૪. પઞ્ચસીલસમાદાનિયત્થેરઅપદાનં

૧૩૪. ‘‘નગરે ચન્દવતિયા, ભતકો આસહં તદા;

પરકમ્માયને યુત્તો, પબ્બજ્જં ન લભામહં.

૧૩૫. ‘‘મહન્ધકારપિહિતા, તિવિધગ્ગીહિ ડય્હરે;

કેન નુ ખો ઉપાયેન, વિસંયુત્તો ભવે અહં.

૧૩૬. ‘‘દેય્યધમ્મો ચ મે નત્થિ, વરાકો ભતકો અહં;

યંનૂનાહં પઞ્ચસીલં, રક્ખેય્યં પરિપૂરયં.

૧૩૭. ‘‘અનોમદસ્સિસ્સ મુનિનો, નિસભો નામ સાવકો;

તમહં ઉપસઙ્કમ્મ, પઞ્ચસિક્ખાપદગ્ગહિં.

૧૩૮. ‘‘વસ્સસતસહસ્સાનિ, આયુ વિજ્જતિ તાવદે;

તાવતા પઞ્ચસીલાનિ, પરિપુણ્ણાનિ ગોપયિં.

૧૩૯. ‘‘મચ્ચુકાલે ચ સમ્પત્તે, દેવા અસ્સાસયન્તિ મં;

‘રથો સહસ્સયુત્તો તે, મારિસાયં [મારિસસ્સ (ક.)] ઉપટ્ઠિતો’.

૧૪૦. ‘‘વત્તન્તે ચરિમે ચિત્તે, મમ સીલં અનુસ્સરિં;

તેન કમ્મેન સુકતેન, તાવતિંસં અગચ્છહં.

૧૪૧. ‘‘તિંસક્ખત્તુઞ્ચ દેવિન્દો, દેવરજ્જમકારયિં;

દિબ્બસુખં [દિબ્બં સુખં (સી.)] અનુભવિં, અચ્છરાહિ પુરક્ખતો.

૧૪૨. ‘‘પઞ્ચસત્તતિક્ખત્તુઞ્ચ, ચક્કવત્તી અહોસહં;

પદેસરજ્જં વિપુલં, ગણનાતો અસઙ્ખિયં.

૧૪૩. ‘‘દેવલોકા ચવિત્વાન, સુક્કમૂલેન ચોદિતો;

પુરે વેસાલિયં જાતો, મહાસાલે સુઅડ્ઢકે.

૧૪૪. ‘‘વસ્સૂપનાયિકે કાલે, દિપ્પન્તે [દિબ્બન્તિ (ક.)] જિનસાસને;

માતા ચ મે પિતા ચેવ, પઞ્ચસિક્ખાપદગ્ગહું.

૧૪૫. ‘‘સહ સુત્વાનહં સીલં, મમ સીલં અનુસ્સરિં;

એકાસને નિસીદિત્વા, અરહત્તમપાપુણિં.

૧૪૬. ‘‘જાતિયા પઞ્ચવસ્સેન, અરહત્તમપાપુણિં;

ઉપસમ્પાદયિ બુદ્ધો, ગુણમઞ્ઞાય ચક્ખુમા.

૧૪૭. ‘‘પરિપુણ્ણાનિ ગોપેત્વા, પઞ્ચસિક્ખાપદાનહં;

અપરિમેય્યે ઇતો કપ્પે, વિનિપાતં ન ગચ્છહં.

૧૪૮. ‘‘સ્વાહં યસમનુભવિં, તેસં સીલાન વાહસા;

કપ્પકોટિમ્પિ કિત્તેન્તો, કિત્તયે એકદેસકં.

૧૪૯. ‘‘પઞ્ચસીલાનિ ગોપેત્વા, તયો હેતૂ લભામહં;

દીઘાયુકો મહાભોગો, તિક્ખપઞ્ઞો ભવામહં.

૧૫૦. ‘‘સંકિત્તેન્તો ચ [પકિત્તેન્તોવ (સી.), પકિત્તેન્તે ચ (સ્યા.)] સબ્બેસં, અભિમત્તઞ્ચ પોરિસં;

ભવાભવે સંસરિત્વા, એતે ઠાને લભામહં.

૧૫૧. ‘‘અપરિમેય્યસીલેસુ, વત્તન્તા જિનસાવકા;

ભવેસુ યદિ રજ્જેય્યું, વિપાકો કીદિસો ભવે.

૧૫૨. ‘‘સુચિણ્ણં મે પઞ્ચસીલં, ભતકેન તપસ્સિના [વિપસ્સિના (સી.)];

તેન સીલેનહં અજ્જ, મોચયિં સબ્બબન્ધના.

૧૫૩. ‘‘અપરિમેય્યે ઇતો કપ્પે, પઞ્ચસીલાનિ ગોપયિં;

દુગ્ગતિં નાભિજાનામિ, પઞ્ચસીલાનિદં ફલં.

૧૫૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા પઞ્ચસીલસમાદાનિયો થેરો ઇમા ગાથાયો અભાસિત્થાતિ.

પઞ્ચસીલસમાદાનિયત્થેરસ્સાપદાનં ચતુત્થં.