૨૬. થોમકવગ્ગો

૧. થોમકત્થેરઅપદાનં

૧. ‘‘દેવલોકે ઠિતો સન્તો, વિપસ્સિસ્સ મહેસિનો;

ધમ્મં સુણિત્વા મુદિતો, ઇમં વાચં અભાસહં.

૨. ‘‘‘નમો તે પુરિસાજઞ્ઞ, નમો તે પુરિસુત્તમ;

બહુજ્જનં [બહું જનં (સી.)] તારયસિ, દેસેન્તો અમતં પદં’.

૩. ‘‘એકનવુતિતો કપ્પે, યં વાચમભણિં તદા;

દુગ્ગતિં નાભિજાનામિ, થોમનાય ઇદં ફલં.

૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા થોમકો થેરો ઇમા ગાથાયો અભાસિત્થાતિ.

થોમકત્થેરસ્સાપદાનં પઠમં.

૨. એકાસનદાયકત્થેરઅપદાનં

૫. ‘‘વિજહિત્વા દેવવણ્ણં, સભરિયો ઇધાગમિં;

અધિકારં કત્તુકામો, બુદ્ધસેટ્ઠસ્સ સાસને.

૬. ‘‘દેવલો નામ નામેન, પદુમુત્તરસાવકો;

તસ્સ ભિક્ખા મયા દિન્ના, વિપ્પસન્નેન ચેતસા.

૭. ‘‘સતસહસ્સિતો કપ્પે, યં કમ્મમકરિં તદા;

દુગ્ગતિં નાભિજાનામિ, પિણ્ડપાતસ્સિદં ફલં.

૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા એકાસનદાયકો થેરો ઇમા ગાથાયો અભાસિત્થાતિ.

એકાસનદાયકત્થેરસ્સાપદાનં દુતિયં.

૩. ચિતકપૂજકત્થેરઅપદાનં

૯. ‘‘આનન્દો નામ સમ્બુદ્ધો, સયમ્ભૂ અપરાજિતો;

અરઞ્ઞે પરિનિબ્બાયિ, અમનુસ્સમ્હિ કાનને.

૧૦. ‘‘દેવલોકા ઇધાગન્ત્વા, ચિતં કત્વાનહં તદા;

સરીરં તત્થ ઝાપેસિં, સક્કારઞ્ચ અકાસહં.

૧૧. ‘‘એકનવુતિતો કપ્પે, યં કમ્મમકરિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૧૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ચિતકપૂજકો થેરો ઇમા ગાથાયો અભાસિત્થાતિ.

ચિતકપૂજકત્થેરસ્સાપદાનં તતિયં.

૪. તિચમ્પકપુપ્ફિયત્થેરઅપદાનં

૧૩. ‘‘હિમવન્તસ્સાવિદૂરે, વિકતો [વિકનો (સી. સ્યા.)] નામ પબ્બતો;

તસ્સ વેમજ્ઝે વસતિ, સમણો ભાવિતિન્દ્રિયો.

૧૪. ‘‘દિસ્વાન તસ્સોપસમં, વિપ્પસન્નેન ચેતસા;

તીણિ ચમ્પકપુપ્ફાનિ, ગહેત્વાન સમોકિરિં.

૧૫. ‘‘એકનવુતિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિચમ્પકપુપ્ફિયો થેરો ઇમા ગાથાયો અભાસિત્થાતિ.

તિચમ્પકપુપ્ફિયત્થેરસ્સાપદાનં ચતુત્થં.

૫. સત્તપાટલિયત્થેરઅપદાનં

૧૭. ‘‘કણિકારંવ જોતન્તં, નિસિન્નં પબ્બતન્તરે;

સત્ત પાટલિપુપ્ફાનિ, બુદ્ધસ્સ અભિરોપયિં.

૧૮. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સત્તપાટલિયો થેરો ઇમા ગાથાયો અભાસિત્થાતિ.

સત્તપાટલિયત્થેરસ્સાપદાનં પઞ્ચમં.

૬. ઉપાહનદાયકત્થેરઅપદાનં

૨૦. ‘‘અહોસિં ચન્દનો નામ, સમ્બુદ્ધસ્સત્રજો તદા;

એકોપાહનો મયા દિન્નો, બોધિં સમ્પજ્જ મે તુવં.

૨૧. ‘‘એકનવુતિતો કપ્પે, યં પાનધિં [યમુપાહનં (સી.), યં પાદું (સ્યા.)] દદિં તદા;

દુગ્ગતિં નાભિજાનામિ, ઉપાહનસ્સિદં ફલં.

