવ ભાણુમં;

વનન્તરગતં સન્તં, લોકજેટ્ઠં નરાસભં.

૪૪. ‘‘અદ્દસં સુપિનન્તેન, સિદ્ધત્થં લોકનાયકં;

તત્થ ચિત્તં પસાદેત્વા, સુગતિં ઉપપજ્જહં.

૪૫. ‘‘ચતુન્નવુતિતો કપ્પે, યં સઞ્ઞમલભિં તદા;

દુગ્ગતિં નાભિજાનામિ, બુદ્ધસઞ્ઞાયિદં ફલં.

૪૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા બુદ્ધસઞ્ઞકો થેરો ઇમા ગાથાયો અભાસિત્થાતિ.

બુદ્ધસઞ્ઞકત્થેરસ્સાપદાનં નવમં.

૧૦. પબ્ભારદાયકત્થેરઅપદાનં

૪૭. ‘‘પિયદસ્સિનો ભગવતો, પબ્ભારો સોધિતો મયા;

ઘટકઞ્ચ ઉપટ્ઠાસિં, પરિભોગાય તાદિનો.

૪૮. ‘‘તં મે બુદ્ધો વિયાકાસિ, પિયદસ્સી મહામુનિ;

સહસ્સકણ્ડો સતભેણ્ડુ [સતગેણ્ડુ (સ્યા. ક.)], ધજાલુ હરિતામયો.

૪૯. ‘‘નિબ્બત્તિસ્સતિ સો યૂપો, રતનઞ્ચ અનપ્પકં;

પબ્ભારદાનં દત્વાન, કપ્પં સગ્ગમ્હિ મોદહં.

૫૦. ‘‘ઇતો બાત્તિંસકપ્પમ્હિ, સુસુદ્ધો નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૫૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પબ્ભારદાયકો થેરો ઇમા ગાથાયો અભાસિત્થાતિ.

પબ્ભારદાયકત્થેરસ્સાપદાનં દસમં.

પદુમકેસરવગ્ગો એકતિંસતિમો.