૨૭. પદુમુક્ખિપવગ્ગો

૧. આકાસુક્ખિપિયત્થેરઅપદાનં

૧. ‘‘સુવણ્ણવણ્ણં સિદ્ધત્થં, ગચ્છન્તં અન્તરાપણે;

જલજગ્ગે દુવે ગય્હ, ઉપાગચ્છિં નરાસભં.

૨. ‘‘એકઞ્ચ પુપ્ફં પાદેસુ, બુદ્ધસેટ્ઠસ્સ નિક્ખિપિં;

એકઞ્ચ પુપ્ફં પગ્ગય્હ, આકાસે ઉક્ખિપિં અહં.

૩. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, પુપ્ફદાનસ્સિદં ફલં.

૪. ‘‘ઇતો છત્તિંસકપ્પમ્હિ, એકો આસિં મહીપતિ;

અન્તલિક્ખકરો નામ, ચક્કવત્તી મહબ્બલો.

૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા આકાસુક્ખિપિયો થેરો ઇમા ગાથાયો અભાસિત્થાતિ.

આકાસુક્ખિપિયત્થેરસ્સાપદાનં પઠમં.

૨. તેલમક્ખિયત્થેરઅપદાનં

૬. ‘‘સિદ્ધત્થમ્હિ ભગવતિ, નિબ્બુતમ્હિ નરાસભે;

બોધિયા વેદિકાયાહં, તેલં મક્ખેસિ તાવદે.

૭. ‘‘ચતુન્નવુતિતો કપ્પે, યં તેલં મક્ખયિં તદા;

દુગ્ગતિં નાભિજાનામિ, મક્ખનાય ઇદં ફલં.

૮. ‘‘ચતુવીસે ઇતો કપ્પે, સુચ્છવિ નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તેલમક્ખિયો થેરો ઇમા ગાથાયો અભાસિત્થાતિ.

તેલમક્ખિયત્થેરસ્સાપદાનં દુતિયં.

૩. અડ્ઢચન્દિયત્થેરઅપદાનં

૧૦. ‘‘તિસ્સસ્સ ખો ભગવતો, બોધિયા પાદપુત્તમે;

અડ્ઢચન્દં મયા દિન્નં, ધરણીરુહપાદપે.

૧૧. ‘‘દ્વેનવુતે ઇતો કપ્પે, યં ચન્દ [યં પુપ્ફ (ક.)] મભિરોપયિં;

દુગ્ગતિં નાભિજાનામિ, બોધિપૂજાયિદં ફલં.

૧૨. ‘‘પઞ્ચવીસે ઇતો કપ્પે, દેવલો નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૧૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અડ્ઢચન્દિયો થેરો ઇમા ગાથાયો અભાસિત્થાતિ.

અડ્ઢચન્દિયત્થેરસ્સાપદાનં તતિયં.

૪. પદીપદાયકત્થેરઅપદાનં

૧૪. ‘‘દેવભૂતો અહં સન્તો, ઓરુય્હ પથવિં તદા;

પદીપે પઞ્ચ પાદાસિં, પસન્નો સેહિ પાણિભિ.

૧૫. ‘‘ચતુન્નવુતિતો કપ્પે, યં પદીપમદં તદા;

દુગ્ગતિં નાભિજાનામિ, દીપદાનસ્સિદં ફલં.

૧૬. ‘‘પઞ્ચપઞ્ઞાસકે કપ્પે, એકો આસિં મહીપતિ;

સમન્તચક્ખુનામેન, ચક્કવત્તી મહબ્બલો.

૧૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પદીપદાયકો [અપણ્ણદીપિયો (સી. ક.)] થેરો ઇમા ગાથાયો અભાસિત્થાતિ.

પદીપદાયકત્થેરસ્સાપદાનં ચતુત્થં.

૫. બિળાલિદાયકત્થેરઅપદાનં

૧૮. ‘‘હિમવન્તસ્સાવિદૂરે, રોમસો નામ પબ્બતો;

તમ્હિ પબ્બતપાદમ્હિ, સમણો ભાવિતિન્દ્રિયો.

૧૯. ‘‘બિળાલિયો ગહેત્વાન, સમણસ્સ અદાસહં;

અનુમોદિ મહાવીરો, સયમ્ભૂ અપરાજિતો.

૨૦. ‘‘બિળાલી તે મમ દિન્ના, વિપ્પસન્નેન ચેતસા;

ભવે નિબ્બત્તમાનમ્હિ, ફલં નિબ્બત્તતં તવ.

૨૧. ‘‘ચતુન્નવુતિતો કપ્પે, યં બિળાલિમદાસહં;

દુગ્ગતિં નાભિજાનામિ, બિળાલિયા ઇદં ફલં.

