૫. અન્નસંસાવકત્થેરઅપદાનં

૧૫૫. ‘‘સુવણ્ણવણ્ણં સમ્બુદ્ધં, ગચ્છન્તં અન્તરાપણે;

કઞ્ચનગ્ઘિયસંકાસં, બાત્તિંસવરલક્ખણં.

૧૫૬. ‘‘સિદ્ધત્થં લોકપજ્જોતં, અપ્પમેય્યં અનોપમં;

અલત્થં પરમં પીતિં, દિસ્વા દન્તં જુતિન્ધરં.

૧૫૭. ‘‘સમ્બુદ્ધં અભિનામેત્વા, ભોજયિં તં મહામુનિં;

મહાકારુણિકો લોકે [નાથો (સી.)], અનુમોદિ મમં તદા.

૧૫૮. ‘‘તસ્મિં મહાકારુણિકે, પરમસ્સાસકારકે;

બુદ્ધે ચિત્તં પસાદેત્વા, કપ્પં સગ્ગમ્હિ મોદહં.

૧૫૯. ‘‘ચતુન્નવુતિતો કપ્પે, યં દાનમદદિં તદા;

દુગ્ગતિં નાભિજાનામિ, ભિક્ખાદાનસ્સિદં ફલં.

૧૬૦. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા અન્નસંસાવકો થેરો ઇમા ગાથાયો અભાસિત્થાતિ.

અન્નસંસાવકત્થેરસ્સાપદાનં પઞ્ચમં.