૨૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉપાહનદાયકો થેરો ઇમા ગાથાયો અભાસિત્થાતિ.

ઉપાહનદાયકત્થેરસ્સાપદાનં છટ્ઠં.

૭. મઞ્જરિપૂજકત્થેરઅપદાનં

૨૩. ‘‘મઞ્જરિકં કરિત્વાન, રથિયં પટિપજ્જહં;

અદ્દસં સમણાનગ્ગં, ભિક્ખુસઙ્ઘપુરક્ખતં.

૨૪. ‘‘પસન્નચિત્તો સુમનો, પરમાય ચ પીતિયા;

ઉભો હત્થેહિ પગ્ગય્હ, બુદ્ધસ્સ અભિરોપયિં.

૨૫. ‘‘દ્વેનવુતે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, પુપ્ફપૂજાયિદં ફલં.

૨૬. ‘‘ઇતો તેસત્તતિકપ્પે, એકો આસિં મહીપતિ;

જોતિયો નામ નામેન, ચક્કવત્તી મહબ્બલો.

૨૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મઞ્જરિપૂજકો થેરો ઇમા ગાથાયો અભાસિત્થાતિ.

મઞ્જરિપૂજકત્થેરસ્સાપદાનં સત્તમં.

૮. પણ્ણદાયકત્થેરઅપદાનં

૨૮. ‘‘પબ્બતે હિમવન્તમ્હિ, વાકચીરધરો અહં;

અલોણપણ્ણભક્ખોમ્હિ, નિયમેસુ ચ સંવુતો.

૨૯. ‘‘પાતરાસે અનુપ્પત્તે, સિદ્ધત્થો ઉપગચ્છિ મં;

તાહં બુદ્ધસ્સ પાદાસિં, પસન્નો સેહિ પાણિભિ.

૩૦. ‘‘ચતુન્નવુતિતો કપ્પે, યં પણ્ણમદદિં તદા;

દુગ્ગતિં નાભિજાનામિ, પણ્ણદાનસ્સિદં ફલં.

૩૧. ‘‘સત્તવીસતિકપ્પમ્હિ, રાજા આસિં સદત્થિયો [યદત્થિયો (સી. સ્યા.)];

સત્તરતનસમ્પન્નો, ચક્કવત્તી મહબ્બલો.

૩૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પણ્ણદાયકો થેરો ઇમા ગાથાયો અભાસિત્થાતિ.

પણ્ણદાયકત્થેરસ્સાપદાનં અટ્ઠમં.

૯. કુટિદાયકત્થેરઅપદાનં

૩૩. ‘‘વિપિનચારી સમ્બુદ્ધો, રુક્ખમૂલે વસી તદા;

પણ્ણસાલં કરિત્વાન, અદાસિં અપરાજિતે.

૩૪. ‘‘એકનવુતિતો કપ્પે, યં પણ્ણકુટિકં અદં;

દુગ્ગતિં નાભિજાનામિ, કુટિદાનસ્સિદં ફલં.

૩૫. ‘‘અટ્ઠવીસે [અટ્ઠતિંસે (સ્યા.)] ઇતો કપ્પે, સોળસાસિંસુ રાજાનો;

સબ્બત્થ અભિવસ્સીતિ, વુચ્ચરે ચક્કવત્તિનો.

૩૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કુટિદાયકો થેરો ઇમા ગાથાયો અભાસિત્થાતિ.

કુટિદાયકત્થેરસ્સાપદાનં નવમં.

૧૦. અગ્ગપુપ્ફિયત્થેરઅપદાનં

૩૭. ‘‘સુવણ્ણવણ્ણં સમ્બુદ્ધં, નિસિન્નં પબ્બતન્તરે;

ઓભાસયન્તં રંસેન [રંસિયા (સ્યા.)], સિખિનં સિખિનં યથા.

૩૮. ‘‘અગ્ગજં પુપ્ફમાદાય, ઉપાગચ્છિં નરુત્તમં;

પસન્નચિત્તો સુમનો, બુદ્ધસ્સ અભિરોપયિં.

૩૯. ‘‘એકત્તિંસે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૪૦. ‘‘પઞ્ચવીસતિકપ્પમ્હિ, અહોસિ અમિતોગતો [અમિતવ્હયો (સી.)];

સત્તરતનસમ્પન્નો, ચક્કવત્તી મહબ્બલો.

૪૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અગ્ગપુપ્ફિયો થેરો ઇમા ગાથાયો અભાસિત્થાતિ.

અગ્ગપુપ્ફિયત્થેરસ્સાપદાનં દસમં.

થોમકવગ્ગો છબ્બીસતિમો.