૨૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા બિળાલિદાયકો થેરો ઇમા ગાથાયો અભાસિત્થાતિ.

બિળાલિદાયકત્થેરસ્સાપદાનં પઞ્ચમં.

૬. મચ્છદાયકત્થેરઅપદાનં

૨૩. ‘‘ચન્દભાગાનદીતીરે, ઉક્કુસો આસહં તદા;

મહન્તં મચ્છં પગ્ગય્હ, સિદ્ધત્થમુનિનો અદં.

૨૪. ‘‘ચતુન્નવુતિતો કપ્પે, યં મચ્છમદદિં તદા;

દુગ્ગતિં નાભિજાનામિ, મચ્છદાનસ્સિદં ફલં.

૨૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મચ્છદાયકો થેરો ઇમા ગાથાયો અભાસિત્થાતિ.

મચ્છદાયકત્થેરસ્સાપદાનં છટ્ઠં.

૭. જવહંસકત્થેરઅપદાનં

૨૬. ‘‘ચન્દભાગાનદીતીરે, આસિં વનચરો તદા;

સિદ્ધત્થં અદ્દસં બુદ્ધં, ગચ્છન્તં અનિલઞ્જસે.

૨૭. ‘‘અઞ્જલિં પગ્ગહેત્વાન, ઉલ્લોકેન્તો મહામુનિં;

સકં ચિત્તં પસાદેત્વા, અવન્દિં નાયકં અહં.

૨૮. ‘‘ચતુન્નવુતિતો કપ્પે, યમવન્દિં નરાસભં;

દુગ્ગતિં નાભિજાનામિ, વન્દનાય ઇદં ફલં.

૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા જવહંસકો થેરો ઇમા ગાથાયો અભાસિત્થાતિ.

જવહંસકત્થેરસ્સાપદાનં સત્તમં.

૮. સળલપુપ્ફિયત્થેરઅપદાનં

૩૦. ‘‘ચન્દભાગાનદીતીરે, અહોસિં કિન્નરો તદા;

વિપસ્સિં અદ્દસં બુદ્ધં, રંસિજાલસમાકુલં.

૩૧. ‘‘પસન્નચિત્તો સુમનો, પરમાય ચ પીતિયા;

પગ્ગય્હ સળલં પુપ્ફં, વિપસ્સિં ઓકિરિં અહં.

૩૨. ‘‘એકનવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સળલપુપ્ફિયો થેરો ઇમા ગાથાયો અભાસિત્થાતિ.

સળલપુપ્ફિયત્થેરસ્સાપદાનં અટ્ઠમં.

૯. ઉપાગતાસયત્થેરઅપદાનં

૩૪. ‘‘હિમવન્તસ્સ વેમજ્ઝે, સરો આસિ સુનિમ્મિતો;

તત્થાહં રક્ખસો આસિં, હેઠસીલો ભયાનકો.

૩૫. ‘‘અનુકમ્પકો કારુણિકો, વિપસ્સી લોકનાયકો;

મમુદ્ધરિતુકામો સો, આગચ્છિ મમ સન્તિકં.

૩૬. ‘‘ઉપાગતં મહાવીરં, દેવદેવં નરાસભં;

આસયા અભિનિક્ખમ્મ, અવન્દિં સત્થુનો અહં.

૩૭. ‘‘એકનવુતિતો કપ્પે, યં વન્દિં પુરિસુત્તમં;

દુગ્ગતિં નાભિજાનામિ, વન્દનાય ઇદં ફલં.

૩૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉપાગતાસયો [ઉપાગતહાસનિયો (સ્યા.), ઉપાગતાહાસનિયો (ક.)] થેરો ઇમા ગાથાયો અભાસિત્થાતિ.

ઉપાગતાસયત્થેરસ્સાપદાનં નવમં.

૧૦. તરણિયત્થેરઅપદાનં

૩૯. ‘‘સુવણ્ણવણ્ણો સમ્બુદ્ધો, વિપસ્સી દક્ખિણારહો;

નદીતીરે ઠિતો સત્થા, ભિક્ખુસઙ્ઘપુરક્ખતો.

૪૦. ‘‘નાવા ન વિજ્જતે તત્થ, સન્તારણી મહણ્ણવે;

નદિયા અભિનિક્ખમ્મ, તારેસિં લોકનાયકં.

૪૧. ‘‘એકનવુતિતો કપ્પે, યં તારેસિં નરુત્તમં;

દુગ્ગતિં નાભિજાનામિ, તરણાય ઇદં ફલં.

૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તરણિયો થેરો ઇમા ગાથાયો અભાસિત્થાતિ.

તરણિયત્થેરસ્સાપદાનં દસમં.

પદુમુક્ખિપવગ્ગો સત્તવીસતિમો.