૧૦. અગ્ગપુપ્ફિયત્થેરઅપદાનં

૩૭. ‘‘સુવણ્ણવણ્ણં સમ્બુદ્ધં, નિસિન્નં પબ્બતન્તરે;

ઓભાસયન્તં રંસેન [રંસિયા (સ્યા.)], સિખિનં સિખિનં યથા.

૩૮. ‘‘અગ્ગજં પુપ્ફમાદાય, ઉપાગચ્છિં નરુત્તમં;

પસન્નચિત્તો સુમનો, બુદ્ધસ્સ અભિરોપયિં.

૩૯. ‘‘એકત્તિંસે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૪૦. ‘‘પઞ્ચવીસતિકપ્પમ્હિ, અહોસિ અમિતોગતો [અમિતવ્હયો (સી.)];

સત્તરતનસમ્પન્નો, ચક્કવત્તી મહબ્બલો.

૪૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અગ્ગપુપ્ફિયો થેરો ઇમા ગાથાયો અભાસિત્થાતિ.

અગ્ગપુપ્ફિયત્થેરસ્સાપદાનં દસમં.

થોમકવગ્ગો છબ્બીસતિમો.